Ipapatay gyud ang 5 PNP generals?

By: Lloyd Suarez July 10,2016 - 09:59 PM

Usa ka dakong kadaugan namo sa Radyo GMA kay kami karon ang number 1 sa latest survey sa AC Nielsen Research.

Gawas nga nangharos ang among AM station DYSS sa tanang AM stations sa Sugbo, nagpabiling numero uno ang among FM Station nga mao ang DYRT FM.

Nagpasabot lang nga kami maoy gipaminaw sa mga Sugbuanon karon. Hinoon dili kini malalis kay consistent number 1 akong programa.

Salamat mga Kapuso!

Hisgot na man gyud kog mga tigpaminaw, grabe karon ang reactions nga akong nadawat pinaagi sa text messages ug tawag atol sa akong radio program sa gabii ug sa radio program sa buntag ni Sir Bob nga akoy kasamtangang nagdala niadtong niaging semana bahin sa gibutyag ni >Presidente Duterte batok sa lima ka mga PNP generals nga protector sa mga drug lords.

Daghan ang nisugyot nga kinahanglang unahon pagpatay ang lima ka mga PNP generals lakip silang retired General Marcelo Garbo, retired General Vicente Loot ug ang laing tulo nga aktibo pa sa serbisyo.

Gikuwestiyon na si Duterte kay makasayon-sayon lang pagpapatay niadtong wa ilhi sa katilingban pero pinugngan ang lihok batok sa mga impluwensiyado nga lisod banggaon.

In fairness sa presidente, dili siya maoy nangunay sa mga patay karon sa lain-laing mga lugar. Posible man gani nga ang gipangpatay maoy pagpatak-om kanila aron dili masabit ang mga local police officers nga maoy protector.

Ang importante nga gisugdan sa presidente pagdiga kung kinsa kining mga police generals nga protector ilabina kang General Marcelo Garbo nga giingong maoy protector nilang Wu Tuan alyas Peter Co, Herbert “Ampang” Colangco nga pulos detinado sa New Bilibid Prison ug maoy nag-operate sa Luzon area, ug si Peter Lim sa Kabisay-an.

Speaking of Peter Lim, kinsa man gyud tuod ni siya? Mao ba kini ang Peter Lim nga apil sa expose kaniadto ni kanhi kongresista Antonio Cuenco nga kumpare ni Presidente Duterte ug kumare ni Cebu City Councilor and First Lady Margot Osmeña?

Makapaduda sab baya kay dunay apo nga babaye si kanhi kongresista Cuenco nga nahimo’ng asawa ni Peter Lim Jr. Hinuon usahay mahimong buta ang gugma.

Kung dili ni mao ang Peter Lim nga gitribukar sa presidente, nganong dili man siya magpakita sa mga sakop sa media pagpamatuod nga anaa ra siya dinhi sa dakbayan sa Sugbo?

Kinahanglang i-qualify gyud ni Duterte kung kinsa nga Peter Lim aron dunay kaangayan ang tanan ug aron maklaro kung wa ba hatagi og sayop nga impormasyon ang presidente sa lousy nga mga intelligence officers.

* * *

Human giapil pagbutyag ni Presidente Duterte si anhing Richard King sa illegal drugs operation, wa bay plano ang gobyerno pag-freeze sa iyang mga assets?

Kung gukdon sa gobyerno ang mga propedad ni Jeffrey Diaz alyas Jaguar, way rason nga i-exempted ang mga kabtangan ni King.

Ang pangutana mao kung kaya ba sa kagamhanan? Tingali makaya si Jaguar, nungka ang sa mga King.

Dakong hagit kini sa Anti-Money Laundering Council (AMLAC) pagbawi sa ill-gotten wealth sa mga tawo nga nalambigit sa illegal drugs.

Kanus-a man gyud itribukar ni Duterte ang mga mayor nga nalambigit?

Akong tan-aw ron nagpaka-Poncio Pilato na ang ubang mga mayor.

Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS: Cebu, drug trade, Du30, Garbo, General Marcelo Garbo, General Vicente Loot, illegal drugs, Jaguar, Jeffrey Diaz, King, Marcelo Garbo, Osmeña, Peter Co, Peter Lim, President Duterte, President Rodrigo Duterte, President Rodrigo Roa Duterte, prohibited drugs, Rodrigo Duterte, Rodrigo Roa Duterte, Sugbo, Vicente Loot, Wu Tuan

We use cookies to ensure you get the best experience on our website. By continuing, you are agreeing to our use of cookies. To find out more, please click this link.