Estudyante sa Grade 12 napalgang patay sulod sa pansayan sa ilang balay sa Talisay

DAKBAYAN SA SUGBU, Pilipinas — Bugnaw na ug ming-gahi ang lawas sa usa ka estudyante sa Grade 12 sulod sa pansayan o comfort room (CR) sa ilang panimalay ganinang kaadlawon,(Marso 12).

Si PO3 Glenn Besande, ang polis sa Talisay na naghawid sa maong kaso sa pagresponde sa dapit didto sa Canton Beach, Barangay Cansojong sa dakbayan sa Talisay, niingon na napalgan ang patay na lawas sa Grade 12 na estudyante sa iyang amahan mga pasado alas kwatro sa buntag.

Matod pa ni Besande gisusi karon nila kung walay foul play ang pagkamatay sa maong estudyante na gituohang nagkutlo sa iyang kinabuhi na gamit ang usa ka pisi sa sulod sa iyang CR.

Ang mga kauban na kaklase sa biktima nibutyag ni Besande na sa mga niaging semana talagsa na lang mosulod sa iyang klase ang biktima ug hilomon na kaayo kini siya.

Sa pakisusi ni Besande, ang amahan nahingawa kung asa na ang iyang anak kay wala kini sa iyang higdaanan adtong mga higayona.

Mao to na gipangita sa amahan kung hain na ang iyang anak ug didto niya nakit-i sud sa ilang pansayan na wala nay kinabuhi.

Gisusi pa sad nila ni Besande kung ngano na nikutlo sa iyang kinabuhi ang biktima.

Sa kadtong dunay mga problema ug gustong dunay makaistorya na makasabot nila 0 gusto lang na makapahungaw sa ilang gibati, tawaga lang ang Hopeline sa kaning mga numero sa telepono ug cellphone — (02) 804-4673; 0917-5584673; ug 2919 sa kadtong mga subscriber sa Globe ug TM. 

Mga eksperto na mental health care providers ang andam na maminaw kaninyo sa pikas linya sa Hopeline na usa ka 24/7 na proyekto sa Departamento sa Panglawas para sa mga depressive ug suicidal patients.

Makatawag pod sa Hopeline ang  kadtong mga tawo na nahingawa lang ug gustong makatabang sa ilang mga kabanay o hinigugma sa kinabuhi na dunay problema na giatubang.| dbs