Panahon na gyud seguro nga molihok na si Governor Junjun Davide sa mga baga’g nawong nga mga tinudlo niyang opisyal sa Kapitolyo nga silang Provincial Administrator Mark Tolentino ug Provincial General Service Office Head Jone Siegfred Sepe.
Kung tinuud ug seryoso si Governor Junjun nga gi blind siya nilang Attorney Tolentino ug Sepe pag-donate sa mga culvert gikan sa Balili Property ngadto sa subdivision ni Tolentino sa Saint Michael Village sa Banilad, iya kining pangtaktakon.
Ang i-rason “loss of confidence” batok sa mga hinampak.
Kining duha ka opisyal kanunay lang gyud malambigit og mga dagkung kontrobersiya tungod sa mga kuwestiyonableng kontrata nga pangsudlan.
Unsa may anaa niining duha ka mga opisyal kung pirme’ng duphan sa gobernador nga nakadaot na pag-ayo sa iyang liderato?
* * *
Wa gyud mapan-os akong pahimangno sa mga kadagkuan sa Cebu City Traffic Office (CCTO) nga dili gyud mokompiyansa niining ilang pagka – estrikto pagpatuman sa mga lagda sa trapiko kay risgo gyud kaayo ang ilang mga tawo sa kadalanan.
Dili kalikayan nga dunay mga motorista nga tulibagbag kaayog mga utok sama kang Melbert Destriza nga giingong mipusil sa wheel clamp sa CCTO nga gikimpit sa iyang awto diha sa Barangay Carreta niadtong petsa 15.
Kuwang ra gyud ang usa ka pulis nga back-up matag patrol car sa CCTO.
Si Efren Navales , supervisor sa CCTO nga nakatambong sa akong programang “Dialogue On The Air” sa DYSS miangkon nga risgo gyud sila apan ila gyung ipatuman ang mga batas trapiko aron pag-desiplina sa tanan.
Akong klarohon nga anaa akong suporta sa taga CCTO, apan wa sab ko malipay nga ipa-impound og usa ka buwan ang mga sakyanan ug motorsiklo nga mo-counter flow.
Sa kaso niining Destriza, maglaum ko nga dunay video ug mga testigo nga siya gyud ang namusil unya kasohan gyud sa tanan niyang kalapasan aron motagam sa iyang pagka abusado.
* * *
With all due respect, dili ko makatoo niining alegasyon nga nang-solicit si kanhi Land Transportation Office (LTO-7) Director Arnel Tancinco nga maoy hinungdan sa iyang pagkataktak sa trabaho isip Executive Assistant ni Mayor Tomas Osmeña.
Si Tancinco gitangtang kay gituman ni Mayor Osmeña ang dismissal order from the service ni Tancinco nga gipa implementar sa Ombudsman.
Dili kini maoy akong nailhan ni Tancinco sa iyang pagpangalagad sa gobyerno sukad nahimo siyang opisyal sa CITOM.
Wa ko makaila sa kihante ni Tancinco nga si Carmenia Caballes kinsa nadestino isip evaluator sa Manufacturer, Assembler, Importer, Dealers System sa LTO 7 nga namasangil kang Tancinco nga misugo kaniya pagkolekta ug pag-solicit sa mga suppliers.
Lisud ning pulos pasangil sa tawo nga dunay kasuko human gibalhin og opisina.
Maayo unta kung na-entrap pa si Tancinco.
Haskang gamaya ra sab sa kantidad nga dul-an 300 mil pesos kung tinuud pa.
* * *
Malipay ko’g daku kung ang tanan natong mga huwes dinhi sa dakbayan sa Sugbo mosakripisyo na, sa dili pagdawat og monthly allowance gikan sa Cebu City government tungod sa nahitabo sa ilang Sheriff nga si Elcid Caballes nga gikuwelyohan ug gi-insulto ni Mayor Osmeña nga nagtuman lang sa lawful order pag-demolis sa mga balay sa Capitol Site.
Wa gyu’y kumo nga maglikay silag dawat bisag asa gikan nga local government unit aron dili makuwestiyon ang bisan unsa nilang desisyon sa mga kaso nga nalambigit ang LGU.
Ambot kung mapatuman ba gyud ang Judicial Independence sa mga huwes sa mga isyu ni Mayor Osmeña kinsa mihatag og dakung lote diha sa SRP nga anha pabarugon ang Judicial Complex.
Wa kaha badlunga si Caballes nga magpakahilom nalang tungod sa allowance ug sa Judicial Complex.
Tan-aw ko niining kaso ni Mayor Osmeña ug sa sheriff mahug kini sa bung-aw ug dayong katunaw.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
