Super Hirit
Nakatawa nalang ko sa lain-laing reaction sa atong mga amigo sa legal profession dihang gi-inquest sa piskaliya niadtong Biyernes sa hapon ang abogado ug iyang kulukadedang nga lady lawyer sa kasong concubinage ug psychological and emotional abuse in relation to RA 9262 o Violence Against Women and their Children (VAWC).
Matud pa, nga sa law school man gud, focus ra kaayo sila sa ilang klase sa balaud. Wa sila tudloi kung unsaon pagsibat ug pag-eskirda nga di masakpan sa asawa. Hehehe.
Akong na-estorya ang complainant nga asawa kinsa usa sab ka abogada ug miklaro nga dili na gyud siya mo-atras sa kaso bisan mitanyag ang abogado sa iyang bana alang sa sabot-sabot.
Alang niya nga wa na gyu’y luna ang mediation kay sobra na gyud kaayo nga siya gi-abusuhan ug gilimbungan sa iyang bana ug sa kabit.
Sa akong nabasa sa iyang complaint, ang asawa mipasabot nga taud-taud na nga may relasyon ang iyang bana ug ang kulukadedang kay dihay higayon nga mitambag na siya sa babaye nga biyaan na ang iyang bana.
Niadtong Huwebes sa gabii, na detalye sa asawa nga grabe gyud kaayo ang pagkutob sa iyang dughan ug taas kaayo ang iyang pagduda nga nag-uban ang duha kay dihang iyang gi-adto sa law office, wa na didto.
Iyang giteksan ug gitawgan apan igo ra’ng mi-reply sa text nga may “meeting”.
Mao nga nagplano siya nga subayon ang mga motel. Pero ang una niyang nahuna-hunaan pag-adto mao ang usa ka pension house sa New Era Mabolo ug didto nagpositibo kay nakit-an niya ang sakyanan sa iyang bana.
Wa gyu’y asawa nga malipay sa nahitabo.
Grabe gyud ang negosasyon kay naabtan og siyam ka oras una misugot ang bana nga magpasulod sa lawak gikan sa eskandaloso ‘ng sitwasyon.
Dili ka komedyahan ning butanga kay puwede kining basihanan nga sila ipa-disbar sa Korte Suprema kay ang concubinage usa kini sa mga kaso nga “involving moral turpitude”.
Gani kadtong isyu sa usa ka laing abogado nga elected official gisusi man gani ni Court Administrator Midas Marquez.
Paeta gyud ni’ng gugma’ng kinawat-kawat!
* * *
Inutil ba gyud ang gobyerno kay wa makahatag sa insaktong suweldo sa mga trabahante?
Si Jaime Paglinawan sa Bayan Central Visayas, mi-insister atul sa among programa’ng “Dialogue On The Air” sa DYSS Super Radyo nga inutil gyud ang kagamhanan kay ang gipatuman nga P353 nga minimum wage dili gyud desente nga suweldo.
Matud niya nga P750 ang insaktong minimum wage matag adlaw ug kini maoy sentro sa ilang pag-martsa kagahapon atul sa ika 114th nga labor day.
Ang Associated Labor Union-Trade Union Congress of the Philippine (ALU-TUCP) miduso na’g petition for wage increase niadtong Abril 21 diin ilang gipangayo ang 161 pesos nga increase matag adlaw.
Si Grace Carreon, board secretary sa Regional Tripartite Wages and Productivity Board (RTWPB), miklaro nga wa gi-deny ang hangyo sa ALU-TUCP taliwa nga naka-isyu silag statement nga wa pay supervening condition pagtay-og sa existing nga wage order.
Iyang gipasabot nga nangayo sila og dugang data unya magtigom pa ang wage board.
Si Philip Tan, consultant ug kanhi presidente sa Mandaue Chamber of Commerce and Industry ug naglingkod sa RTWPB, mipasabot nga kinahanglang tumanon ang balaud nga palabyon gyud ang usa ka tuig una mopagawas og laing wage order.
Iyang gipasabot nga silang mga kompaniya dili gyud magmakuli sa pag-uyon nga dunay increase basta tumanon ang lagda ug mopakita og maayong performance ang mga trabahante.
Sila si DOLE-7 Assistant Regional Director Joel Gonzales ug Luchel Tañiza, spokesperson sa DOLE-7, mipadayag nga dili gyud intawon inutil ang gobyerno kay kanunay’ng gitan-aw ang kaayohan sa mga mamumuo sama sa paghatag og financial assistance ug daghang job fair nga gipahigayon.
Si Atty. Emiliano Tiongco Jr., executive labor arbiter, namahayag nga ang ilang opisina naningkamot nga mapaspasan ang pag-resolbar sa mga labor cases ug iyang gitin-aw nga 70 porsiento sa mga kaso pabor gyud sa mga trabahante.
Sila si Gemma Poloyapoy ug Paciano “Boy” Murro Jr sa National Conciliation and Mediation Board (NCMB) mipadayag nga ang ilang buhatan kanunay maningkamot nga masulbad ang kasungi-an tali sa management ug sa mga union aron way welga nga mahitabo.