Gerard Pareja
Dihang nahinabi namo ang ’80s Hollywood icon nga si Rex Smith, mibutyag siya nga dihang nakab-ot niya ang kinatumyan sa iyang kalampusan, diha niya matilawi ang lawom nga kagul-anan.
Nagkanayon ang singer-actor nga dihang pagsikat gayud niya, lain na ang tinan-awan sa mga tawo kaniya ug nausab na ang tinagdan sa iyang mga suod nga higala kaniya.
Ang pagka-inila, sama sa bahandi, matawag natong gahom o birtud. Ug dili kini sayon dad-on. Makaingon man gud kita nga kon nakuha mo na ng gahom, nakuha ka usab sa gahom. Ug di mo kalikayan nga mausab gyud ang imong kinabuhi. Mabutang ka sa teritoryo nga wa mo maandi. Dunay maboang. Daghang maadik.
Kita nga walay abilidad ug walay kaambong sama ni Smith nangandoy nga kon mahimo man gali nga inila o gamhanan, nga mahimo sab unta kitang adunahan. Ug mao nga matag karon ug unya, mopalit kitag tag baynte pesos nga ticket sa lotto. Ug matag lukat natog ticket makahuna-huna kita kon unsa kahag kitay makadaog sa minilyon nga primyo.
Dunay usa ka artikulo sa website sa BBC nga nag-ulohag “Loneliness Often Follows Sudden Wealth” nga mituki sa kinabuhi sa mga simpling binuhat nga kalit lang nagmalampuson sa ilang gipanghimo ug unsay nahitabo sa ilang kinabuhi.
Matud pa sa maong write-up, dihay usa ka flight stewardess nga nakaimbintog butanganan sa mga yawe nga mahimong ikumpit lang sa bag. Tungod niani naka-income siyag 4 million dollars, nakapalit og bag-ong sakyanan ug diha na siyay mga empliyado. Apan daw wa mauyon ang iyang bana nga mas dako pa siyag kita mao nga nakig-divorce kini kaniya.
“People get jealous and say or do ugly things,” matud pa sa kanhi stewardess sa mga binuhatan sa iyang mga higala.
Gani duna nay pangan ang kining maong sitwasyon — “Sudden Wealth Syndrome” — nga diin mokalit lag palayo ang imong mga higala nimo ug ang mga sakop sa imong pamilya ug ingon man ang imong mga paryente buot na nga moapil-apil sa imong negosyo ug sa imong kinabuhi.
Gawas pa niani, ang kalit nga bahandi makapaabrig mga bag-ong plano nga dili mahimo sauna kay wala pa may salapi. Ug kining mga bag-ong kalihukan mahimong makapalayo kanimo sa imong mga suod. Kon sa wa ka pa maadunahan adto ra ka mobakasyon sa imong lungsod, apan kay naa kanamay salapi, ganahan kang mag Christmas o mag Holy Week sa gawas sa nasod. Mao ang panahon nga i-bonding sa imong mga paryente og kababata magkaminos hangtud nga wala na unya kamoy contact. Dili man sa nagarbuso ka, apan buot mo man gud suwayan ang mga butang nga di mahimo sa imong mga higala.
Wa kini magpasabot nga dili kita angay magdamgo. Baynte pesos ra guy puhonan sa maong pagdamgo. Apan ayaw lang sad pagdahum nga puros kaharuhay ang moabot sa imong kinabuhi kon matuman ang imong damgo.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
