Nagmuok-muok kog katawa sa pasiaw ni Sir Bobby Nalzaro kagahapon sa iyang buntagong tulumanon sa DYSS Super Radyo bahin sa isyu sa Talisay City College nga mi-insister gihapon si Dr. Paulus Mariae Cañete nga mopahigayon siya ug linaing graduation ceremony karong Marso 31 karong Lunes alang sa mga tinun-an taliwa nga akong na-interview niadtong Lunes sa gabii si Mayor Johny Delos Reyes nga iyang ipakanselar ang gi-schedule ni Cañete ug ang karong adlawa nga schedule sa graduation maoy suportahan sa mayor.
Ang akong nakataw-an nga nag-mention si Sir Bob sa usa sa iyang igsoon nga kausa ka higayon nanguli silang magsoon ug nag-abot sa ilang probensiya sa Dipolog.
Unya pag-abot sa ilaha ang usa ka igsoon misugilon sa ilang pinanggang inahan nga si anhing Nanay Doring nga nagkanayon nga “Nay, doctor nako.”
Ug nalipay kaayo ang inahan sa balita ug iyang giingnan ang anak nga: “Tambali ko, nak.” Hehehehe.
Ang akong nakuha sa sugilanon mao nga nasayop intawon pagsabot ang tigulang nga taga probensiya sa “doctorate degree” sa usa sa iyang anak ug nagtoo intawon nga mananambal na ang iyang anak.
Kay bisan si kinsa man tingali nga kung dunay ipa-ila nga kanang tawhana, doctor, so, ang unang mosantop sa atong huna-huna nga siya Doctor of Medicine nga manambal gyud sa mga sakit.
Mao nga sa sunod dili gyud ta magtinapulan ug manglaktod sa paglitok sa title sa doctorate degree nga naangkon sa atong kabanay, mga friends ngadto sa tawo nga atong ipa-ila-ila.
Apan dili kini maoy isyu nako. Ang akong ponto mao ang “pagka-Doctor of Education ni Mr. Paulus Mariae Cañete.
Nganong naabot man siya sa maong kinaadman nga mahilig man ug eskandalo?
Naa bay “Doctor of Education” nga maka-ako sa pag-hostage, paglibog sa mga estudyante ug mga ginikanan?
Karon pa ko nakasugat ug school president sa usa ka kolehiyo nga wa nay kaikog ug wa nay kaulaw nga mosupak sa Commission on Higher Education o CHED.
Mosugyot nalang seguro ko sa taga academe nga pun-an ang atong doctorate degree nga mao ang “Doctor of Delicadeza” ug kinahanglang mang-eskuwela ta tanan niini kay daghan kanato ang maka-antigo sa academics apan way mga batasan.
Magpasalamat ko ni Mayor Delos Reyes nga kamao nang maminaw sa mga sugyot gikan sa mga tawo nga way labot sa ilang pamultika.
Akong gidayeg nga kamao siya’ng magpa-ubos ug andam motulon sa garbo alang sa kaayuhan sa kinabag-an. Kana maoy tinuud nga amahan sa lungsod!
Kung tinuud man ang nadawat nakong balita nga dili na mosogot si Vice Mayor Romeo Villarante nga uli-on ang ilang maayong kabubut-on sa mayor, nagduda nako nga kining kontrobersiya sa TCC mugna kini sa mga traydor sa partido aron mabutang nga inutil ang mayor.
Kinahanglang tun-an sa mayor ang pagtangtang ni Atty. Alfredo Sipalay isip legal counsel sa iyang administrasyon nga tinudlo nila ni Villarante ug estudyuhan niya ang pagkanselar sa iyang executive order pagtudlo kaniadtu ni Canete isip TCC President. Mangita siya ug taga Talisay nga kuwalipikado gyud nga modumala sa maong tunghaan aron way gubot.
Nagduda ko ni Atty. Sipalay nga iyang gidala iyang kliyente nga si Dr. Canete sa Talisay kay way kahadlok nga mapriso, ug mahilig kaayo sa buruka hangtud nga ma-inutil si Mayor Delos Reyes sa iyang pagdumala diha.
Tipik ba kini sa strategy nilang Vice Mayor Villarante nga nangambisyon pagka-mayor sa 2016?
* * *
Makalingaw karon ang kalambuan sa Cebu City Prosecutor’s Office samtang nagkaduol na ang pag-retiro ni Deputy City Prosecutor Oscar Capacio kay daghang intresado sa puwesto nga biyaan ni piskal Capacio.
Akong nahibaw-an nga ang atong mga lady prosecutors naglumba sa pagpangayo ug endorsement sa ilang amahan nga si City Prosecutor Nicolas Sellon ug kang Regional State Prosecutor Fernando Gubalane.
Si Sellon nga medyo alanganin kay pulos niya mga sakop miingon nga ang ila nalang mga labaw sa Department of Justice Manila ang magbuot kung kinsa ang itudlo.
Basi sa impormasyon, ang mga intresado mao sila ni piskal Mary Ann Castro, piskal Liceria Rabillas ug piskal Aida Sanchez. Nasayran sab nako gahapon nga intresado sab si Atty. Edgar Seguerra usa sa mga private practitioners.
Dunay ubang intresado midangop direkta sa Malacañang.
* * *
Dunay PUJ driver nga nagbiyaheg Lahug nga akong gibabagan gahapon sa buntag kay buot untang mo-eskapo sa iyang obligasyon sa tinun-an sa Apas National School nga maayong pagka-umod sa kalsada kay bisag wa pa makasakay ug tarong ang tinun-an nga babaye milarga dayon ang driver.
Nangatarungan pa ang PUJ driver nga wa siyay intensiyon nga mopasakay sa estudyante nga nag-atang diha duol sa Lahug Elementary School kay kuno ang iyang pag-aginod tungod lang kay mihunong ang PUJ nga iyang gisundan.
Wa ko makonbinse sa iyang katarungan nga wa siyay intensiyon pagpasakay kay namasahero siya ug klaro kaayo nga ang iyang pagdali-dali gustong mogukod sa naka-una nga PUJ kay maglumba sa pagpick-up ug mga pasahero.
Kung wa nako estoryahe, dili niya dalhon sa ospital ang biktima uban sa amahan.
Paeta gyud ning ubang mga driver kuwang sa seminar.