Lig-un pa diay si Mike sa politika?

Gerard Pareja

Nyor Gamay (NG): Para nimo Nyor, Unsa may kahulugan aning mibutho nga tarp ni Mike Rama?

Nyor Daku (ND): Kadtong gihayhay sa skywalk sa Basak Pardo?

NG: O. Kadtong nahulagway si Mike uban kanila ni Atty Ungab nga bag-o lang gipatay sa may recla ug sa anhing mayor sa Albuera Leyte nga si Rolando Espinosa, Sr.

ND: Lagi. Kadtong gipang drawingan og X ang nawong ni Ungab ug Espinosa. Ug ang nawong ni Rama gi-encircled ug gisuwatag ikay sunod. Aw daghan man tang mabasa nga kahulugan ning maong buhat.

NG: Sama sa unsa, Nyor?

ND: Usa, nga lig-un pa gyud diay si Mike Rama sa politika. Ang pag gamit og tarp aron pagdayeg o pagdaut, tested naman nga political strategy. Dili man gud tanag tao naay facebook maong medyo effective pa gihapon ang tarpaulin sap ag sibya ning maong mga binuang. Ug kay gi target man si Mike ning maong panglawgaw nagpasabot kini nga duna pa diay siyay balor o bili. Daghan naman gud ang nagtuo nga binlud na lang ang anhing mayor ug nga inig kaduol na sa piniliay mopdalin na lang siya para sa pagdagan ni Labella pagka mayor. O di ba kaha hinuon alang kang Michael Dino nga karon maoy Presidential Assistant for the Visayas. Kon ilang gihagoan og himug tarp si Rama, nagapasbot kini nga they consider him to be still very much in the running.

NG: Unsa pay laon nimong interpretation ani Nyor?

ND: Nga dunay gipilde si Rama nga wa pa gihapon makadawat sa iyang kapildihon. Ambot kon sa sabong ba o sa madyong kini niya na pilde. Hinuon di man tingali ni sugarol si Mike kay music ug drama may hilig niani.

NG: Kinsa kaha ning tawhana nga nagdumot ni Rama?

ND: Wa ko masayud nyor apan gatuo ko nga kadtong gataud ug “Binay Country” nga banner sa boundary sa mga dakbayan sa Talisay ug sa Cebu maoy nagpaluyo niani. Nga sa akong pagtuo mao say gapaluyo niadtong “Mike adik” nga graffiti sa mga poster ni Rama sa miaging election.

NG: Sa ato pa duot gyud diay sa bukog ang pagdumot ning maong tawhana kang Mike Rama.

ND: Maingon tang punga.

NG: Unsa pay lain kahang hinungdan, Nyor?

ND: Aw, basig gi-commission kadtong maong tarp sa usa ka Mike Rama memorabilia collector.

NG: Ha?

ND: Daghan bayang mga collector karon sa Cebu. Naay mangoliktag karaang plaka, karaang camera, mga stamp ug mga bisag unsa na lang. Daghan bayang nangita adtong “dancing mayor” election poster ni Mike. Basig dunay gapahimo niani nga gaplano nga mo collect unya niani isip usa ka political artifact sa atong dakbayan.