SUAREZ
Kinahanglang imbestigahon sa kadagkoan sa Bureau of Fire Protection (BFP-7) ang pasangil nga dunay mga aplikante pagka bombero nga biktma sa scam.
Sumala pa, tag 13 mil pesos ngadto sa 25 mil pesos matag ulo sa 130 ka mga biktima nga posibleng binuhatan sa mga kadagkoan sa BFP.
Sumala pa sa reklamo nga silang mga applicants wa makapasar sa height requirement ug didto nagsugod ang mga pasikot-sikot sa ilang mga papeles.
Ang mga biktima dili na dawaton kay fake ang ilang nakuha nga dokumento gikan sa Office for Muslim Affairs (OMA) bahin sa waiver sa height requirement.
Una niini, nakadawat ko og text message nga nagkanayon: “Mitoyo ko sa pagpangita ug numero nimo sir loyd kay kahibaw ko ikaw ang makatabang sa problema sa akong pag umangkon nga mi apply pagka bombero sa Cebu.
Kay kuwang man ija height magkinahanglan kini ug height waiver.
Sa iyang pag submit sa folder gi ingnan sija nga kuwang sija sa sukod ug gitudloan nga doolon ang bombero nga si sfo2 tanodtanod nga maoy motabang nija pagkuha sa certification gikan sa ofc for muslim affairs.
Tood man gidool nija kini ug 13 karon makakuha ug certification.
Apan niadtong lunes abril 3 gipatawag ang tanan nga dunay waiver nga miabot ug 130 kabook ug giingnan sila nga ang ilahang certification kay peke ug maoy rason nga wala sila maapil sa recruitment process kay giuli ang ilahang folder
Natino kono sa mga opisyales sa bfp7 nga wala marehistro sa OMA ang ilang mga pangalan.
Nabiktima intawon sa skam ang gatos kapin ka aplikante. Sa habig sa ahong pag umangkon giotang to nija ang kwarta.
Matud pa sa ilahang pagsusi si tanod2 dunay konsabo sa OMA nga si Cheryl Fernandez.
Bantog ra nga sa EMALL magtransact human mag fill up sa buhatan ni tanod2 kay peke diay.
Tabangi intawon mi sir nga mabolgar kini. Miabot ug 2 milyon ang nakakuwarta sa sindikato.
Maayo unta nga maimbestigar kini ug duna bay kalambigitan ang mga kadagkoan sa bfp7.
Gani nagplano sila nga magpanon sa OMA ug sa Ombudsman aron isumbong ang mga kahiwian ug pagpangwarta sa kadagkoan sa BFP7,
Nahibong ang mga aplikante kay sa dihang ilahang adtoon unta si sfo2 tanod2 sa cebu provincial office wala na kini madestino didto ug toa na sa tuburan fire station. Ang pangutana gitaguan ba kini sa director?
Palihug ug expose niini sir. Taga bohol me sir ug pobre ra tawn me.”
Akong gi-follow-up kining maong isyu sa BFP-7 niadtong miaging semana apan wa sa iyang opisina si S/Supt Samuel Tadeo nga maoy regional director, sumala pa ni SFO1 Wendel Villanueva.
Usa sa mga biktima nga nagpa-interview sa akong radio program sa DYSS Super Radyo niadtong Huwebes sa gabii nga taga Mindanao mikompirmar niining maong isyu.
Direktang gitumbok silang SFO3 Tanodtanod ug Fernandez sa maong tinunto ug didto sa E-Mall ang transaction.
Sumala niya nga gipangayoan siya og 21 mil pesos alang sa pagkuha sa certification nga nagtuo gyud silang genuine. Gipadak-an ang iyang kantidad kay duol na ang deadline niadtong tungura.
Midugang ko pagkuha sa habig ni SFO3 Tanodtanod sa isyu didto Tuburan Fire Station apan giingnan mi sa nakatubag nga si FO1 Shanoor Khandaker nga wa na didto kay gibalik sa Cebu Provincial Fire Station niadtong Huwebes, April 6.
Gikompirmar ni FO1 Khandaker nga gidestino didto si SFO3 Tanodtanod gikan sa March 29, 2017 ngadto sa April 6, 2017.
Maglaum ko nga motubag ning maong isyu sila si Tanodtanod ug kini si Fernandez.
Kung way trampas, nganong gitagoan man si SFO3 Tanodtanod? Nakabahin ba sa pangwarta ang mga opisyales sa BFP ug OMA?