Ang novel nga Solaris gi-publish niadtong 1961. Gisuwat kini ni Stanislaw Lem nga taga Poland. Ang style ni Lem gihinganlan sa mga critic og “Philosophical Science Fiction.” Ang iyang mga sugilanon susama sa kang Jorge Luis Borges (nga usa ka Argentinian) apan gisagulan lang kinig mga spaceships ug interplanetary travels. Tungod kay may pagka adventure ug satire man ang iyang mga plot na tandi usab siya kang Jonathan Swift (Gulliver’s Travels).
Tungod sa kasikat sa Solaris, katulo kini himuig sine. Una gihimuan kinig 2 installment TV movie sa Russia pagka 1968. Dayon gihimuan napud kinig usab og pelikula sa Russia niadtong 1972 diin nakadaug kini sa Cannes og Grand Prix Spécial du Jury, the FIPRESCI prize ug na nominated kini para sa Palme d’Or.
Ug pagka 2002 dihay pelikula ang Hollywood diin si George Clooney maoy starring.
Ang sugilanon ga asoy kabahin sa planetang Solaris diin ang bugtong buhing binuhat mao ang dagat. Gisuwayan sa mga tao sa spacelab ibabaw sa Solaris pag pakighinabi ning giingong dagat. Nangandoy lagi sila nga makighinabi nila ang dagat ug sa ingon masabtan nila kini.
Apan ang tubag sa dagat mao man ang paghimo og mga binuhat binasi sa unsay naa sa hunahuna sa mga tao sa space lab. Ang usa sa mga scientist sa maong space lab na guilty pa sa paghikug sa iyang gibiyaang asawa. Daw nasabtan kini sa dagat ug maong nipada og buhing replica sa iyang asawa ngadto sa space lab.
Di na lang nato i-asoy ang tanan kay basig ganahan pa kamo mangita og kopya niani para ninyo basahon. Lakturon ko lang pag-ingon nga wa gyud nila masulbad ang talinghaga sa maong dagat.
Samtang nagsunod ako sa CNN sa internet sa mga development sa Malaysia Flight 370 nga kalit lang nahanaw mga usa na ka buwan ang milabay, daw nakaingon kong gimino sa Indian Ocean ang mga search crew. Pakit-on ang mga radars og satellite og mga dagkong butang nga maura-urag parte sa na-wagtang nga MH370 apan inig abot sa mga search planes wa silay makit-an.
Dunay mga mobutho sa ilang duol apan inig kuha nila niani, wala diay kiniy kalabutan sa missing plane.
Niining tungora nahinum-duman ko ang Solaris ni Lem diin giduwa-duwaan sa dagat ang mga mga scientist sa space lab nga buot makighinabi niani.