‘Steve Go maoy isunod pagtumba?’

Kinsa may gisaligan ug nganong bagsik man gihapon si Steve Go nga anak ni anhing Talisay City Councilor Emil Go bisag napriso karon sa Mandaue City Jail?

Si Steve nga nakuhaan og shabu sa iyang selda karong bag-o mao pay nasuko sa pulis ug nanghulga pa nga iyang patyon ang pulis.

Unsa man gyud ka impluwensiyado kining grupo ni Steve?

Kahambog ba ning kanahan nga nikalma naman gani silang Kerwin Espinoza, Baruk Alvaro ug uban pa.

Nangisog na si Steve kay nasayod siya nga maoy isunod pagtumba human sa iyang amahan?

Nabalaka ko nga dunay mahitabo niya sa oras nga ipagawas sa prisohan.
* * *

Pagka dakung insulto sa Dalaguete nga usa ka first class municipality unya gibutangan didto og hepe sa fire station nga way alamag.

Sa sunog niadtong Biyernes sa buntag sa lima ka mga stalls sa food lane sa Seawall sa Dalaguete napungot gyud ko samtang akoy nag-programa sa radyo kay way landline sa bombero sa Dalaguete.

Makapahi-ubos pa gyud kay ang fire truck nga iya sa Bureau of Fire Protection dugay nang naguba.

Unya pulis ang nag-drive sa fire truck nga iya sa LGU Dalaguete.

Asa man diay ang atong mga bombero sa Dalaguete? Nangatulog?

Unsa may nahimo sa fire station chief nga si Inspector Myla Selma?

Di sab ko motoo nga dili motabang si Mayor Ronald Allan Cesante sa mga pagkulang sa BFP Dalaguete.
* * *

Wa pa koy salig niining mga pamahayag sa taga Team Rama/Barug ug PDP Laban nga usa ray ilang kandidato pagka-mayor karong sunod tuig.

Ang nagdalag gubot sa plano ni Vice Mayor Edgardo Labella nga mag-mayor, mao si kanhi Mayor Michael Rama.

Si Rama akong tan-aw dili man gihapon maminaw nga mo-give way kang Labella bisag wa pa ma-clear sa expose sa presidente nga siya drug protector.

Ambot kung nakapaminaw ba sila sa akong on-air survey sa akong radio program nga gibiyaan og taga liog silang Tomas ug Mike kang Edgar?
* * *
Wa koy pagsupak nga ibalhin na sa buwan sa Agosto ang tingbukas sa klase inay sa atong naandan nga buwan sa Hunyo.

Unang rason, mas maayong mosubay nalang kita sa schedule sa tibuuk kalibutan nga Agosto ang naandan nga school opening aron may igong panahon ang mga sakop sa pamilya nga makabiyahe ug mobakasyon.

Nindot man gyud nga parehas ang atong schedule aron maka-focus kita sa pag-abi-abi kanila ingkaso kung silang taga gawas mamakasyon dinhi sa ato.

Segurado man sab ko nga mobawos na sila kanato pag-abi-abi kung kitay mangadto sa ilaha sa gawas.

Kung kabahin sa klima, nga magklase gihapon ta sa buwan sa Marso, Abril ug Mayo nga ting-init sa Pilipinas akong tan-aw, makaya man seguro gihapon.

Gawas niini, ang gitan-aw nga mapagan ang schedule sa mga estudyante panahon sa kuwaresma (Holy Week), di man sab seguro daku’ng isyu kanato kay naanad naman ta nga dunay mga okasyon nga mobalik gihapon sa klase human sa simana santa.

Apektado diyutay ang Flores De Mayo sa mga bata kay tibuuk buwan sa Mayo man gyud kining maong kalihukan.

Samtang kabahin sa atong eleksiyon nga itumong sa Mayo puwede man seguro natong i-uswag sa Hunyo or Hulyo nga mao nay bag-o natong ting-bakasyon.

Akong nahibaw-an kang Dr. Danilo Gudelosao sa Cebu City DepEd nga supak ang mga magtutudlo nga isibog sa Agosto ang opening sa klase kay dili gyud makaya ang kainit sa panahon nga magklase gihapon sa Marso, Abril ug Mayo kay wa gi-design ang atong mga classroom nga mabutangan og air-condition.

Nabalaka ang mga magtutudlo nga magsakit sila’g tuberculosis ug pneumonia.