P190.4M shabu nasakmit sa Cebu naggikan sa usa pa piniriso sa Bilibid – Sinas

Mga 18 kilos na shabu nasakmit sa usa ka drug bust sa Fatima Homes, Barangay Inayawan, Cebu City pasado ala una ka kaadlawon sa Domingo, Marso 3, 2019. |CDND Photo/Benjie Talisic

CEBU CITY, Philippines — Ang gibana-bana nga mo kabat sa  P190.4 million nga kantidad sa shabu nga nasakmit sa duha ka buwag nga operasyon sa kapulisan ganinang kaadlawon nahibaw-an nga naggikan sa Metro Manila ug gipayuhot sa isa ka piniriso sa National Bilibid Prison sa Muntinlupa City.

Pasado ala una sa kadlawon karong Domingo, Marso 3, na dakpan si Elymar Ancajas, 24, sa iyang gi rentahang balay sa Fatima Homes, Barangay Inayawan, Cebu City diin mokabat sa 18 ka kilo sa shabu ang nasakmit atol sa buy bust operation nga gi implementar sa kapulisan sa Pardo Police Station (Precinct 7) sa Cebu City Police Office (CCPO).

Matud ni Colonel Royina Garma, ang director sa CCPO, gi implementar sa Pardo police ang maong drug bust human ilang nasubay nga nag gikan san Barangay Cogon Pardo ang duha ka kilo nga shabu na nasakmit usab sa kapulisan sa  Provincial Intelligence Branch (PIB) didto sa lungsod sa Balamban niadtong Enero diin duha ka suspetsadong tigbaligya sa druga ang napatay.

Dugang pa ni Garma, si Ancajas, mga usa ka high value target,  ning angkon nga ang iyang agalon taga Barangay Casili sa lungsod sa Consolacion diin didto kini niya paga kuhaon ang druga ug mag paabot lang siya kon anus-a siya tawagan.

Ang Pardo police uban ni Major Regino Maramag nakig alayon dayon sa hepe sa Consolacion Police nga si Major Gerard Ace Pelare ug nahimong nag malamposon ang ilang plano human nga usa ka Jocelyn “Joy” Encila ang ilang naka transakyon sa pagpalit ug shabu.

Si Encila kasamtangan na admit sa Mendero Hospital sa maong lungsod apan ning baligya ra gihapon sa druga sa usa ka transakyon nga gipaagi ug text message.

Kantidad nga usa ka milyon ka pesos nga shabu ang nasabutang paliton kang Encila. Apan kay naa man siya sa hospital, iyang gi sugo ang iyang mga ginakanan nga si Marcial, 61,  og Marilyn, 51,  nga maoy mo hatag sa shabu sa dool mismo sa ilang gipuy-an nga subdivision didto sa Barangay Casili sa Consolacion.

Ang maong drug bust ning resulta sa pag pangronda sa gi rentahang panimalay sa mga Encila diin nakaplagan ang napulo ka kilo nga shabu pasado alas tres ganinang buntag.

Si Police Brigadair General Debold Sinas, ang pangulo sa Police Regional Office in Central Visayas (PRO-7), nagkanayon sa gihimong press conference kaganinang kadlawon nga mo kabat sa  190.4 milyones ka pesos ang tanang nasakmit  nga mga shabu sa bulag nga operasyon.

Matud pa heneral,  na suta nila nga ang supplier sa shabu usa ka piniriso sa New Bilibid Prison (NBP) nga si Rustico Ygot kinsa na priso sa kasong drugas.

Rustico Ygot |Photo furnished by Police Regional Office in Central Visayas (PRO-7)

Si Ygot hinigugma ni Jocelyn kinsa maoy nag pundo sa shabu dinhi sa Sugbu sa iyang gi abangan nga panimalay sa Green Valley Subdivision sa Barangay Casili.

Nahibaloan pud sa kapulisan nga ang kapuyo ni Ancajas igsoon diay ni Ygot.

Gihulagway sa kapulisan nga dako ang distribution network ni Encila dili lang sa Metro Cebu kon dili sa tibook Central Visayas.

Maoy lihokon karon sa kapulisan ang pag subay na usab kung diin gikan sa Metro Manila ang maong druga, matud pa ni Sinas.

Si Marcial ug Marilyn, human madakpan sa kapulisan, nang himakak nga apil sila sa illegal nga binuhatan sa ilang anak.

Apan dili mo tuo ang kapulisan nga wala silay nabitaw-an kay maayo ilang kahimtang sa panimuyo bisan si Marilyn manindahay ra ug halo halo samtang si Marcial nag tinda lang ug uling.  Ang magtiayon ni angkon nga kaila nila ang hinigugma ni Jocelyn nga piniriso sa Bilibid apan, matud nila, naa puy uyab nga langyaw ang ilang anak.

Si Ancajas  ning tug-an nga niadtong Desyembre siya nag sugod ug trabaho kang Encila ug paga suholan siya ug tres mil hangtud singko mil ka pesos kada “item” nga iyang matumod sa mga mamalit ni Jocelyn. /elb