NBI-7 dunay ‘bombshell’ batok sa taga HPG-7?

Kun unsa man kining “bombshell” sa National Bureau of Investigation (NBI) batok nilang Senior Supt. Romualdo Iglesia ug mga kaubanan sa Highway Patrol Group in Central Visayas (HPG-7) posible nga adto ra kini ipabuto inig trial proper sa husgado.

Ang akong nabalak-an nga mahuman na lang ang husay apan dili pa makabuto ang “bombshell” sa NBI nga maoy makapakonbinse unta sa korte nga angayng konbiktohon sila si Iglesia sa pag-ambush patay nilang manlalaban Noel Archival ug mga kaubanan didto sa Coro Dalaguete niadtong Feb. 18.

Si Inocencio Dela Cerna, abogado sa taga HPG-7, mi-underestimate sa mga ebedensiya sa NBI nga naduso didto sa Cebu Provincial Prosecutor’s Office.

Alang kaniya nga huyang gyud kaayo ug dili makapakonbikto sa iyang mga kliyente kay matud pa way direkta ug konkretong ebedensiya batok sa iyang mga kliyente.

Gikuwestiyon sa abogado kun nganong wala iapil sa taga-NBI ang pagduso sa piskaliya sa cartographic sketch sa mga suspetsado. Miinsister ang abogado nga wala gyud magkatukma ang mga drawing sa mga suspetsado sa lima ka mga respondents nga gipasakaan na og kasong multiple murder ug frustrated murder.

Apan ang taga-NBI mipasabot nga duna pa silay katungod sa pagduso og dugang mga ebedensiya samtang ubos pa sa preliminary investigation sa piskaliya ang kaso.

Pero akong sublion kun wa may ebedensiya ang taga NBI nganong did-an man sa kampo sa mga respondents ang Provincial Prosecutor’s Office sa pagpahigayon og preliminary investigation ug nagtinguha man sila nga ang Department of Justice Manila maoy ilang gusto nga paresolbahon sa kaso.

Alang nako, premature pa kaayo nga moingon si Dela Cerna nga ma-bias ang mga piskal dinhi sa Sugbo. Akong tan-aw, parehas ra man seguro og tan-aw ug tratamento ang mga piskal nila ni Dela Cerna ug anhing Archival nga pulos dunay kaila ug mga amigo sa prosecution tungod sa mga kaso nga ilang gihuptan.

Gani, pabor pa man seguro si Dela Cerna kay nahimo niyang mga kaalyado ang taga-provincial fiscal sa laing kontrobersiyal nga kasong kidnapping with homicide batok kang Bella Ruby Santos.

Kun inosente gyud sila sa kaso, nganong dili man ipaagi og normal process nga ang preliminary investigation himoon dinhi sa Sugbo ug kun may agrabiyado man sa findings, adto sa Department of Justice Manila ang final disposition nga ipaagi sa petition for review?

Gawas sa initial investigation sa piskaliya, dili seguro sila angayng mahadlok kun ibalhin ang venue sa trial on the merits sa husgado dinhi sa dakbayan sa Sugbo.

Nakasabot ko sa kabalaka ug kahadlok sa mga testigo panahon nga mobiyahe sa Argao inig bista.
Gawas pa sab, gasto kaayo sa gobyerno kun adto sa Argao Regional Trial Court ngan nga ang safehouse sa mga saksi anaa dinhi sa Siudad.

Dili gyud mawala ang kabalaka sa mga testigo ilabina nga ang usa sa mga respondents nga opisyal sa HPG-7 lumad nga taga-lungsod sa Argao nga si Senior Insp. Eduardo Mara.

In fairness sab ngadto ni Dela Cerna, legal counsel sa taga-HPG-7, konbinsido ko sa death threats nga iyang nadawat nga gipaagi sa tawag sa telepono ug text message.

Butang kini nga dili niya ibaliwa ug kinahanglang seryosohon kini sa atong kapolisan ug NBI sa dili pa uwahi ang tanan.

Maglaum ko nga wa nay mga abogado nga pamatyon tungod lang sa pagpanglaban og mga sensitibong kaso.

Atong ibutang sa utok nga dili gyud intawon makasugod ang husay sa husgado kun way abogado ug nabutang sa atong Konstitusyon nga ang bisan kinsang akusado may katungod sa pagpili og abogado nga makadepensa kaniya sa buruka.

* * *

Usa ko sa mitutok sa among live broadcast sa GMA-7 sa “Siete Palabras” nga nanukad didto sa Metropolitan Cathedral niadtong Biyernes Santo.

Puwera buyag, maayo gyud ang tanang mga namulong atubangan sa camera gikan sa pasiuna ni Rev. Msgr Ruben Labajo hangtud sa closing prayer ni Cebu Archbishop Jose Palma.

Ang nakanindot karon kay dili lang mga pari ang mga namulong kay giapil sila si retired Assistant Ombudsman for the Visayas Virginia Palanca Santiago nga naghisgot sa anti-corruption campaign nga gipasibo sa ikaduhang pulong nga “Sultihan Ko Ikaw Nga Karong Adlawa Mahiuban Ka Kanako Didto Sa Paraiso.”

Dili lang siya maayong abogada, prosecutor ug nakigbatok sa corruption, maayo sab diay siya nga evangelizer unya singer pa gyud.

Unya ang laing nakapahigmata kanako mao ang ikatulong pulong ni Department of Education in Central Visayas Director Carmelita Dulangon nga haom gyud kaayo kaniya ang topic nga “Babaye, Ania Ang Imong Anak, Anak Ania Ang Imong Inahan.”

Pagpalig-on sa relasyon sulod sa pamilya, pagkamatinabangon, panawagan sa mga retired teachers nga mopadayon sa pagpangalagad sa Simbahan ug labaw na ang panawagan sa mga kabataan ug mga anak ang pagpangga ngadto sa mga ginikanan.

Gikanta usab ni Director Dulangon ang nindot kaayong sonata nga “Mama” nga gipahaom sa iyang sambingay nga sugilon sa usa ka inahan nga nanalipod sa iyang anak nga hapit biktimahon sa iyang kapuyo nga ang kapuyo nadunggaban-patay ug napriso ang mapinanggaon nga inahan kinsa gusto sa anak nga pagawson sa prisohan.

Kumusta man tuod kita human sa atong pag-obserbar sa mga “Balaang mga Adlaw”? May kausaban na ba kita gikan sa pagka-way ayo ngadto na sa pagkabililhon sa atong pamilya ug sa uban?

Nabanhaw na ba kita uban ni Kristo? O nagpabiling patay ang atong paghigugma sa atong isigkaingon ug nagkuwang gihapon sa pagpakabana ngadto sa mga nagkinahanglan ug sa ubang mga butang ug isyu sa atong palibot?

Hinuon dili pa uwahi ang pamalandong kay puwede kining himoon bisan unsang orasa kay abli ang pultahan sa Ginoo 24/7.

Happy Easter!

TAGS: