Bugaw sa dan Colon, kauban nabalhog sa prisohan human kini na buy-bust sa Pasil

Mao kini si Arieza Nacar ug si Julius Kabalikan na nadakpan sa usa ka buy-bust sa Barangay Pasil sa Marso 12. |Benjie Talisic

Dakbayan sa Sugbu Pilipinas — Napakgang ang bugaw nga negosyante og shabu ganinang kaadlawon (Marso 12). Kini human madakpi sa usa ka buy-bust sa Barangay Pasil sa dakbayan sa Sugbu.

Ang nadakpan Mao si Arieza Nacar, 42, usa ka lumolopyo sa Barangay Pasil ug si Julius Kabalican, 43, usa ka lumolopyo sa dan T. Cavan, sa mao pod na barangay.

Matod pa ni Chief Inspector Kenneth Paul Albotra, hepe sa Presinto 6 o Presinto sa kapulisan sa San Nicolas, na ang mga nadakpan nakuhaan og walo ka pakete ug usa ka daku-daku na putos na gituohang shabu na gibanabana na balor og kinse mil ka pesos.

Si Albotra nagkanayon na ang maong operasyon batok kang Nacar gibuhat human kini gisumbong sa iyang mga silingan sa “Itug-an ni CD” diha sa Facebook.

Read more: Manupihay sa Calamba na buy-bust, P105K shabu nasakmit sa kapolisan

Atol sa buy bust operasyon batok kang Nacar naabtan usab si Kabalican didto sa sud sa balay ni Nacar.

Si Kabalikan mao ang gituohang tig hatudan og shabu ni Nacar ug didto siya sud sa balay adtong higayona kay nagpahatod si Nacar og dugang pang mga druga niya, matud pa ni Albotra.

Si Nacar na nakahinabi sa CDN Digital sa iyang selda sa Presinto sa Kapolisan sa San Nicolas niangkon nga ang una niyang panginabuhian mao ang pagpamugaw og mga babaye sa dan Colon sa mga lumalabay na parokyano didto.

Apan nagtuo ang kapolisan nga si Nacar maoy nagsupply og shabu sa mga babayeng bayaran nga iyang mga gipanghawiran panahon kon duna kiniy mga customer

Kasamtangang gitanggong una ang duha sa Presinto 6 samtang gihikay ang kaso batok sa mga suspetsado./dbs