SUAREZ
Unsa ka luwas ang Sugbo sa mga terorista samtang kita maoy nag-host karon sa Association of Southeast Asian Nations (Asean) senior ministers meeting nga gisalmutan sa 300 ka mga foreign delegates sa 14 ka mga nasud?
Daku kaayo kining hagit sa atong mga security personnel ilabina sa intelligence community .
Simbako labngon pito ka lawod, mapugngan kaha kung may suicide bomber nga mobulabog sa venue?
May posibilidad ba nga suicide bomber diay ang usa o duha o tulo ka mga delegado niining Asean meeting?
Posible ba sab nga dunay mga trabahante sa hotel o tinugyanan sa balaud nga atua ang simpatiya sa mga terorista?
Kining tanan akong itugyan sa atong kapolisan ug militar nga batid ning maong trabaho.
Mag-ampo lang ko nga niining ilang security preparation dili g’yud malutsan sa mga terorista.
* * *
Impas na ang teyoriya ni Atty. Gerry Carillo nga atua sa nasud sa Dubai si Bohol Bien Unido Mayor Gisela Bendong-Boniel.
Pinakadakung bakak nga atua sa Dubai kay ang tinuud patay na si Mayor Gisela kay positibo ang DNA analysis human nitukma ang swab sample sa inahan ug sa blood sample nga nakuha sa gisakyang motorized banca.
Nganong dili naman lang angkonon ang krimen sa bana nga si Bohol Member Niño Rey Boniel?
Ang iyang kanunay’ng pagpamakak ug depensang hilaw maoy makapasamot og kalagot sa publiko nga nagsunod ning maong krimen.
Kung iya pang gi-angkon ang krimen dalang drama nga si Mayor Gisela maoy nagbudhi sa ilang kaminyoon, tingali daghan pa ang mosimpatiya kaniya.
Apas-sumpay niining krimen batok kang Board Member Boniel, akong gisubay niadtong Biyernes sa hapon diha sa Cebu City RTC sa Qimonda ang mga kaso nga maduso bahin sa pagpa-anular sa kaminyoon.
Subo g’yud kaayong palandungon nga pabiling alarming ang gidaghanon sa mga ma-file nga declaration for nullity of marriage. Dunay simana nga mo-abot sa napulo.
Pero mao lagi ni nga mas maayong magbuwag og tarong ang magtiayon nga dili na magkasinabot kay sa magpinatyanay na hinoon.
* * *
Nahimuot kaayo ko karong bag-o sa akong na-obserbahan sulod sa Cebu City Prosecutor’s Office kay nagbutang silag bulletin board ug gi-post ang assignment sa mga piskal matag adlaw.
Hinoon dili kaayo plastada ang detalye ug dili specific ang ilang location. Sa laktod dili security risk alang kanila.
Ang rason nga akong nahibaw-an nganong gituyo pag-post sa bulletin board aron ang mga staff makatubag kung dunay mangutana bahin sa gipa-follow-up nga piskal.
Nindot kaayo kini kung sundon sa ubang mga ahensiya sa gobyerno isip pagpatuman sa transparency.
Apan natinga lang ko niadtong Huwebes sa hapon kay dili updated ang indicator sa mga piskal kay kadtong assignment nila nga gi-post alang pa kadto sa adlaw’ng Miyerkules.
Gawas pa sab way indication o timailhan sa status ni Assistant City Prosecutor Mary Ann Castro. Kumusta naman tuod si piskal “guwapa?”
Nadisguwapa na?
Unsa may gamit sa ilang bulletin board kung dili updated? Pa pogi points lang?
Nganong dili man apilon ang assignment sa tanang staff aron mahibaw-an kung asa ilang whereabouts?