Dili tawon mi mga ACDC ug corrupt

By: Lloyd Suarez September 16,2018 - 08:35 PM

Mas pili-on pa nako ang iresponsable, abusado, sabaan, ug tira – pasagad nga radio commentator/announcer ug columnist kay sa magpagawong.

Haskang paeta na gyud kung magawngan kaming mga sakop sa media.

Usa ray rason nganong magawngan. Ang media corruption maoy daku’ng hinungdan.

Mao kini ang daku’ng hagit sa among profession ilabina karon nga daghan kaayong maninintal ngan nga nagkaduol na ang midterm elections.

Manghinaut ko nga daghan pa kami’ng mangalagad sa tinarong ug tiunay nga paagi.

Mabuhi ang prensa sa Sugbo!

* * *
Tinuud preparado ang tanang mga front liner nga mga ahensiya sa gobyerno sa bisan unsang kataladman, apan dili pa gyud kita resilient.

Sa laktod nga pagka-estorya wa gyud kitay dag-anan kung ang bangis nga kataladman maoy manghagis kanato.

Niadtong Sabado, atol sa among programa’ng “Dialogue On The Air” sa DYSS Super Radyo natagbaw kaayo ko sa pagpangandam sa taga DSWD-7 sa ilang pre-positioning sa 30,000 ka mga family food pack nga ma-apod-apod ngadto sa mga biktima ingon man sa taga Police Regional Office-7 ug sa National Food Authority (NFA).

Gawas ning maong mga pagpangandam, naglaum sab ko sama nila’ng PDRRMC Chief Baltazar Tribunalo Jr. ug Engr. Ver Neil Balaba nga i-permanente unta nga trabahante sa gobyerno ang 800 kapin ka mga rescuers sa Sugbo ug dili ipa-molitika sa mga politiko ang atong disaster preparedness.
* * *
Unsa man gyud ang findings sa imbestigasyon sa Committee On Discipline and Investigation (CODI) sa Kapitolyo ngadto sa ilang duha ka mga prison guards nga gipang-apil pag-ambush patay sa drug personality nga si Jerryfer Perigrino?

Sila si anhing PG1 Joel Teves ug PG1 Bernie Bayotas gipa-imbestigahan tungod sa pagduda nga may kalambigitan sa palusot sa mga kontrabando diha sa Cebu Provincial Detention and Rehabilitation Center (CPDRC).

Nasuta ba sa imbestigasyon nga loho na ang kahimtang ug nahimo na’ng kuwartahan kining duha ka mga prison guards human mi-apil pagduwa sa illegal drugs?

Kung wa mo-apil pagduwa sila si Teves ug Bayotas puwerte gyuy’ng luoya nila nga napagan ug naangin lang kang Perigrino.

Akong nahibaw-an nga gagmay rag suweldo kining mga prison guard sa provincial jail kay susama ra silag gidawat nga suhulan sa mga ordinaryong trabahante sa Kapitolyo nga nagsalig sa utang.

Niadtong panahon ni Governor Pablo Garcia dihay usa ka piniriso nga nagsuwat kanamo sa DYSS Super Radyo ug mireklamo batok sa mga prison guards kay wa na mobayad kaniya sa gi-utang nga kuwarta.

Gani dihang akong gikuhaan sa ilang habig ang gipangreklamo nga mga jail guards/prison guards nangangkon sa ilang utang ug mipasalig nga ilang bayran.

Mao nga nagtoo ko nga tungod sa kagamay sa suweldo mao nga sayon ra kaayong matintal sa mga piniriso nga kuwartahan tungod sa sindikato sa illegal drugs.

Kadto si Perigrino uban kang Alvaro “Barok” Alvaro padayon sa ilang negosyo sa sulod sa prisohan bisan pulos detinado.

Mao nga imposible gyud kaayo nga makalusot ang mga kontrabando diha kung way papel ang mga guwardiya.

Unsa ka tinuud nga si Barok dili na gyud mogawas sa CPDRC kay hadlok siyang patyon?

Luwas ba gyud si Barok sa iyang silda?

Subscribe to our regional newsletter

By providing an email address. I agree to the Terms of Use and acknowledge that I have read the Privacy Policy.
Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS: CPDRC, Governor Pablo Garcia, PDRRMC

Subscribe to our regional newsletter

By providing an email address. I agree to the Terms of Use and
acknowledge that I have read the Privacy Policy.

We use cookies to ensure you get the best experience on our website. By continuing, you are agreeing to our use of cookies. To find out more, please click this link.