Nawani, nawala sa passing, na “blind” ni Mayor Mike Rama ang mga kontrabida sa iyang kinabuhi nga mao ang mga sakop sa city council dihang gikuha na niya ang downpayment para sa mga luna sa SRP nga pagakuhaon unya sa SM, Ayala ug sa Filinvest, samtang gaplano pa pagbabag ang konseho sa maong transaction.
Gikaingon nga moabot og P6.5 billion ang maong deposit.
Matod pa sa mga Ininglis nga lindog sa ubang pamantalaan, na “out fox” ni Rama ang city council ning maong higayon. Nahimuot ako nga naghunahuna ning maong termino–out fox–kay daghang mga imahin og sugilanon ang akong mahinumduman niani.
Ang daw iro nga mananap sa kalasangan nga fox gituohan nga cunning o sa ato pa abtik ug maru. Lisod dakpon.
Sige ko og ka hagbong sa typing exams niadto. Usa sa mga linya nga ipadukdok namo sa makinilya mao ang–The quick brown fox jumped over the lazy dog. Maayo na lang kay naabtan ko sa computer age diin dili na kaayo problena ang pag-type.
Dunay babae ug lalake nga fox apan sa Western culture daw female ang gi-imply niani nga gender. Dunay sine kabahin sa mga teenage girls starring Jodie Foster niadtong 1980 nga ang title “Foxes.” Dihang gipangutana si Steven Tyler kon unsay iyang paminaw kon motan-aw sa mga love scenes sa iyang anak nga si Live Tyler sa pelikula, mitubag kinig: “Well, she’s a fox.” Dunay “page 3” girl sa mga British tabloid sa ‘90s nga nahimong recording artist nga gihinganlag Samantha Fox.
Ang akong amigong manunulat sa Dumaguete nga si Ceasar Aquino gianggaan og Sawi Fox. Basig di lang tingali pangbabaye kining fox.
Mipasiaw si Sawi Fox niadtog pangutana kon unsa kunoy maayong title sa Christmas album inkasog maghimo siya ug si Samantha Fox uban ang iyang pamilya.
Kay wa may nitubag kanamo, siya nalay ni-answer: The Family Fox Together.
Of course naa ang kanta ni Jimmy Hendrix nga “Foxy Lady.” Ug maingon ta nga ang pro Republican nga Fox News network napuno og mga foxy news anchors ug broadcasters. Gagikan ang Fox network sa Twentieth Century Fox.
Balikan ta si Rama Fox. Unsa may iyang plano ning maong downpayment? Kon siya kunoy pabut-on, buot niya impason ang nahabiling utang sa SRP para wa nay interest nga bayran ang dakbayan ug nga gamiton ang uban para sa pagtukod sa iyang gisaad nga ospital. Good Fox.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
