SUAREZ
Nabalaka ko niining proposal karon sa Justice Sector Coordinating Council nga gipangulohan ni Supreme Court Chief Justice Maria Lourdes Sereno nga puwede nang maka plea bargaining sa korte ang mga akusado sa dagkung kaso nga illegal drugs kay maka-encourage kini og patay pa more.
Sa Republic Act 9165 kon Comprehensive Law On Dangerous Drugs Act of 2002, wa itugot nga maka-plea bargain ang mga nalambigit sa illegal drugs.
Ang argumento ni Sereno nga unconstitutional kining di pagtugot nga maka-plea bargain ang mga akusado.
Akong nahibaw-an nga duna na silay gi-andam nga usa ka kaso nga himoong jurisprudence bahin niini unya pirma nalang ang kuwang sa 15 ka mga mahistrado sa Korte Suprema.
Kung mahitabo man kini kadtong mga kaso nga namaligya og shabu (Section 5) ug nagkupot og sobra lima ka gramong shabu (Section 11) katugtan na silang makapiyansa ug silotan nalang sa mubo nga sentensiya.
Sa laktod nga pagka-estorya, sayon nalang ang paglingkawas unya makapadayon sa pagpaninda.
Akong amigo nga piskal miingon nga counter-productive g’yud kini sa kampanya ni Presidente Duterte nga nakabuylo na unta sa pakiggubat.
Makapadismaya kini kay napapas ang body language sa balaud nga ang tuyo unta pagpanghadlok sa mga tawo nga mosulod. So dili na deterrent ang RA 9165.
Ang laing piskal namahayag nga maayo unta kung inig gawas sa prisohan mabuotan na unya, mahimong pari o ba kaha pastor.
Ang akong nabalak-an nga kung ipatuman man ang plea bargaining sa kaso sa illegal nga drugas mosamot ang kaso sa extrajudicial killings kay kapuyan na ang atong mga pulis sa balik-balik nga problema.
Dili kaha mahitabo unya nga inig gawas sa prisohan sa buhian nga akusado atngan sa mga vigilantes?
* * *
Nahimoot ko sa reaction sa ubang mga huwes ug mga piskal nga ipatuman ni Chief Justice Sereno karong September 1 ang 90 days mandatory continuous trial sa mga criminal cases.
Matud pa nga daw morag natug nga nagdamgo si Sereno sa tinuud nga kahimtang kay dunay mga huwes ang mitug-an nga ang next scheduled hearing o setting sa ilang kaso unya na sa tuig 2019 tungod sa kadaghang kaso.
Dili sab superman ang atong mga huwes nga mo-conduct og hearing kada adlaw, 8:00 a.m. to 5:00 p.m.
Di sab kaya sa mga piskal, mga PAO lawyer ug mga court stenographer .
Dunay mihagit kang Sereno nga aron masuweto siya, mangunay pagbisita sa mga kaso.
In fairness ni Sereno maayo nga iyang gipangitaan og solusyon ang mga problema aron mogamay ang court docket ug pag-decongest sa atong mga jail facilities.
Usa sa mga lakang ang pag-hire sa mga law graduates aron makatabang sa mga huwes pag-adjudicate sa mga kaso.
Paeta g’yud bitaw sa kahimtang karon kay misamot kadaghan ang mga kaso unya kuwang pa kaayo kitag mga huwes, piskal ug PAO lawyer.
Dunay mga newly appointed judges apan wa pay court rooms ug wa pay court personnel.
Si Sereno nanguyab usab karon sa mga bag-ong abogado nga mi-gradwar sa trial academy ug sa mga estudyante sa college of law aron katabangan ang ilang jail decongestion program.
Usa sab tingali nga angay’ng himoon ni Sereno nga ipa-enhance niya ang mga mediation sa korte ug ang Katarungang Pambarangay.
Mang-hire kaha ta og daghang mediator unya tanang kaso nga gagmay kaayo ipa-mandatory sa mediation process.