Super Hirit
Leksiyon na gyud namo’ng mga radio anchors ug mga commentators sa DYSS Super Radyo kining pagtawag gamit ang pulong nga “Super” ngadto sa among mga tigpaminaw ug mga sakop sa pamilya.
Example: “Super Digs”, “Super Mai-mai”, Super Jo”, “Super Tope”, “Super John” ug uban pa.
Dili sa ingon nga na-alarma mi niining paggamit sa mga kaalyado ug mga supporters ni Cebu City Mayor Michael Rama nga nagpa-imprinta og mga T-shirts ug gisul-ob niadtong Lunes nga may tatak “Super Mike Returns” atol sa thanksgiving Mass ug pag-asumir niyag balik human sa 60 ka adlaw nga preventive suspension.
In fairness tingali, wa nila gamita ang among sibyaanan aron ma-interpret nga kaming mga nangalagad sa DYSS kaalyado ni Mayor Rama, kay sa tinuod lang, kulatado pub baya si Mayor Rama sa among mga news and public affairs programs.
Ganahan lang tingali ang mga sumusunod nga hinganlan ang mayor og “Super Mike” kay naghatag sila sa tinud-anay nga super serbisyo ngadto sa mga kabus nga taga dakbayan.
Klaroha na ninyo, Mayor Mike! Ayaw intawon mi damaya ninyo sa bugno sa politika.
Ako lang tin-awon nga way pagtugot sa among sibyaanan si Mayor Rama paggamit sa pulong nga “Super”.
* * *
Di na gyud mabangbang ang problema sa traffic karon diha sa dakbayan sa Mandaue ug Lapu-Lapu tungod sa pagpaayo sa 1st Mandaue-Mactan Bridge ug ubang mga kalsada diha sa dakbayan sa Mandaue.
Akong nahibaw-an nga ma-problema sab mi’ng taga South sa mga mosunod nga buwan kay tiwason ang pagpalapad ug pag-ayo sa mga kalsada sa Minglanilla ug Naga.
Ang advice sa mga nagdumala sa traffic nga kinahanglang mobiya na sa ilang point of origin upat (4) ka oras sa dili pa ang flight sa eroplano o ba kaha sa pagsulod sa trabaho o ba kaha sa eskuwelahan alang sa mga estudyante.
Kung unom pa ka buwan mahuman ang pag-ayo, mag-antos kita sa grabeng problema sa traffic hangtod sa Agosto.
Buot ipasabot nga kagidlay ang negosyo sa mga beach resort diha sa Lapu-Lapu ug Cordova kay kinsa pa may ganahan nga mag-summer outing o mangaligo sa dagat nianang mga lugara nga puwerte ma’ng trapika?
Kung akoy negosyante ron, maayong magbutang og zip line o ba kaha cable car nga magdugtong sa Mandaue ug Lapu-Lapu.
Pero dili ba puwede nga himuon ang pagpatrabaho sa tungang gabii aron dili kaayo maapektahan ang riding public?
Way plano ang mga opisyal niining mga national line agency nga anaa diha sa dakbayan sa Mandaue nga magbutang og mga satellite office dinhi sa dakbayan sa
Sugbo aron dili maapike ang publiko sa pag-transact?
Maglaom ko nga tun-an kini sa Aquino administration aron dili sila mamunbon sa eleksiyon.
Kay sa tinuod lang, daghan ang nangutana nganong karon pa gipaayo nga duol na ang pinili-ay.
Daghan sab ang nagduda nga komisyon maoy tuyo niining pagpaayo nila.
* * *
Bugal-bugal man ni’ng pagpaos-os sa plite sa mga PUJ nga tag P6.50 na lang.
Porbida gyud ning taga Land Transportation Franchising and Regulatory Board (LTFRB), paawayon gyud ang pasahero ug driver.
Nahibawo gyud ni sila nga lisod na kaayong pangitaon ang senseyo nga tag 50 ug tag 25 sentimos, unya gipatuman pa gyud nila ang keda nga plitehan.
Nganong wa na man lang himoa nga tag 6 pesos ang plitehan o ba kaha tag 7 pesos?
Sa tinuod lang, ultimong tag 1 peso coin medyo limitado na kay mapundo kini sa hulog-hulog piso sa tubig, internet café ug ubang matang nga negosyo.
Maglaom ko nga sa sunod, hatagan intawon kini sa LTFRB og konsiderasyon.
Ayaw intawon ninyo paawaya ang pasahero ug driver.
* * *
Pormal na’ng gisugdan kagahapon (February 9) ang campaign period alang sa mga national positions sama sa presidente, vice president, senador, mga kongresista ug mga party list representatives.
Si Atty. Ferdinand Gujilde, Election IV sa Cebu Provincial Comelec, miklaro nga di gyud sila managana pagtangtang sa mga campaign materials nga nakalapas sa lagda ug anaa gibutang sa mga lugar nga wa gideklarar sa Comelec nga common poster area.
Dili sab puwede nga butangan ang mga barangay hall, mga simbahan, mga public schools ug mga punoan sa kahoy.
Ang mga pribadong luna ug mga building, puwede’ng butangan basta dunay pagtugot sa mga tag-iya.
Maglaom ko nga hugtan na pag-ayo sa kapolisan ang pagpahigayon og mga checkpoints aron dili makabuylo ang mga demonyo sa politika.
* * *
Miyerkules sa Badlis karong adlawa (Ash Wednesday) nga maoy timaan natong mga Romano Katoliko nga panahon na sab sa pagpamalandong niining balaang mga adlaw.
Kadtong mga nag-edad gikan sa 18 anyos ngadto sa 60 anyos maoy gi-require sa Simbahang Katoliko nga magpabadlis sa agtang ug mo-observe sa “fasting and abstinence”.
Pagkanindot sa atong pamalandong karong tuiga kay daghan kanato ang makauban sa panon ni Kristo tungod kay di pa dugay natong gisaulog ang Pasko,
Kapistahan ni Senyor Santo Niño, pagpahigayon sa 51st International Eucharistic Congress (IEC) ug ang nagkaduol nga Valentines Day.
Ang nahisgutang mga kasaulogan dunay common denominator nga mao ang “gugma”.
Kumusta na man tuod kita? Andam na ba gyud ug takos na ba’ng makig-atubang Kaniya? Nagmilagro na ba kita ngadto sa pagkabuotan gikan sa paglunang sa mga sala?
Wa na bay mga hipokrito nga mga alagad sa Simbahan?