Niadtong miaging Lunes sa gabii (May 29) dunay usa ka batan-ong babaye, si Catherine Montinola Gabutan nga taga Sitio Isko Englis V. Rama Guadalupe, ang midangop sa akong programa sa DYSS Super Radyo.
Iyang gireklamo ang mga pulis sa Guadalupe Police Station.
Sentro sa iyang alegasyon mao ang abuso sa kapolisan niadtong Mayo 20 kay bisag igo ra siya’ng nag-video sa mga operatiba nga mihimo og anti-illegal drug operation sa ilang lugar gidakop siya ug gipasakaan sa kasong kalapasan sa PD 1829 (Obstruction of Justice).
Gawas niini, giipon pa gyud silang mga babaye ngadto sa silda sa mga lalaki’ng piniriso samtang natanggong sa temporary detention cell hinungdan nga gibastos siya sa mga pinirisong butakal.
Gipasanginlan sab niya ang mga pulis nga ipa-angkon nalang sa husgado ang iyang kaso.
Akong gitawgan si Commission on Human Rights (CHR-7) Special Investigator Leo Villarino ug mipasalig nga ila kining imbestigahon.
Sumaa pa ni Villarino nga wa gyu’y kalapasan si Gabutan pag-video sa mga pulis ug gani miawhag sila sa publiko pag-video gyud alang sa documentation.
Gibalik-balik sab sa taga CHR nga naka-violate ang mga pulis sa Guadalupe sa ilang pag-ipon sa mga babaye ngadto sa mga lalaki’ng binilanggo.
In fairness sa Guadalupe Police Station, sa joint affidavit nila ni SPO1 Leo Gallego, PO2 Jerramel Cansancio, PO1 Epegemio Remulta ug mga kaubanan, ilang gidakop si Gabutan niadtong May 20 sa gabii kay maoy nagbulabog sa ilang presensiya nga maoy hinungdan nga nakasibat ang mga nag-pot session sa usa ka barong-barong.
Sa 5th paragraph sa joint affidavit sa mga pulis, “That, out of nowhere a woman (Catherine Gabutan) came running towards our position holding a cell phone while its flashlight was turned on and started to record the events. She shouted Hoy nag-unsa mo diha?. Dong pagbantay mo kay naay mga pulis! Hawa mo diri kay wala moy warrant!”.
Miingon ang batan-ong babaye nga wa gyud tawon siya mo-interbiner ug igo ra gyu’ng nag-video dihang ang mga pulis nagpasagad nalang og panulod sa mga panimay.
Kung tinuud man ang version sa kapolisan, puwerte’ng isoga sa batan-ong babaye nga naka-ako pagbabag sa ilang police operation nga contrary to human experience.
* * *
With all due respect sa atong kapolisan ug militar, konbinsido ko nga usa ka terorista ang nag-inusara nga assailant sa Resorts World Manila nga nag-wala ug misunog sa mga lamesa sa casino nga maoy gitoho-ang hinungdan nga na-suffocate-patay ang 37 ka mga biktima.
Nagtoo man gani ko nga gigamitan og chemical ang pagpangatake sa nagpakamatay nga responsable nga may pamayhon sa pagka-foreigner.
Bisan wa mamusil ang lone assailant ngadto sa mga biktima apan ang importante nga milampos siya sa iyang mission nga dili layo sa strategy sa mga terorista.
Ang kadtong pagsunog ug pagpusil sa iyang kaugalingon aron dili siya mailhan way kalainan sa mga suicide bomber sa teroristang grupo.
Nakasabot ko nga dili dayon sakyan nilang PNP Director General Ronald dela Rosa nga terorista ang responsable kay sila maoy unang mabasol nganong nalutsan.
* * *
Saludo gyud ko sa atong mga kadagkuan sa Department of Education (DepEd) kay bisag daghang mga problema sa tingbukas sa klase karong adlawa sama sa kakuwang sa mga magtutudlo, classroom, libro, lingkuranan ug uban pa apan pangitaan gyud og kasulbaran.
Ang importante nga way mag-klase ilawom sa punoan sa mga kahoy.
Maglaum lang sab ko nga dili lang kutob sa pangyugpos si Department of Public Works and Highways (DPWH) Director Ador Canlas niining grabeng delay pag-construct sa mga building alang sa mga senior high school students.
Dukdoka sab intawon Director Canlas ang mga kontraktor nga nagpatuga-tuga.