Ang kawsa kaniadto ni Cebu City Mayor Tomas Osmeña pagpakigbatok sa illegal nga drugas kutob ra sa grupo nilang anhing Jeffrey “Jaguar” Diaz?
Butang kini nga angay’ng subayon ug imbestigahon ni PNP Director General Ronald “Bato” Dela Rosa.
Unsa man gyud ang tinud-anay nga motibo pagpapatay kang Jaguar Diaz?
Gipatak-om si Jaguar kinsa buot na untang mo-surrender sa Camp Crame aron dili makasuka sa mga protektor niya?
Si Diaz gituhoan nga protektado sa mga dagkong opisyal sa Sugbo kay maayong mo-finance ilabina atol sa eleksiyon.
Alang gud nako, mas makapakugang ang body language ug mga deklarasyon ni Mayor Osmeña nga moundang na siya sa krusada tungod lang sa mabaw kaayong rason nga gipanghulipan ang iyang mga paborito nga police officials dinhi sa Central Visayas.
Akong tan-aw dili makaapekto sa kampanya ang kalit nga pagbugnaw ni Osmeña kay lig-on ang liderato ni Presidente Duterte batok sa drugas.
Dili matupngan ni Osmeña ang tanyag sa presidente nga ang Police Officer 1 ma-promote pagka General o ba kaha hatagan og 5 million kung makapatay og drug lord.
* * *
Kinsa man tawon ni’ng unom (6) ka mga pulis sa Mabolo Police Station ang mangilkil unta og 200,000 pesos sa usa ka ginang nga gituhoang drug pusher sa Barangay Apas nga na-record sa cell phone ang conversation?
Nasayop lang ang kabanay sa dinakpan nga wa ipa-entrap sa National Bureau of Investigation (NBI) ang mga police scalawags.
Wa kaha maapil ang hepe nga si S/Inspector Homobuno Sayon?
Kumusta man tuod ang performance sa Mabolo Police sa kampanya batok sa illegal nga drugas?
Kung tinuod man gani ni, angay’ng ipang-firing squad ning mga pulisa.
* * *
Usa sa akong mga tinubdan sa korte ang mitug-an kanako nga dunay usa ka huwes ang nagpabaga sa iyang nawong ug nagpapapel pagpangayo’g increase sa ilang monthly allowance ngadto kang Cebu City Mayor Tomas Osmeña.
Ang resulta butata kay ibanan gyud hinuon ang ilang allowance.
Mao ni ang nakabati sa ubang mga anaa sa hudikatura kay wa gyu’y delicadeza.
Alang gani nako, ang baruganan nilang Court of Appeals Presiding Justice Gabiel Ingles ug retired RTC Judge Mienrado Paredes nga wa manawat sa allowance gikan sa City Hall maoy labing nindot aron way daghang isyu.
Nasayod ko nga daghang mga huwes ug mga piskal ang mosupak nga wagtangon ilang allowance gikan sa City Hall kay naapil na ilang budget sa pamilya ilabina sa ilang car loan.
* * *
Kung estriktohon man ni Mayor Osmeña ang towing ordinance aron guyuron kadtong mga sakyanan nga pasagad lang og parking, kinahanglang ang gobyerno ray mohimo niini ug dili gyud itugyan og private towing company.
Nitagam na kita kaniadto nga ang private towing company ray nakasapi kay alkanse sa bahin ang city government.
Mohatag na lang ko og warning daan sa mga sakop sa konseho ilabina nga anaa na diha si City Councilor Joel Garganera nga dili gyud mohatag og authority sa mayor nga mosud og kontrata ngadto sa bisan kinsa nga private towing company.
Kaniadto akong nahibaw-an nga kaliwat ra man diay ni Osmeña ang tag-iya sa maong towing company.
Kung ang tuyo sa pag-estrikto sa towing ordinance mao ang paglapad na sa mga kalsada, nganong tugtan man gihapon ang pay parking sa kadalanan?
Nagawngan si Tommy Osmeña sa mga negosyante sa down town area kay daku’g natampo kaniya sa niaging eleksiyon?