Konbinsido ko nga luwas gihapon puy-an ang Sugbo alang sa mga tawo nga tarong ug mga law abiding citizens sukwahi sa gipasi-atab ni Cebu City Mayor Tomas Osmeña.
Kinsa man gud ning sagad gipang-patay? Di ba mga nalambigit man sa illegal drugs ug mga badlungon?
In fairness, wa na koy nadunggan nga balita karong bag-o nga dunay biktima sa tulis unya gipatay.
Kadtong pagka-angin patay sa 4 anyos nga batang lalaki sa anti-illegal drugs operation sa Barangay Bato Ermita nga si Bladen Skyler Abatayo dili gyud angay’ng ika-alarma sa publiko kay mahug ra gyud kadto nga isolated case.
Sa pagpatay ni Atty. Salvador Solima, lahi sab to kay ang motibo mao man gyud ang parte sa utang sa mga Solima.
Kadto sang napatay sa mga pulis sa Archbishop Palace lahi sab to og scenario kay misukol tungod sa pagka-deperensiya sa panghuna-huna.
Sama sa akong giingon nga kitang mga nagtinarong sa pagpuyo wa gyu’y risgo. Apan kadtong mga nagniyabag maoy angay’ng mahadlok ug magkinto.
Nganong gi big deal man ni Mayor Osmeña ang mga sunod-sunod nga patay? Tungod kay ang mga biktima iyang mga ka alyado sa politika?
Hadlok sab siya sa iyang seguridad human gitoho-an nga siya usa sab ka protector sa illegal drugs?
* * *
Bugno sa kuwarta ang eleksiyon karong July 30 pagka presidente sa Association of Barangay Councils (ABC – Cebu City).
Ang magsungag mao sila si Kasambagan Barangay Captain Franklyn Ong nga pambato sa Bando Osmeña Pundok Kauswagan (BO-PK) ug si Mabolo Barangay Captain Prisca Niña Mabatid sa Barug Team Rama–PDP Laban.
Ang duha ka mga contender pulos gyud mga tubig-tubigan nga maoy hinungdan nga dili na magpa reelect si ABC President Philip Zafra kinsa Ex-Officio member sa konseho.
Apan kung akoy papili-on sa duha, ari ko kang Mabatid bisag nanuntok og taga hotel ikomparar ni Ong kay ang naulahi may conflict of interest sa Siudad ngan nga daghan siya’g transaksiyon sa Cebu City Hall sama sa pag-supply kaniadto og mga multicab ug pagkontrata sa paghakot sa atong mga basura.
* * *
Naghisgot naman gyud ko kang Mabolo Barangay Captain Mabatid, nakasabot gyud ko sa iyang kapungot nga misangko sa iyang pagpangdapog sa mga personnel sa Waterfront Hotel Lahug.
Bisag kinsa tingali nga masaypan nga usa ka “escort girl” o “pokpok” makagamit gyud og kusog tungod sa kaulaw.
Si Mayor Osmeña nga nanaway kang Mabatid, otro sad siya nga wa ka control sa kaugalingon.
Kadtong iyang pagyabo kaniadto ug pagtunob-tunob sa mga barbecue ni anhing Mr. Sanchez sa Lahug, kalimtan nalang to niya?
Kadtong iyang pag-insulto ug pagkuwelyo ni court sheriff Elcid Caballes, tarong to pa niya?
* * *
Deserving si Presidente Duterte nga daygon human kini nangayog pasaylo sa Ginoo sa iyang paghingan nga estupido or “Stupid God”.
Nagpaila lang nga ang atong presidente dili anti-Christ ug klaro kaayo nga nagtoo sa Diyos.
Inay nga magsige’g panaway ngadto’ng Digong mas nindot tingali nga ato siya’ng i-ampo aron giyahan sa iyang pagdumala sa nasud nga seryosong nakigbatok sa mga yawan-ong binuhatan.