Daku kaayong “black eye” sa PNP organization ang pagkapatay nila ni PO3 Fabio Fernandez ug PO1 Al Rasid Jimlani sa Moalboal Police Station tungod sa palpak nga pag-ronda sa usa ka drug personality nga si Michael Aquino.
Makaingon ko nga gi-underestimate nila ang grupo ni Aquino didto sa sitio Banilad, barangay Tomonoy Moalboal.
Tiaw mo na, pito ra silang mga regular member sa PNP dala sa ilang hepe nga si Inspector Edgar Labe ang ni serve sa search warrant nga gi-isyu ni Barili RTC Judge Leopoldo Cañete batok kang Aquino.
Ang nakaporke pa gyud kay mao pay pito ra sila ka buok, ang duha kanila nibiya sa grupo. Ang usa nibalik sa ilang police station kay nagkuha sa camera unya ang laing usa nibiya sa critical area kay ni-adto sa ilang sakyanan nga nalubong sa lapok.
Nganong wa man mangayo ug back-up sa sayo pa ang hepe nga si Inspector Labe ngadto sa iyang mga counterparts nga kalungsuran ug sa Provincial Intelligence Branch?
Nagpasabot ba nga wa nay salig si Inspector Labe kay sa panahon karon dili na kakompiyansahan kay ultimong kaubang pulis posible nga protector na sa mga drug lords?
Akong nasabtan nga kadtong mga nag-motor nga maoy mibira nila ni PO3 Fernandez ug PO1 Jimlani maoy nag-rescue sa tulo ka mga pinusasan nga manuyupay uban sa bata-bata ni Aquino.
Nakasibat ang idlas nga si Aquino nga maoy subject kay daling nakabantay sa presensiya sa kapolisan.
Ang tulo nga ubos na unta sa kostodiya nga sila si Fiel John Ediza, Rolly Tabanao ug Alain Amad nga pulos pinusasan naka-eskapo human napusilan ug nangahagba ang duha ka pulis.
Ig-unsa man si Rolly Tabanao ni anhing Jessie Tabanao nga taga Moalboal sab ug tigpamaba sa Philippine Drug Enforcement Agency (PDEA) kinsa gipapatay sa gidudahang drug lord sa may Escario, Camputhaw?
Si Inspector Labe ug Superintendent Renato Dugan pulos namahayag nga dili gyud sila mangyugpos sa problema sa drugas taliwa sa nahitabo.
Mipasalig sila nga kahatagan ug hustiya ang mga kabanay sa duha ka mga pulis unya tabangan ang pamilya ug hatagan ug posthumous awards ang duha ka pulis nga napatay.
Sa pinaka-latest nga manhunt operations sa kapolisan, mi-surrender kagahapon sa sayong kadlawon ang usa sa mga nalambigit sa pagpusil-patay nilang PO3 Fernandez ug PO1 Jimlani nga si Ezra-el Yosores Ocariza nga taga Alcantara Cebu.
Sa iyang pagtahan gikuguyugan siya sa iyang 2nd degree cousin, si Sambag 2 Barangay Councilman Aurelio Jagmoc Jr. ug Jonathan Bacon.
Sumpay sa problema sa drugas, shocking kaayo ang revelation ni Dr. Rene Obra, chief sa Behavioral Sciences sa Vicente Sotto Memorial Medical Center niadtong Sabado sa hapon atul sa among programa’ng “Dialogue On The Air” nga nagtuki kabahin sa “drug rehabilitation and after care” sa mga drug addict.
Si Dr. Obra mibutyag nga dunay usa ka RTC Judge, mga abogado, mga doctor, mga pari, mga pastor ug mga nurse nga nagumon sa illegal nga drugas.
Iyang gipasabot nga alarming na gyud kaayo ang drug addiction nga matud pa mo-abot na ug 5 million ka mga drug addict sa tibuuk nasud.
Matud niya nga ang nakapasagmuyo, kay kung hisgutan ang gidaghanon sa makasulod sa mga drug rehabilitation center sa mga private ug public rehab centers nationwide mo-abot ra ug 5 mil.
Kini tungod kay limitado kaayo ang mga rehab centers unya haguka ang gobyerno pagsulbad sa problema.
Ang nakaporke pa gyud kay mahal ang pagpa-rehab ug mobalor ug 38 mil pesos ang bayad matag buwan per head sa mga pribadong rehabilitation center. Kung ingon ani ka mahal kinsa may pobre nga magparehab?
Sila si Alain Aliño ug si Gal sa grupong ”Pagpakabana Kapuso” mipadayag nga ang problema sa drug addiction naggumikan gyud sa pamilya ilabina sa mga ginikanan.
Mayoriya sa napunta sa drug addiction kadtong mga anak nga napasagdan sa mga ginikanan ug gipatuyangan sa kuwarta.
Sa ilang survey nakita nga ang sagad misulod sa bisyo mao kadtong mga ginikanan nga atua sa gawas sa nasud nanarbaho nga dili maka-personal ug monitor sa mga anak.
* * *
Nalingaw kaayo ko sa among duwang basketball alang namong mga ginikanan/guardians, mga faculty members sa Lahug Christian School ug sa taga simbahan sa Evangelical Free Church.
Ang among tumong niini mao nga maka-exercise kami ug labaw sa tanan mao ang camaraderie ug sportsmanship.
Sa playoff niadtong Sabado diha sa CENTCOM covered court, milampos kami sa “Yellow Team” pagpukan sa bangis nga “Blue Team” sa “do-or-die scenario”.
Hinungdan nga karong Sabado maningkamot kami paglangkat sa titulo pagka- champion batok sa “Red Team” nga ila ni teacher Cedric Carbilledo niiing pinaka-una nga basketball tournament sa Lahug Christian School.
Mag-ilog sa 3rd place ang “Blue Team” ug ang “White Team” pinangulohan ni teacher John Cedeno. Sila maoy first game, 5:00 p.m.- 7:00 p.m. unya kami ang mosunod alang finals.
Magpasalamat ko sa tanang mga parents nga misuporta niining maong torneyo ug ingon man nila ni Pastor Mike Manego, Ma’am Carmelita Badayos Miguel school principal, tanang mga faculty members, ug sa pamilya ni sir Wilfredo “Boy” Elumba.