Listalista

By: Gerard Pareja July 10,2016 - 09:59 PM

Ambot kon ngano nga gusto man kaayo ang tawo og listalista. Ug tungod niani nagpabiling best seller ang Guiness Book of World Records.

Usa ning maong lista ang tinuig nga FHM 100 Sexiest Women. Ang ABS-CBN actress nga si Jessy Mendiola maoy number one karon. Gikan sa pagka number 23 sa niaging tuig, iyang naobertikan ang sexiest niadto nga si Jennylyn Mercado sa GMA 7. Apan dili kini mao ang dakong istorya. Ang nakahatag og dakong kisaw sa lista karong tuiga mao ang third placer sa lista nga si Nadine Lustre. Diha man guy mga higayon nga nag-una kini sa survey ug daghang gatuo nga modaug kini. Apan wa kuno malipay ang ABS-CBN ug ingon man ang iyang ka love team nga mahimo kining sex symbol o pantasya ng bayan tungod kay gi-market man kini sa maong network isip pa-tweetums kay pang-teen man ang ilang market kaniya. Apan kon uyon man sila o dili, daghan ang nakamatikod sa kusog nga sex appeal ni Lustre.

Anaa pa man gud kanato ang Western-inspired hypocrisy nga buot mobatang og demarcation line between sa virgin ug sa bigaon. Sa ubang nasud sa Asia sama sa Japan, wala kining maong linya. Daghang tweetums nga Hapon nga duna nay ilang mga sexy nga videos. Ang nasulod sa top 5 mao ang ABS-CBN nga artista nga si Angel Locsin nga ikaupat ug si Rhian Ramos sa GMA 7 nga ikalima. Daog sa Top 5 ang ABS batok sa GMA, 3-2.

Tungod tingali sa kalaay nga gibati sa mga NBA fans nga wala na silay makita nga duwa karong mga higayuna ug nga sa ingon dili makabawos ang napildi nila nga team, bisag unsa na lang nga lista ang ilang gipang sunod. Usa niani mao ang draft picks para sa mga mosulod pa lang sa liga. (Kasagaran kanila gikan sa collegiate basketball samtang uban gikan Europe ug China.) Ang 6’10” nga power forward nga daw point guard ang dinuwaan nga si Ben Simmons maoy nahimong number 1 pick karong tuiga dihang gikuha siya sa Philadelphia 76ers. Si Brandon Ingram ang versatile nga forward maoy nahimong number 2 dihang gipili kini sa Los Angeles Lakers. Ang top 5 sa draft naglakip kanila ni Faylen Brown (Boston Celtics), Dragen Bender (Phoenix Suns) ug Kris Dunn (Minnesota Timberwolves).

Daw nakulbaan tingalig gamay si Tomas Osmeña nga basig malakip ning giingon ni PNP Director General Bato dela Rosa nga lista sa 23 ka drug mayors. Makaingon ta nakulbaan siya kay giunhan na man niya ang tanan pinaagi sa pag-ingon nga andam siyang moatubang ni Digong kon ugaling motumaw man ang iyang pangan sa maong lista. Tingali ang paghingan sa iyang higala nga si Peter Lim isip drug lord ug ingon man sa paglambigit sa iyang sinaligang pulis niadto nga si Garbo isip drug protector maoy katarungan nga nangandam na siya kon ugaling maapil siya sa 23 drug mayors list.

Hinuon ang pinakasikat tingali nga listahan mao ang lista sa utang o balansi. Hapit kitang tanan nakaapil na niani.

Your subscription could not be saved. Please try again.
Your subscription has been successful.

Subscribe to our daily newsletter

By providing an email address. I agree to the Terms of Use and acknowledge that I have read the Privacy Policy.

Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS: basketball, list, Mayor Osmeña, Osmeña, Tomas Osmeña

We use cookies to ensure you get the best experience on our website. By continuing, you are agreeing to our use of cookies. To find out more, please click this link.