SUAREZ
Makaluya ang nahitabo sa magtiayong Surlito ug Alane Sinugbohan nga gipangmasaker-patay didto sa Barangay Malabago, Badian, niadtong Huwebes sa gabii.
Daku ang posibilidad nga ang pagka – anti-drug crusader sa magtiayon maoy hinungdan nga sila gipangpatay.
Kadto si Alane sa buhi pa, midangop kanako sa among sibyaanan sa DYSS Super Radyo niadtong wa pa ma-presidente si Duterte ug mibutyag sa pagkalambigit sa ilang kapitan nga si Epifania Alvizo sa pagbaligyag shabu.
Ako siya’ng gitambagan nga magpatabang sa kapolisan ug kalooy sa Diyos naronda g’yud ang kapitan di pa dugay ug nagtingkagol na.
Manawagan ko sa atong kapolisan nga hatagan intawon og insaktong seguridad ang mga nahabiling sakop sa pamilya’ng Sinugbohan kay risgo g’yud.
Ngan nga naka-bonnet ang mga mi-masaker, taga Badian ra ang responsable sa krimen.
Dili kaha ang kapitana maoy nagsugo? Nganong nabisto man ang mga Sinugbohan nga maoy asset? Way pulis sa Badian nga protector sa illegal drugs?
Unsa may garantiya nga katabangan sa Malacañang ang mga tawong nagpakabana sa kampanya sa illegal drugs?
* * *
Di sa ingon nga supak ko niining ipatuman nga balaudnon House Bill 6152 nga himoong upat (4) nalang ka adlaw matag simana inay lima (5) ka adlaw ang trabaho sa mga trabahante.
Sa balaudnon nga compressed work week, napulo (10) ngadto sa dose (12) oras matag adlaw ang obra sa mga kawani.
Sa tinuud lang, dunay mga trabahante nga ganahan sab niini ilabina kadtong klase sa trabaho nga anaa ra sa opisina ug kadtong mahilig sa tag-as nga bakasyon.
Apan segurado ko nga supak niini ang mga nag-trabaho sa umahan, sa construction, factory workers, production, sales lady ug sa mga susamang job description nga kusog maoy gikinahanglan.
Apektado g’yud ang production ug risgo pa sa panglawas unya mosamot na nga ang ginikanan dili kahatag og material time sa ilang mga anak matag adlaw.
Mas nindot g’yud ang atong naandan nga lima ra ka adlaw diin mo-duty og tag walo (8) ka oras unya himoong flexible.
Ang buot ipasabot nga kung magsugod sa trabaho ang kawani sa alas 6:00 sa buntag mo-undang siya inig alas 2:00 sa hapon.
Susama ang sestema sa moundang sa alas 9:00 sa gabii.
Kining maong paagi sa schedule tukma kini sa atong sitwasyon sa problema sa traffic. Mas maayo g’yud nga dili magparehas ang schedule sa
pagtangka ug pag-undang aron dili kita maghugop sa kalsada.
* * *
Niadtong Biyernes sa gabii human nga nanihapon mi’g siomai sa Tisa, nahinuklog kaayo ko sa guwardiya sa usa ka gasoline station nga maoy nagbantay sa among sakyanan.
Human nga gihatagan siya og gamay nga pahalipay sa akong asawa bugti sa iyang serbisyo, mihangyo pa intawon nga papaliton mi sa iyang tinda nga budbod.
Siya mi-esplikar nga mi-sekreto siya sa pagpaninda gawas nga nag-guwardiya kay nangyawat intawon tungod kay puwerte gyu’ng lisuda sa panginabuhi unya may estudyante siya sa kolehiyo.
Ang extra income maoy pamilite ug allowance sa anak nga nag-ambisyon nga makabaton sa insaktong edukasyon alang sa maayong kaugmaon.
Ang nakanindot pa g’yud sa sugilanon kay ang iyang anak maoy nagloto sa budbod nga lamian ug init pa kaayo ug maoy nangunay paghatod aron ibaligya sa amahan nga guwardiya.
Sa laktod, makamao gyu’ng modiskarte ang amahang guwardiya kay ang mga tawo nga gikan mangaon sa siomai puwede’ng mohapit pagtilaw sa iyang lami-ang budbod.
Sa tinuud lang, saludo g’yud ko niya bisag kalapasan kini sa mga lagda sa PNP.
Nagpaila lang g’yud sa iyang pagka-responsable.