Nalutsan sa mga kuwestiyonable ang PDP- Laban?

SUAREZ

Unsa may garantiya nga modaug g’yud ang mga politiko atol unya sa eleksiyon niining ilang pagtapon sa administration party nga mao ang Partido Demokratiko Pilipino – Lakas ng Bayan (PDP-Laban)?

Gibugo-an nalang g’yud ang mga politiko sa mga intelligent voters?

Partido ba g’yud ang makapadaug sa mokandidato o ba kaha iyang abilidad nga maoy makapahumot kaniya sa katawhan?
Ngadto sa mga incumbent elected public officials nga mitapon sa PDP-Laban, subli-on kaha pag-pili sa mga botante kung way maayong performance unya badlungon nga klaseng opisyal?

Kadtong mga mi-apil sa mass oath-taking pagka Biyernes, nahashasan g’yud to pagtarong?

Wa kahay narco-politician nga nakalusot? Wa kahay mga kurakot?
* * *
Usa sa mga huwes, mi-react sa akong column niadtong miaging simana nga nagkuwestiyon kung unsaon pagtuman ang mandatory continuous trial sa mga kaso nga kuwang man kaayo kita og mga piskal.

Sa probinsiya lang daan, cripple g’yud kay sa 22 ka mga piskal sa Sugbo dili makaya kay gawas nga lagyo ang mga korte mahug sab nga ang usa ka piskal mo-alagad og tulo ngadto sa upat ka mga korte.

Matud sa akong amigong huwes nga nangita sila karon og mga paagi aron g’yud matagad ang mga kaso sama sa pagbista og tibuuk adlaw sa mga kaso gikan sa Mandaue ug laing whole day trial sa laing mga lugar.

Apan bisan unsaon pagkuwenta dili g’yud masulbad ang mga nagtipun-og nga mga kaso.

* * *

Makapahiubos g’yud ang eksena sa nahitabo nila ni John Clifford, akong pag-umangkon uban sa iyang uyab nga nakakita sila’g pitaka nga pambabaye nga may daghang sulod nga kwarta sa usa ka tindahan diha sa dalan Sanciangko nga paserokanan ug loading station sa mga cellular phone niadtong Miyerkules sa buntag .

Tungod kay dili ila ang pitaka, ilang gitugyan ngadto sa tag-iya sa tindahan nga si Merdi Ang.
Nakahuna-huna akong pag-umangkon nga masibya namo sa dySS Super Radyo ang nakit-ang pitaka mao nga ilang gibalikan aron masubay kung may identification cards ba ang sulod sa pitaka.

Apan subo lang kay ang ilang pagpakabana nasukli-an sa mga insulto sa matahapon nga huna-huna ni Miss Ang. Sila gipasanginlan nga interesado sa kuwarta nga maoy hinungdan sa ilang panaglalis.

Mi-uli ang akong pag-umangkon sa balay ug didto nataymingan nga didto ko mao nga gisultihan ko niya sa detalye.

Ako nga nahiubos sab sa nahitabo mao nga among gi-adto si Miss Ang unya tayming sab nga didto sa lugar ang usa ka police beat patrol nga si PO2

Randy Maroyo, nadestino sa Carbon Police aron pagklaro sa tanang mga butang.

Si Miss Ang nagpasabot nga wa siya makatoo sa akong pag-umangkon kay wa sab makapakita og ID.

Uban sa iyang amahan nga si Willy Ang, ilang gipasabot nga ang maong pitaka gipanag-iya g’yud sa ilang customer unya ila na sang na-uli dayon.

Aron g’yud mapatuman ang transparency akong gihangyo ang mga Ang nga kontakon ang tag-iya ug pabalikon sa ilang tindahan.

Tinuud diha ang tag-iya nga si Irene Cantero Collado nga trabahante sa Philippine Crops Insurance ug gidala ang maong pitaka.

Dihang nakonbinse ko nga siya g’yud maoy tag-iya human nakadetalye pagbilin sa pitaka, nagka-uli sa maayong kabubut-on sila si John Clifford ug si Merdi.

Ang klaro sa sugilanon mao nga wa mang-interest akong pag-umangkon ug iyang uyab sa kuwarta. Kay kung di pa sila mga tarong nga klaseng tawo wa to nila itug-an sa tag-iya sa tindahan.