Gerard Pareja
Ambot lang ngano nga mga bombero may una nga mipaguwa og impormasyon tali sa nanghasi sa Resorts World Manila. Tingali kay daub may gihimo ning maong nanghasi. Nagkanayon ang Bureau of Fire Protection (BFP) nga dugay na nga guest sa maong hotel and casino kining maong binuhat.
Dugang pa sa BFP nga malagmit gianam-anam pag assemble ning maong guest ang iyang M14 assault rifle sulod sa room 510 nga iyang gi-istaran.
Ang duha ka interesting nga gisulti sa BFP mao nga kining maong suspect dunay pildi nga 100 million pesos ug nga ang nakapabaga sa aso mao ang daub niani sa usa ka BMW nga display isip usa ka premyo.
Apan dihang nahanaw na ang aso ug mitim-aw na ang kahayag ug human makuha ang 37 ka patay nga lawas nga nangalumos sa aso (ika 38 ang sa lawas sa supect), wala may gipakitang BMW nga gidauban.
Ug bisag tag 40 mil ang iyang ipusta matag duwa wala moabot og 100 million ang iyang pildi. Hinuon duna siyay four million nga utang sa mga bangko tungod ning iyang bisyo sa sugal.
Mitaho usab ang kapulisan nga siya si Jessie Carlos nga kanhi empleyado sa usa ka One Stop Shop sa Department of Finance.
Nabaligya na niani ang iyang sakyanan ug mga yuta para maka padayun og panugal. Buwag na siya sa iyang asawa ug adto lang niaging Abril ubos sa hangyo sa iyang mga paryente gidid-an na siya sa Philippine Amusement and Gaming Board sa pagsulod sa tanang mga casino.
Mao kini ang ilang gituohan nga hinungdan nganong nagwala kini nga nakahunahuna pagdaub og usa ka casino. Apan mi lihuk man ang sprinklers sa Resorts World mao nga wala kini masunog.
Dili usab tinuod nga naka check-in siya sa room 510. Gani iya paman gipugos pag-abli ang kuwarto diin siya nagdaub sa iyang kaugalingon ug nagpusil sa iyang baba.
Kang Jessie Carlos makita nato ang laing klase sa addict. Ang adik sa sugal. Maayo untag himuan usab og lakang sa pamunuan ni Digong kining maong klase sa addiction.
Speaking of addiction, nadakpan sa usa ka pot session ang kanhi basketball player sa PBA nga si Bong Alvarez.
Ug alang sa mga NBA fans aniay gamay nga trivia: gapadayon pag dawat og sweldo ang acting coach sa Golden State Warriors nga si Mike Brown gikan sa Cleveland Cavaliers nga maoy ilang kontra karon sa championship. Karong adlawa ang ilang ikaduhang duwa sa best of seven series.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
