Gerard Pareja
Di na nako masubay kon nganong niadtong dekada 60 ang hubo-hubo ug pakighilawas nga makita sa tilon gihinganlan man og bomba.
Tingali kay daw boto sa bomba ang epikto niani sa mga nanan-aw.
Duna sad hinuoy posibilidad nga ang bomba sa bisiklita maoy gibasihan sa pagtawag og ingon ning maong mga pilikula.
Kay kasagaran nga pakighilawas adto man mopadulong sa pumping motion.
Mitaput sa hunahuna kining maong angga ug bomba star maoy tawag niadtong mga artista nga mang gawas ning maong klase sa pelikula.
Pag-uso sa betamax. “X” na maoy gitawag sa mga sex film. Ug pag-abot sa internet, porn na maoy nahimong generic name niani.
Kon maghisgut tag bomba, tinuod nga bomba (kana bang mobuto ug makapatay), tingali makaingon ta nga karong tuiga, 2017, mao ang tuig sa bomba.
Niadto lang miaging adlaw dunay bomba nga mibuto sa Quiapo sa Metro Manila.
Duha ang patay ug unom ang nanga-angol. Sa miaging semana, sa Quiapo gihapon, mibuto ang gitawag nilag pipe bomb nga naka angol og 14 ka molupyo sa maong lugar.
Kon kahadlukan kining gitawag nilag pipe bomb, unsa na kaha kining kanunay nga gipanghambog ni Kim Jong-Un sa North Korea nga nuclear head missile?
Kanunay siyang nanghulga nga bombahan niya ang America ug South Korea kon kanunay kining manghasi sa iyang nasud.
Nakuyawan ang Japan kay wa ra bay klaro kining mga missile sa North Korea ug basig mohagtos kini sa ilang tugkaran mahagsa.
Ang America sa iyang bahin buot sang mosigingsiging sa ilang mga kontra pinaagi sa hulog og bomba sa Syria.
Ang bomba nga gitawag og GBU-43/B Massive Ordnance Air Blast Bomb. Tungod kay lisud man timan-an ang maong ngalan ang ilang gitagaan og angga ang maong bomba basi sa initial niani nga MOAB. Gianggaan kinig Mother Of All Bombs.
Maurag Middle Eastern culture man kining paggamit sa pulong nga “mother” isip superlative.
Kon mahinumduman gitawag ni Saddam Hussein og “mother of all wars” ang gubat sa iyang nasud batok sa America.
Wa mauyon si Pope Francis sa maong angga kay alang kaniya ang mother o inahan mohatag og kinabuhi og dili mokuha niani.