Gerard Pareja
Sa una dihay punuan sa mansinitas atubangan sa duplex nga duol sa amo. Kada purtahan ning maong duplex dunay mga bata nga sipat nga kusog kaayo mokatkat ning maong kahoy.
Gatuo kami nga sa madugay o madali duna gyuy mahulog ning maong kahoy.
Ug tuod man ang bata sa walang balay ang unang nahulog.
Matud pa niya, nakalimot siyang didto siya sa taas sa kahoy.
Mao nga dihang gitawag siya misugod siya paglakaw sa hangin ug may milagubo ilawom sa mansinitas.
Pagkasunod semana niana, ang bata napud sa pikas maoy misaka sa maong kahoy.
Gitawag kinis iyang mama kay pakaliguon na.
Apan nalingaw og labyog-labyog sa sanga ang maong bata hangtud nasipyat kini sa sunod sanga ug nahagba.
Way nakakita kon naunsa siya pagkahagba apan nakurat ang tanan dihang misidlit ang dugo ibabaw sa iyang kilay.
Puti og pamanit kining maong bata (kaliwat og gawasnon ang iyang duha ka ginikanan) maong kahadlukan kaayo tan-awon ang pula kaayo nga dugo nga mihilam-os sa nagkaluspad niyang panagway. Apan ang di makalimtan sa tanan mao ang gisulti: Ma, ay lang ko dad-as doctor, ma, maligo na lagi ko.
Tungod sa akong nabasahan kabahin sa habal-habal driver sa Clarin, Bohol nga mi-report sa kapulisan kabahin sa iyang mga pasahero nga sakop sa Abu Sayyaf Group (ASG), nahinumduman ko kining among batang silingan niadto nga nahulog sa puno-an sa mansinitas.
Matud man gud sa maong habal-habal driver nga ang iyang mga pasahero nga nangitag pan laig mga sinultian ug mga way kaligo.
Misantap dayon sa iyang hunahuna nga kining mga tawhana wala makaligo kay gapunay kinig tago sa mga suoksuok.
Ug malagmit nga sila mao ang mga nakaikyas nga sakop sa ASG nga nakig sinukliay og bala batok sa military ug kapulisan sa lungsod sa Inabanga mga pipila lang ka adlaw ang milabay.
Paghuman nilag palit og pan sa laing lungsod, gihatud sa driver ang mga pasahero sa ilang gipuy-an.
Dayon iyang gireport sa kapulisan ang ilang nahimutangan.
Ug tuod man gisulong sa mga sundalo ang kampo sa maong mga stragglers ug gihurot kini nilag patay.
Sa hulagway nga gikuha sa akong higala nga maniniyut, diha pay pan ug pustiso nga nahabilin sa kasagbutan human sa pinusilay.
Unsa kaha kon duna pay tubig sa gitaguan ning mga ASG ug nga nakaligo sila. Dudahan kaha sila sa habal-habal driver nga sila mao ang criminal nga nagtagotago?
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
