outbrain

Naibanan akong pagsalig ni Mayor Labella

By: Lloyd Suarez - CDN Digital | January 19,2020 - 07:00 AM

Pit Senyor! With all due respect ngadtong Cebu City Mayor Edgardo Labella di gyud ko motoo nga wa siya masayod sa exclusive contract nga gilagdaan tali sa MyTV ug sa Sinulog Foundation Inc. (SFI) nga ang nahauna maoy gihatagan unta og exclusive rights karong adlawa pag-cover sa Sinulog 2020 grand parade sulod diha sa Cebu City Sports Complex.

Lisud toho-an kay ang iyang manghod nga si Elmer “Jojo” Labella maoy Executive Director sa SFI ug gawas pa gitukod sa mayor ang Sinulog Governing Board (SGB) sa tuyo ug tumong nga ma-monitor niya ang tanang transaksiyon pagpangandam sa Sinulog.

Anyway, salamat nga gipa-kanselar sa Mayor ang exclusivity rights sa MyTV. Kana maoy mayor nga maminaw sa mga yango-ngo ug dali niyang gipahibawo nga abli alang sa tanang media outlets ang pag-cover ug pagkuhag video sulod sa Sports Complex.

Nakasabot ko nga ang 800 mil pesos nga contract sa My TV, tipik kini sa marketing strategy sa SFI aron makakuwarta apan dunay daghang paagi nga masulbad ang ilang target nga funding.

Dili sa pagpamoyboy ngadto sa SFI, daku na kaayo nang tabang namo sa media nga mo-cover ug pag-advertise sa ilang mga aktibidadis aron pag-promote sa Sinulog sukad pa kaniadto.

Nabalaka ko nga sa sunod tuig pabayron na kaming mga tigbalita ug among mga respective network nga mo cover sa Sinulog kay gisugdan na nila ni Sir Bobit Avila sa MyTV.

Kung nadayon pa ang exclusive rights sa MYTV ambot lang kung di ba lamokon sa mga pagsaway si Mayor Labella sa mga nitizens ug mga viewers nga way cable connection.

* * *

Haskang paeta na gyud ron sa Visayas Ombudsman kay kutob nalang sa pagpangyugpos ug dili na motagad sa mga published reports sa media ma column o ma news article kabahin sa mga anomalosong binuhatan, kuwestiyonableng transaksiyon nga gisudlan ug sa mga abuso sa atong mga opsiyales ug mga kawani sa gobyerno.

Si Director Eduardo Kangleon sa Public Assistance Unit sa Visayas Ombudsman mipasabot nga nagpabilin ilang gahom pag-imbistigar sa mga kahiwi-an basi sa constitution apan tungod sa kadaghang ma-publikar dili na gyud nila makaya ang pag-docket sa mga published reports.

Gawas pa sab midason si Mary Jane Concha, Administrative Assistant V nga gawas niini dunay mga article nga purely harassment ug pangdaot lang sa mga nagtinarong sa gobyerno.

Si Kangleon mipasabot hinoon nga dunay diskresyon si Ombudsman Emanuel Martires sa bisan unsang higayon nga maka-docket kini for fact-finding sa mga news article. Buot ipasabot nga dili na gyud manghilabot karon ang Visayas Ombudsman ubos sa liderato ni Deputy Ombudsman Paul Elmer Clemente sa mga news article kay centralize na ang tanan.

Dili parehas niadtong panahon nilang Deputy Ombudsman Arturo Mojica ug Deputy Ombudsman Primo Miro nga paspas kaayong maka-docket sa mga published reports ug mo-conduct dayon og fact-finding investigation. Mao nga insakto kaayo ang gihimong lakang ni columnist Bobby Nalzaro nga mi-personal siya sa pagtunol sa iyang suwat hangyo kang Deputy Ombudsman for the Visayas Clemente nga ipa-ubos sa lifestyle check si LTO-7 Director Victor Emmanuel Caindec niadtong mga pasangil ni Mr. Sonny Caindec iyang amahan nga nadato ug nakapanag-iya og daghang sakyanan (SUV).

Ako naglaum nga masubay gyud og tarong sa taga Ombudsman ang kadatu ni Director Caindec. Kung masuta nga kuwestiyonable ang iyang pagpaburot sa iyang mga kabtangan, may rason nga siya itaral. Apan kung way anomaliya, deserving sab siyang limpiyohan sa mata sa publiko.

* * *

Ambot kung unsa gyud ka impluwensiyado nianang tag-iya sa vacant lot diha sa dalan Colon nga natung-an sa Happy Mart ug McDonalds kay gi-apil man pag-koral ang sidewalk.

Taud-taud na ni nga akong gipaabot ni Cebu City Mayor Edgardo Labella niadtong panahon nga nag-clearing operation diha sa Colon.

Gipasubay na ba kaha kini sa taga Office of the Building Official (OBO)?

Hangtud karon nagpabilin nga di maagian ang sidewalk kay gikoral og mga sin. Mga tawo adto na makababag sa kalsada.

Dili kaha kini maparehas diha sa Mang Inasal sa Osmeña Boulevard duol sa Basilica Minore del Santo Niño nga nakapabarug og building ug naka operate sa sidewalk tungod sa pagka-intuil sa taga City Hall?

Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

We use cookies to ensure you get the best experience on our website. By continuing, you are agreeing to our use of cookies. To find out more, please click this link.