Gerard Pareja
Usa ba ka martyr si Kian Delos Santos nga mahimong rallying point sa mga kontra Duterte nga wa makauyon sa iyang “war on drugs?”
O usa ba siya ka armadong shabu runner sama sa giingon sa mga pulis nga mipusil-patay kaniya? Daghan pang mahimong pangutana kabahin ning maong paet nga kamatayon.
Sa di pa nato batbaton ang mga tingog sa pagduda ania ang mga taho nga makuha nato sa mainstream ug sa social media.
Si Kian usa ka 17 anyos nga grade 11 student nga nanimuyo sa usa ka barangay sa Caloocan City nga gi sikop sa mga plainclothes nga pulis, dunay CCTV nga mopakita niani.
Ug matud pa sa mga saksi, gikulata usa kini sa mga miguroy kaniya sa wa pa kini dad-a sa suok diin didto gikan ang mga butobuto.
Ang pangutana sa mga nakasaksi sa pagkulata ni Kian mao nga: Nganong wa may caliber 45 nga pusil nga nahulog gikan sa shorts nga gisul-ob niani?
Walay garter nga makaupot sa hinagiban nga may ingon niani nga gibugaton.
Nangutana usab ang amahan ni Kian kon nganong didto man sa walang kamot ang maong pusil nga di man walhon ang iyang anak.
Karon, kon klarong gipatay siya sa mga pulis bisag wa siya mosukol unsa may hinungdan nga nahitabo kini.
Tinuod ba ang gipalakaw karon ni PNP Chief Ronald dela Rosa nga usa ka courier si Kian ug nga user ang amahan niani ug nga pusher ang mga uyuan niani? Hinuon bisan pa man og tinuod kini dili kini igong hinungdan nga ila kining patyon ug binlan og pusil.
Di ba kaha nga may nahibawoan si Kian sa mga binuhatan ning maong mga pulis? O di kaha naka saksi siya sa usa ka illegal transaction nga gihimo ning mga pulis mao kinahanglan g’yud siyang patyon.
Wa ba kahay personal nga atraso si Kian ug ang iyang mga pamilya batok ning maong mga pulis.
Ug ang akong gikahadlukan sa tanan mao kining pangutanaha: Wa ba kahay quota nga giapas ang mga pulis sa ilang patyon o dakpon mao nga magpataka na lang silag pamira?
Daghan ang dali kaayo nga mobasol ni Duterte. Pero magda lag gubot ang mga lakang pagpalagput kang Digong. Alang kanako kay wa man makasumpa si dela Rosa sa mga shortcut nga pamaagi sa iyang mga sakop, angay tingali nga mo-resign na siya gikan sa pagka PNP Chief.
Murag nagkabug-at na ang Bato, angay tingali nga buhian na kini ni Digong.