SUAREZ
Nakapanglipagho ko sa kakutas sa akong kasinati-an niadtong unang adlaw (January 11) sa 5:30 p.m. to 6:30 p.m. nga Novena Mass sa ika-453 nga kapistahan ni Senior Sto. Niño tungod kay naabtan mi og sobra tunga sa oras nga wa ka-irog tungod sa kadaghang mga tawo.
Bisan nanawagan ang kapari-an human sa misa nga dili magtinukmoray apan nahitabo gyud kining maong eksena sa dayon namong gawas diha sa Osmeña Boulevard.
Haskang paeta gyud kung magpirme kadto ilabina sa mga magdala og mga gagmay’ng bata.
Naglisod kami pag-abante paingon sa Colon kay ang bagang duot sa mga manimba sa katapusang misa nga (7:00 p.m.) misugat kanamo unya pun-an pa nga dunay mga nagbabag na daan nga mga devotees sa kalsada nga nag-atubang sa wide screen nga monitor nga gimontar sa Osmeña Boulevard.
Unya gawas pa wa koy nakit-ang mga pulis nga nag-duty ug migiya sa mga manimba kung asa ang entrance ug exit paingon sa Basilica.
Salamat nga gisulbad na kining maong problema nga ang tanang entrance sa Basilica anaa na habig sa Magellan’s Cross ug sa City Hall samtang ang exit anaa sa Osmeña Boulevard.
Maayo unta nga sa mga mosunod nga katuigan ang mga lain-laing parokya mohimo og susama nga Novena Masses nga ihalad kang Senyor Sto. Niño bisag kausa lang matag adlaw aron dili na magsugwak ang mga tawo diha sa Basilica sa iyang kapistahan.
Unya kinahanglang ipahinumdom sa tanan nga ang atong mga replica susama ra sa replica nga anaa diha sa Basilica.
Ang uban man gud sobra na kaayo. Mora na’g mga panatiko.
* * *
Wa sab ko kasabot nganong gipulihan si S/Supt Joel Doria pagka Cebu City Police Director kang S/Supt. Angel Geñoria samtang duol na kaayo ang Sinulog.
Ang rason kay kuno gipa-ubos sa duha ka simana nga training si S/Supt. Doria didto sa Japan.
Kung tinuud man kini, wa gyud sa timing ang pagpuli kang Doria kinsa maoy nagplantsa sa security preparations sa Sinulog 2018.
Wa kaha kini tuyu-a sa atong mga kadagkuan sa kapolisan aron kay kung simbako may mahitabong pagpangatake ug pagpamomba sa mga terorista may ikarason sila sa publiko nga napalpak ang security plan kay bag-o ang City Director?
* * *
Wa gyud mapan-os akong estorya nga abusohan ra sa mga alipores ni Cebu City Mayor Tomas Osmeña ang iyang pagbutang og mga Barangay Mayor’s Office (BMO) sa mga barangay nga kontra partido ang kapitan sama sa Apas.
Tungod sa gihatag nga gahom sa BMO, naglumba sa pagpanglubag ang mga kanahan ngadto sa mga business establishments pinaagi sa pag-solicit og dagku’ng kantidad unya nanghulga pa.
In fairness ni Mayor Osmeña iya nang gitaktak sa puwesto si Mr. Renato Jardaleza nga nang-solicit gamit ang logo sa City Hall.
Maayo unta nga gawas nga gipalagpot sa serbisyo kinahanglang kasohan sa Anti-Graft and Corrupt Practices Act ug kalapasan sa Code of Conduct and Ethical Standards for Public Officials and Employees ang mga kanahan.
Wa kaha gamita’ng bagman sa City Hall sila si Jardaleza ug ubang mga BMO personnel nga nagkatag sa ubang mga barangay?
Maglaum ko nga palawuman ang imbistigasyon niini. Kung wa mabisto ni Kapitan Ramil Ayuman blangko ang publiko.
Ngano gyud kaha nga gitukod man ang BMO nga wa may gahom ug way legal personality nga mangilog o mo-duplicate sa trabaho sa mga kapitan ug mga opisyales nga pinili sa katawhan?
Gigamit nga eyes and ears o bagman sa City Hall?
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
