Lloyd Suarez
Pakonswelo ra g’yud sa mga trabahante ang dugang 13 pesos nga umento sa suweldo (minimum wage) dinhi sa Sugbo ug sa Tunga-tungang Kabisay-an.
Wa g’yud ni maghatag og maayong balita sa selebrasyon sa Labor Day karong adlawa.
Pun-an pa nga nalangay ang pag-implementar niini ug karon pa’ng petsa 4 ang effectivity nga taud-taud naman unta kining naaprobahan sa wage board.
Sa wage order no. 20, mobalor na og P366.00 ang new basic wage sa mga trabahante sa lugar nga Class A nga non-agriculture, P348.00 sa agriculture/non-sugar ug P316.00 sa agriculture/sugar.
Ang Class A, gilangkuban sa mga Syudad sa Carcar, Cebu, Danao, Lapu-Lapu, Mandaue, Naga, Talisay, ug mga lungsod sa Compostela, Consolacion, Cordova, Liloan, Minglanilla ug San Fernando nga gitawag og Expanded Metro Cebu.
Samtang sa mga kawani sa mga lugar nga Class B sama sa dakbayan sa Toledo ug Bogo ug sa tanang kalungsuran sa Cebu province gawas sa Bantayan ug Camotes Islands mobalor na sa P333.00 ang new basic wage sa non-agriculture.
Sa Class B nga agriculture, P318 sa non-sugar samtang P303.00 ang sugar.
Sa Class C nga gilangkuban sa tanang Siudad ug mga munisipyo sa Bohol ug Negros Oriental province, mobalor na ang suweldo og P323.00 sa mga kawani sa non-agriculture.
Tag P303.00 sa non-sugar ug sugar sa mga dapit sa Class C .
Sa Class D nga mga dapit sama sa mga lungsod sa Siquijor province ug mga lungsod sa Bantayan ug Camotes Islands dinhi sa Sugbo, mokabat na sa P308.00 ang minimum wage sa mga kawani sa non-agriculture.
Samtang tag P288.00 ang non-sugar sa agriculture ug tag P303.00 ang sa sugar industry.
Manghinaot ko nga niining kagamay sa suweldo, tugbangan kini sa doble’ng paningkamot sa atong taga Department of Agriculture aron mabarato ang pagkaon nga maoy labing importante sa tawo.
* * *
Nahinuklog kaayo ko nga nakabasa sa feature story dinhi sa Cebu Daily News nga sinuwat ni Ador Mayol nga napublikar pipila pa lang ka adlaw ang nakalabay nga gibahin sa tulo ka parte agig pahaum niining grabeng problema sa drug addiction.
Sa Part 1: “The light at the end of the tunnel for Lia” nga nagdetalye sa kinabuhi ni Lia nga unang biktima sa kawad-on, kakuwang sa grado, misulod pagka-katabang unya nabiktima sa rape sa amo hangtud nga nahimong commercial sex worker, na-inahan ug grabeng pagka-gumon sa drugas. Apan sa katapusan, nagbag-o ug nakig-uban sa Diyos.
Sa Part 2: “We Care” nga nagdetalye bahin sa seryoso nga panginlabot sa atong simbahan sa maong problema pinaagi sa community-based rehabilitation programs.
Timaan nga aktibo ang simbahan pagpasabot sa pagka bililhon sa kinabuhi kay dili g’yud pasagdan ang mga mi-surrender ilabina kadtong gipang tokhang.
Sa Part 3: “Saving Life” nga naghisgot sa pagkalaksot kaniadto sa kinabuhi ni Alain Joseph Aliño sa pagka drug addict hangtud nga nag-usab sa iyang kaugalingon ug karon manager na sa mga private rehabilitation centers apil na sa iyang gisudlan nga rehab kaniadto.
Sa akong tan-aw kung ang tanang mga nalambigit sa illegal nga drugas susama pa unta sa determinasyon nilang Lia ug Alain, hingpit g’yud nga may kausaban ang kinabuhi.
Sama sa gibalik-balik ni Alain sa akong mga radio programs nga ang kausaban ra g’yud sa kaugalingon maoy importante niining bisyoha.
Maglaom ko nga magmata na ang mga addict ug dili pasagdan ang gobyerno, ang simbahan ug ubang sector nga nagpakabana kanila.
Busa bangon mo ug panarbaho mog tarong, kanang desente.