Gil-as

Nyor Gamay (NG): Nakabasa ka adtong nalimot og tuslok sa “n” sa iyang gi post nga “Laban” nga para unta to Laban Pilipinas Puso?

Nyor Daku (ND): wa ra ba Nyor da.

NG: Gi-translate dayon sa mga sipat og Laundry Philippines Heart.

ND: Mao diayng gilabhan tas “Hellas” o Greece.

NG: Bitaw Nyor sa. Hinuon gawas nga taga abaga ra ta, wa sad gyud manud atong itsa. Pero maka bahugbahug ug lamok-lamok na baya ta basta manginit atong tres. Kuwang lang gyud nuon tag tawo sa tunga. Muduwa man sad hinuon og point guard si Andray Blatche.

ND: Bahugbahug, itsa pwera.

NG: Naa pa kaha tay purohan Nyor?

ND: Kon makadaug lang tag kaduha, mura na nag gold nato. Kon ka usa, silver nana. Kon ma zero ta, bahag ikog.

NG: Kon ingnon ta pananglit ikaw maoy pa dad-on sa Gilas, unsaun man nimo pagpadagan ning maong team?

ND: Tapukon nako ang 200 nga pinakamaayong basketbolista sa Pilipinas.

NG: Dayon?

ND: Dayon paintrahon nako silag track and field, apil na ang hurdles.

NG: Dayon?

ND: Akong i-eliminate ang 101 – 200 sa ranking para 100 na lay mahabilin.

NG: Unya?

ND: Unya ako silang paintrahog triathlon ug i-drop nako sa lista ang lower 50.

NG: Sunod?

ND: Sunod magpa three point shootout ta. Ang top 25 na lang maoy atong ipabilin.

NG: Human?

ND: Inig ka human, magporma tag duha ka team. Gikan sa duha ka team pili-on ta ang lima ka point guard ug upat ka forward. Bahala nag putot ang mga point guard basta lapas sa 6’5 ang mga forward.

NG: Unya siyam ra Nyor.

ND: Wa pa gani ko mahuman.

NG: Aw sorry, Nyor. Padayon.

ND: Akong hangyuon ang kongreso nga mo-naturalize og tulo ka afro players nga mo duwag center ug kamao mo post-up. Para nga sa tanang higayon duna gyud kitay duha ka tag-as nga pure afro nga naa sa korte. Maluag na ta nga mo-itsa og tres kay duna naman tay panghadluk sa kontra sa shaded lane.

NG: Mosugot kaha atong mga kontra ana Nyor nga tulo na kabuok atong Afro centers.

ND: Kon di ta kalusot, duha na lay atong mahimo.

NG: Unsa man ning duha?

ND: Mo-undang tag apil og international competition sa basketball.

NG: Sakit kaayo na Nyor ug murag di kadawat ang mga Pinoy ana.

ND: Aw ari tas ikaduha, maghimo tag atong liga nga “Below 6 ft” o “Below 6’5” International Baskeball Games. Pero murag wala may hilig si P-Noy og sports, bisan pa man kon naa siyay sports car. Maghuwat na lang tingay tang Binay. Tan-awas Mike Rama, di ba maayo mo basket. Partido man na siya ni Binay.

NG: Aguroooy. Condo climbing atong duwa ani Nyor.