DAKBAYAN SA SUGBU, Pilipinas — Walay bisan usa nga mga saput ug kabtangan nga nadawdaw ang usa ka pamilyahan human nga maugdaw ang ilang panimalay pasado alas siyete sa kagabhion niadtong Miyerkules (Marso 6) didto sa Barangay Tulang sa bukirang barangay sa lungsod sa Argao, mga gibanabana na 30 ka kilometro gikan sa Barangay Poblacion sa maong lungsod.
Si Marcelina Montejo, mga 50 anyos kapin ang panuigon, mipahibalo sa buhatan sa Bureau of Fire Protection Argao (BFP Argao) sa buntag sa Huwebes (Marso 7) kalabot sa pagkasunog sa ilang panimalay.
Matud pa ni SFO1 Noli Remando, BFP Argao Administration chief, sa pagkahinabi sa Cebu Daily News Digital, na si Montejo ug ang iyang pamilya nanambong sa pulong-pulong didto sa lungsod o Barangay Poblacion sa Argao ug walay nahabilin sa ilang balay adtong higayona sa Barangay Tulang.
Read more: Four fires have hit Cebu City a week into the Fire Prevention Month
Si Montejo niingon ni Remando na nakalimot sila og palong sa usa ka suga sa balay sa pagbiya nila pagtambong sa pulong-pulong sa ilang kandidato.
Matud pa ni Montejo na bag-o lang nila nailisan og bombelya ang suga sa ilang balay kay naponder ang unang bombelya na gitaud nila.
Nagatuo si Montejo na ang wala napawong na suga sa balay ang hinungdan na nasunog ang ilang balay.
Dugang pa ni SFO1 Remando nga igo na lang sa paghilak si Marcelina human ang naabtan nila sa kaadlawong dako gikan sa pulong-pulong ang naugdaw nila na panimalay.
Gibanabana nga moabot sa P30 mil ang danyo sa sunog na niulbo sa maong dapit.
Si Fire Inspector Jovito Abelgas, hepe sa BFP sa lungsod sa Argao, mitataw nga kinahanglan na magamping ang publiko sa kanunay aron makalikay sa sunog.
Kinahanglan usad nga susihon kanunay ang ilang gipangsaksak na mga kahimanan aron dili makahatag og kabalaka sa ilang seguridad.
Nitambag si Abelgas sa publiko labi na sa mga residente sa Argao niini tungod kay sa 45 ka barangay sa lungsod, 30 niini ang anaa sa layo na dapit o layo sa kabomberohan sa lungsod na anaa sa Poblacion.
Matud pa ni Abelgas na wala sila makaresponde sa sunog kay walay nipahibalo nila./dbs