Duol na pong Semana Santa ug ma-uso na usab ang daw kulto o ingnon ta kinulto nga debusyon. Linansangay diri, binunalay dito, milagro sa ubos, panambal sa ibabao.
Ang tao puno man gud sa kahadlok. Ang tanang hayop kon i-itsa mo sa dagat, mokapa-kapa kini ug mo-langoy paingon sa mabaw. Kay mananap man usab kita, natural ra unta nga kahibaw ta mo-langoy apan tungod sa kahadlok, daghan kanato ang di kamao molangoy.
Ang bata nga pipila pa lang ka buwan kon ibutang mo sa tubig mo-lutaw ug mo-langoy. Daghan na nga video ang mopakita niani. (Makahinumdom tingali mo sa cover sa album Nirvana nga “Never Mind.”) Tungod kini kay wala pa modulot sa unod sa bata ang “kahadlok.”
Importante ang kahadlok. Tungod sa kahadlok makalikay kitas daghang aksidente. Tungod usab niani maglikay kita sa mga butang nga makadaut kanato ug sa atong katilingban.
Apan ang kahadlok, ang ka way kasiguruan sa kinabuhi, maoy mopasulod kanato sa relihiyon, sa mga kawsa, sa mga kapunungan ug sa mga kulto ug okulto.
Ang kahadlok, ang walay kadangpan maoy kasagarang hinungdan nga magtukmod sa mga tao pag-intra ning maong mga klase sa pundok. Dakug purohan nga usa kini sa hinungdan dunay mga nisunod kang Tatay Loloy nga gi-ila sa iyang mga sumusunod nga “Dios Amahan.”
Gi-akusar karon si Casiano Tatay Loloy Apduhan pagpatay og usa ka 14 anyos nga lalake ug sa pagpriso sa usa ka babaye. Matud pa sa mga tinubdan, niadto pang tungatunga sa tuig 2012 nga gipatay ni Apduhan ang lalake isip “sacrifice” para makakuha silag bulawan. Ang babaye nga giingong iyang gitaguan may 33 anyos na ug gi-report nga missing mga lima ka tuig na ang milabay.
Didto sa iyang villa sa Balamban ang babaye nakit-an. Ug didto sab sa ilawm sa maong villa nakit-an ang patayng lawas sa gisakripisyo nga lalake.
Ngilngig ug kuyaw paminawon ang maong mga asoy apan mas man-limbawt imong balhibo kon makita mo ang dagway ning gitawag nilag “Tatay Loloy” kay di ka makatuo nga usa ka binuhat nga limpyu ug normal ang appearnce magtukod og ingon niani nga kulto.
Kon ang kahadlok ug ka kuwang sa impormasyon maoy hinungdan kon nganong daghang mosulod sa mga ingon niani nga pundok, unsa may hinungdan nganong may mangulo man og ingon niani nga kalihukan?
Ang kauhaw sa gahum ug bahandi maoy makapadasig sa pipila ka binuhat sa pagpangilad ug pagtukod og kulto. Hadlok man paminawon ang mga sugilanon kabahin sa ilang gipanghimo, dili layo niani ang mga corporasyon nga nangilad nato sa ilang produkto, sama sa mga skin whiteners ug food supplements. Sama sa mga kulto ilang gilingla ang mga tao nga ilang gipamaligya apil sa ilang mga panginahanglan.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
