Unsay maayong balita ug kaayuhan nga mapaabot sa mga trabahante ugmang adlawa atul sa Labor Day celebration?
Dili kaha kutob lang sa ulog-ulog ngadto sa mga kawani ang mga pronouncements pagbisita ni Presidente Rodrigo Duterte diha IEC Pavilion sa Mabolo ning atong dakbayan?
Hinoon akong nahibaw-an nga dunay mga ahensiya sa gobyerno ang moabag ugmang adlawa sa Department of Labor and Employment (DOLE-7) sa daku’ng kalihukan.
Usa na niini ang taga Pag-Ibig Fund nga dunay dakung pakulo kay magpa-raffle matud pa og usa ka house and lot.
Ang taga DOLE-7 dunay medical/dental mission ug operation tuli. May local and overseas job fair.
Maayo man kining maong mga kalihukan pero ang nindot unta nga ang tanang trabahante makatagamtam na gyud og kaharuhay sa pagpuyo pinaagi sa dakung suweldo ug may security of tenure sa trabaho nga wa nay contractual status ug job order.
Hisgot tag suweldo, sa miaging tuig puwera buyag gihatagan ra gyud og 13 pesos nga umento ang mga kawani nga minimum wage earner.
Ambot kaha karon kung mas labaw pa ba sa 13 pesos nga increase nga akong tan-aw nagkagidlay man sab ang mga kompaniya tungod sa impact sa TRAIN law.
Gani sila si Philip Tan sa management side ug Grace Carreon sa Regional Tripartite Wages and Productivity Board (RTWPB) nga akong mga guests sa
“Dialogue On The Air” sa DYSS niadtong Sabado mitug-an nga dunay daghang mga kompaniya nga gustong ipatuman ang moratorium nga buot ipasabot wa say increase sa suholan kay apike gyud.
Miingon si Tan, consultant sab sa Mandaue Chamber nga kung tumanon ang gipangayong usbaw sa ALU-TUCP ug Cebu Labor Coalition nga sobra usa ka gatos ka pesos mapugos sila sa pagpanira.
Unsa may gihimo sa gobyerno ilabina sa taga Department of Agriculture (DA) aron mabarato ang atong mga pagkaon?
Kung way konkretong programa ang taga DA alang sa food security sa nasud maypag wagtangon ning opisinaha unya ilisan nalang og Department of Food Security nga bag-o na ang mga personnel nga dunay bag-ong idea pagpalambo sa atong pagkaon.
Paet kaayo ang farming industry sa nasud kay hangtud karon sagad traditional farming method gihapon nga gamit kalabaw unlike sa ubang nasud sa Japan gamit og mga tractor nga aircon pagtikad sa umahan.
Naingon ani kini tungod sa kainutil sa taga DA nga minus kaayog suporta sa mga mag-uuma.
* * *
Kining pagka-abusado sa ubang mga PUJ driver moresulta gyud sa disgrasya sa ilang mga pasahero.
Bisag na suweto na sila sa mga lugar nga no stopping ug no loading/unloading area apan mga gahi gyud kaayo’g ulo kay mohunong aron mo-pick up og pasahero.
Kung makabantay nga dakpon sa traffic enforcer mokalit dayon sa pag-aginod kay mosibat.
Niadtong Miyerkules sa hapon diha duol sa JY Square Lahug akoy nalooy sa pasahero nga si Josherie Dicdican Acibron, call center agent, sa ePERFORMAX kay maayong pagkahulog gikan sa iyang gisakyan nga PUJ biyahe sa Campo Lahug.
Ang biktima nga taga Minglanilla misakay sa maong PUJ gikan sa down town area paingon sa Lahug kay anaa nahimutang iyang gitrabahoan.
Tungod sa kadaut sa lawas sa biktima dili gyud intawon siya makabarug sa tunga-tunga sa kalsada ug gi-rescue sa taga ERUF.
Miingon ang biktima nga kuyog siya sa ubang pasahero nga mikanaug apan mi-aginod ang driver nga si Mayben Pasignasigna. hinungdan nga nahulog siya.
Ang depensa sa driver, wa siya makabantay sa iyang mga pasahero nga nanganaug. Torpe gyud! Driver nga kuwang sa seminar.
Duna pay kalaki niining ubang mga PUJ driver nga bisag naka go signal na ang traffic light labi pa diha sa P. Del Rosario Land Bank dili gyud mo-abante kay nagpaabot og mga pasahero. Wa gyu’y mga desiplina.
Mao nga kinahanglan gyud nga mang-hire kita og dugang mga traffic personnel kay magkinto gyud ning mga kanahan.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
