Naglumba na sa pagpanghinaw ang mga main actor sa Tony N’ Tommy (TNT) health program nga funded kaniadto sa Priority Development Assistance Fund (PDAF) ni kanhi kongresista Antonio Cuenco.
Wa gyu’y kawatan nga moangkon.
Si Cebu City Councilor James Anthony Cuenco nga gitangtang sa puwesto tungod sa anomaloso’ng medical assistance mihimo na’g mga legal nga lakang sama karon sa pagduso og second motion for reconsideration sa Ombudsman unya naglaraw pagduso og petition for certiorari, injunction ug restraining order sa Court of Appeals aron mabali ang desisyon.
Ang iyang rason kay way igong basihanan nga siya maoy nag-mao-mao sa mga peke nga referral ug prescription sa mga tambal.
Gawas pa sab taliwa nga siya maoy Chief of Staff sa iyang kongresista nga amahan, wa siya’y control sa day-to-day operation sa TNT health program.
Ngan nga dunay memorandum of agreement tali ni former congressman Cuenco ug sa Vicente Sotto Memorial Medical Center ug sa boteka nga kuhaan sa mga medisina, nganong wa may taga ospital nga mitabang pag-oversee sa nindot nga programa?
Gipasagdan lang ang mga Cuenco aron makapaturagas ug makapahimolos?
Si Cebu City Mayor Tommy Osmeña miklaro nga ang iyang partisipasyon sa programa mao ra g’yud ang pagbunyag o paghatag og pangan sa medical assistance nga TNT alang sa mga kabus sa Cebu City South District. Pang PR lang kuno.
Maot ra kaayo si Tommy. Wa kuno siya’y pasyente nga gipatabangan sa TNT. Estoryahe!
Haskang buanga no nga usa ka politiko nga dangpan unya di moduol sa programa nga TNT nga ikaw maoy nagbunyag.
Kung above board pa unta kining maong programa, dili unta makapagawas og findings ang taga Commission on Audit ug Ombudsman nga maka-apiki sa konsehal.
Kining mga legal maneuvering karon ni konsehal Cuenco usa nalang ka damage control sa iyang political career kay sa tinuud lang guba na siya sa mata sa katawhan.
* * *
Angay’ng panaminan sa mga nangapriso sa illegal drugs ang nahitabo sa tulo ka mga magsoong Umpad sa Mandaue nga napatay sa mga pulis.
Labaw na’ng hinuktokan sa atong mga mahistrado sa Korte Suprema ilabina kang Chief Justice Ma. Lourdes Sereno ang tinguha nila nga puwede na’ng maka-plea bargain ang mga dinakpan sa pagbaligya’g shabu ug pagkupot sobra sa lima ka gramo.
Kung pagawson sa prisohan ang mga nalambigit sa drugas sa bisan unsang sirkumstansiya, tabla ra nga maghikog kay segurado ko nga di g’yud sila lung-an sa mga otoridad.
Delikado man gani nga inig gawas sa prisohan atngan sa sindikato aron birahan.
* * *
Sa akong interview sa inahan niadtong tinun-an sa usa ka eskwelahan diha sa Cebu City nga mi-ambak – patay, nagtinguha nga mokiha g’yud sa school administration tungod sa giingong pabaya sa ilang anak.
Gani iya pang-studyuhan sa ilang abogado nga apilon sa kiha ang tag-iya mismo.
Sangko sa langit ang pagmahay sa inahan nga na-inutil ang pamunuan sa kani nga eskwelahan sa paghimo’g mga lakang nga dili maka-ambak iyang anak nga unta diha nay mga timailhan nga maghikog kini dihang na-obserbahan nga wa na sa kaugalingon.
Nakasabot ko sa gibati sa inahan isip ginikanan.
Apan unsa may naka-trigger sa iyang paglayat? Dili kaha sa kahadlok sa ginikanan ug kaulaw human nga wa siya mauli ug nikuyog sa uyab?
Makahatag baya kini og daku’ng pagtulun-an natong mga ginikanan.
Kinahanglan g’yud nga atong i-monitor atong mga anak niining mga edara sa high school kay mao kining edad nga makalilisang sumaa pa ni Dr. Andrea Ando, principal sa secondary division sa University of Cebu.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
