Wa nako matingala niining katin-awan ni Presidente Duterte nga dili niya putlon ang maayong relasyon sa Pilipinas ug Amerika taliwa nga nakabuhi siyag mga pulong sa iyang state visit didto sa China nga makigbuwag na siya sa aspeto sa ekonomiya ug sa armadong kusog sa United States of America.
Naka-amgo si Duterte nga dili sayon nga maguba lang ang maayong relasyon tungod sa iyang mga iresponsableng pamahayag.
Nagkagidlay intawon pagpanagang ang iyang mga tigpamaba sa isyu ug mipasabot nga ang pagka- “colonial mentality” mao ra’y angay’ng putlon kay wa gyud kita molambo. Tinuud man sab.
In fairness sa U.S.A. wa man gyud tawon sila mo-isyu og mga sakit nga mga pulong batok ni Duterte. Dili na kinahanglang awayon ang Amerika aron makig-amigo kita sa mga komunistang nasud.
Sakit kining maong kalambuan nga misangpot sa ingon ani kay maka-apektar gyud baya kini sa atong ekonomiya temporaryo.
Apan kung tinuud nga nagtamod ang US government sa pagkamahinungdanon sa atong diplomatic relations nganong dili man sila maningkamot nga estoryahon ug ipa-agi sa dialogue sila si US President Barack Obama ug Duterte.
Sama sa akong giingon sa akong mga radio program nga kining bikil nilang Obama ug Duterte susama kini sa away sa magtiayon nga kung medyo mograbe na, call- off gyud.
Obligasyon sab sa mga kaalyado ni Duterte og bisan kontra partido, paghimo og mga lakang nga magkaduol silang Obama ug Duterte alang sa kaayuhan sa nasud.
Wa sab ko makonbinse sa gitoho-an sa uban nga subay niining bikil karon, mamalhin ug pang-sirad-an ang mga Business Process Outsourcing (BPO) o call centers ug ubang negosyo nga gipadagan sa mga Amerkano dinhi sa nasud nga nakatabang og daku sa atong unemployment rate.
Alkanse gyud sa ilang negosyo ang mga US investors kung mahitabo man kini nga unta temporary ra man kining awaya.
Mabaw ra sab kaayo ang pangagpas sa uban nga kining pakigsuod ni Duterte sa China ug pakig-amigo sa Russia ug ubang mga komunistang nasud makapahitumpawak kanato ngadto sa komunistang pangagamhanan.
Buot lang gyud niya’ng i-proyba sa tibuuk kalibutan nga bukas ang Pilipinas sa pakig-alyado aron pagpalig-on sa atong ekonomiya nga dili sab masakripisyo ang atong kaugalingnan.
Nagtoo sab ko nga ang paghatag og priority ni Duterte sa China, gawas nga makabubu og negosyo, aron sab masulbad na sa hingpit ang kasungi-an sa West Philippine Sea nga wa kinahanglana ang intervention sa U.S.A.
* * *
Kung inutil gyud ang kagamhanan sa dakbayan sa Sugbo sa garbage collection nganong dili naman lang i-privatize ang collection o ba kaha ipa-individual nalang ang diskarte unsaon paghipos ang mga basura?
Kung buot huna-huna-on kini maoy labing seguro nga madisiplina ang tanang mga tawo ug mga kompaniya sa ilang garbage disposal.
Ang mga dagkung kompaniya akong tan-aw kaya man seguro nga sila nay manglabay didto sa Consolacion kay maka-afford man pagpalit og mga state of the art nga mga kahimanan ikomparar sa gobyerno.
Sa mga panimalay, akong tan-aw dili na gyud gani problema ang basura kay anaa diha ang kuwarta.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
