Mga professional gyud nga gun-for-hire ang mga assailants sa pag-ambush patay kagahapon sa buntag sa businessman nga si Jaime “Yongyong” Villaceran diha sa Corner Osmeña Boulevard ug Colon St.
Naka-ingon ko niini tungod kay maayo kaayong pagka-execute ang krimen nga maoy hinungdan nga pakyas gyud pag-return fire ang biktima bisan nga may dalang mga armas.
Gitayming pagbira sa duha ka mga suspetsado nga nag-angkasay og motor dihang ang biktima paingon na nga molarga sa dayong “go” signal.
Ang biktima giingong negosyante’g baboy ug chicharon sa Lorega kinsa gikan nga naghatod sa iyang mga anak sa usa ka unibersidad sa wa pa ma-ambush.
Sa sulod sa sakyanan sa biktima may bag nga may kantidad nga balig 327 mil pesos, may .45 caliber ug dunay duha ka 380 caliber.
Ang pangutana nganong nagdala man sa maong kantidad ang biktima? Nganong nagdala man siya ug tulo ka mga armas?
Gawas sa iyang plantalya nga negosyo, wa kaha siya mag-apil-apil sa ubang sindikato? Wa kaha siya malambigit sa ginadiling drugas nga maoy gitutukan sa kapolisan?
Butang kini nga angay’ng subayon sa mga otoridad.
Akoy nalooy sa mga anak niining maong biktima. Akong nahibaw-an nga duna siya’y grade six ug grade 10 nga nagkinahanglan pa intawon kaayo og ayuda sa ginikanan ilabina sa amahan nga maoy haligi sa pamilya.
* * *
Unsay mahitabo sa mga kawani sa El Nuevo Bantay Radyo inig take over karong August 1 sa bag-ong management sa Cebu CFI Cooperative?
Akong nahibaw-an nga sa tulo ka mga radio stations, dunay mga dul-an 20 ka mga empleyado ang apektado.
Pipila kanila akong na-estorya ug naglaum intawon nga dili sila mapasagdan ni Provincial Board Member Grecilda “Gigi” Sanchez.
Daku silag pagtoo nga makadawat sila’g separation pay ug ubang mga kaayohan.
Apan pipila kanila mipadayag nga posibleng modangop sa Department of Labor and Employment (DOLE-7) aron ka protektahan ilang mga katungod.
* * *
Wa koy supak niining tinguha ni Cebu City Mayor Michael Rama nga ibalik ang pagpatuman sa towing ordinance aron birahon kadtong mga motor ug mga sakyanan nga ipataka lang pag-parking sa kadalanan.
Pero kinahanglang tun-an kini pagtarong ni Mayor Rama kay basig mapareha kini niadtong administrasyon ni kanhi mayor Tomas Osmeña nga gilamok og daghang reklamo kay sobra ka abusado ang ubang mga traffic enforcer.
Kumusta naman kadtong kiha nga gi-file ni Tinago Barangay Captain Joel Garganera nga kaalyado ni Rama pag-deklarar nga illegal ang towing ordinance?
Segurado na ba nga ang tibuok income mapunta sa panudlanan sa Siudad?
Kaniadtu ra ba gamay ra kaayo ang porsiento paingon sa city coffer kay atua ang dakung pahak sa private towing company nga ang tag-iya kadugo ra sa nagdumala sa Siudad.
Sa paagi karon ni Rama, wa bay kalainan sa kang Tomas kaniadto nga i-tow gihapon bisag ang tag-iya sa motor nagpalit og tambal sa boteka o ba kaha gahatod sa sulod sa eskuwelahan sa bata?
Consistent kaha si Rama pagpatuman niini sa tanang mga adlaw ug oras ug bisan ngadto sa iyang mga padrino sa politika?
Si Garganera nga usa sa mga mitiyabaw kaniadto uban sa iyang mga konstituwente nga biktima sa madaugdaugon ug pang-warta nga ordinansa, way plano nga motambag ni Mike Rama nga dili na kini ipatuman?
* * *
Salamat sa liderato ni OIC Cebu City Police Director Marciano Batiancela nga gihimo ko niya’ng usa sa mga sakop sa gitukod nga Cebu City Police Advisory Council.
Gituyo kini pag-umol aron matabangan silang kapolisan sa publiko pagmintinar sa kahapsay ug kalinaw.
Maningkamot ko kutob sa akong makaya isip tipik ug kabahin sa akong social responsibility.
Usa sa akong isugyot mao nga kung mahimo himoong 24/7 ang police visibility sa mga strategic areas unya ang mga Barangay nga dagko kinahanglang butangan gyud ug Police Substation sama sa Lahug.