Kinsa man gyud ning mga piskal sa Sugbo nga giingong mga “scalawags” ug gipa-imbistigahan ni Justice Secretary Leila De Lima tungod sa corruption ug pagpang-abuso sa gahom?
Nganong di man ibutyag ni De Lima ang pangan niining maong mga piskal aron dili intawon madudahan ug maduhig kadtong ubang mga piskal nga nagtinarong sa serbisyo?
Kinsa man kining lady prosecutor nga usa sa mga giigo sa kalihim?
Dili kaha kadtong piskal nga wa hatagi’g promotion?
Kaniadto gyud hinoon puwerte’ng daghanang piskal nga mga badlungon ug magpasalamat ko nga nangawagtang na sa serbisyo ang mga kanahan.
*****
Naghisgot naman gyud ko’g piskal, unsa ka tinuod nga nag-aslom na ang romansa nilang Cebu Assistant City Prosecutor Mary Ann Castro ug sa anak ni late Vice Governor Greg Sanchez nga si Greco?
Akong nahibaw-an gikan sa kasaligang tinubdan, nga si Greco milayas na og duha ka higayon kay wa makaantos sa ilang pagpuyo ni Mary Ann gikan sa ilang pagpakasal sa usa ka Muslim matrimonial ceremony nga gitohoang “null and void” niadtong Agosto karong tuiga.
Ang wa masabti ni Greco kay gihimo siyang “boy” ni Mary Ann. Nanabi si Greco sa iyang mga higala nga wa mangita si Castro og bana kun dili “boy”.
Pagkasadya ba niining ilang gugma kay gisumsuman sa ilang mga kabanay ug sa ilang mga suod nga higala.
Hinoon in fairness sa magtiayon, natural kining away ug ang di pagsinabtanay.
Maglaom ko nga tumanon ang saad nilang duha nga mag-inonongay hangtod sa ilang kamatayon kay mao man gyud kini ang gitawag og “gugma”.
Apan suma pa sa akong amigo nga kining pagsulod sa salag sa kaminyoon susama kini sa maghikog. He-he-he, nganong ni enter?
*****
Pila man gyud ang insaktong budget sa pagkaon kada adlaw sa matag pulis nga gipabantay sa seguridad sa mga delegado sa Asia-Pacific Economic Cooperation (APEC) meetings?
Wa gyud ko kasabot kay ang mga bombero tag P500.00 gyud sumala pa ni regional director Esmael Codilla sa Bureau of Fire Protection.
Apan ang mga opisyal sa kapolisan miklaro nga tag P350.00 ra gyud.
Klarohon ta gud ni. Asa man kuhaa ang budget alang sa pagka-on sa mga pulis nga mobantay sa APEC?
Kung gikan kini sa Department of Interior and Local Government (DILG), segurado ko nga parehas ra ang budget sa kaon sa mga pulis ug bombero kay pulos man sila under sa DILG.
Ayaw ko’g ingna nga lahi-lahi silag budget. Kumusta naman kadtong giingon ni Senador Antonio Trillanes nga iya kining himo-an og Senate inquiry?
*****
Nakasabot na ko ni Police Senior Superintendent Mariano Natu-el Jr., hepe sa kapolisan sa dakbayan sa Mandaue, dihang misugilon siya kanako nga dili nila dali-dali-on ang pagpasaka’g kaso batok sa mastermind ug sa mga perpetrator pag-ambush patay ni Atty. Amelie Alegre ug pag-angol nila ni Atty. Briccio Boholst ug sa ilang office staff.
Nahibawo na ko sa gisunod nilang anggulo karon ug kinsay mga responsable.
Ang joint task force sa kapolisan mipasalig nga mahimong alegre kining maong kaso sa mosunod nga mga adlaw kay duol na gyud kaayo ang kasulbaran sa kaso.
Maglaom ko nga insakto ang ilang gisubay nga mga suspetsado.
Kung positibo man ang ilang anggulo, dako kining insulto ug dako kining tamparos sa usa ka government institution.
Complicated kaayo ang pag-ambush sa duha ka mga abogado ug sa ilang office staff kay matud pa nga naglambigit kini og dakong kuwarta.
Ang dakong pangutana: kinsa man gyud diay ang tinuod nga tag-iya sa BMW nga gisakyan sa mga biktima? Di lang si Atty. Alegre ang target, apil sab si Atty. Boholst?
Kumusta man si Ryan, ang bana sa abogada? Wa gyud siya mohatag og giya sa joint task force pagsulbad sa krimen?
Again in fairness ni Ryan nga unang gidudahan, posible sab baya nga duna gyu’y kliyente ang mga biktima nga naglagot kanila.
*****
Milugmaw intawon ang mga luha ni James Montebon dihang iyang gi-ila ang “tablet” nga Apple sa iyang anak nga si anhing Karen Kaye ug sa iyang relo nga Seiko 5.
Nalooy ko sa amahan nga nagtan-aw nga daw kagaksonon sa “tablet” sa iyang anak dihang gipakita ni S/Inspector Delfin Bontuyan niadtong Lunes sa hapon sa may Qimonda IT Center sa Cebu City Hall of Justice.
Matod sa amahan nga pinangga gyud kaayo sa iyang anak ang maong “tablet” ug pirme kining bitbiton ug idulog sa pagkatug.
Si Bontuyan nga anaa sa Criminal Investigation and Detection Group (CIDG) mitug-an nga didto sa Bohol nakuha sa ilang asset ang maong mga butang.