With all due respect, gi-mislead si Governor Junjun Davide sa iyang mga tawo nga ipagawas gyud nga dili tinuod nga gikan sa Cebu Provincial Detention and Rehabilitation Center (CPDRC) ang shabu nga gikompra ni Jocelyn Pilapil Curia kinsa nadakpan sa kapolisan didto sa Liloan.
Kay ang tinuod suma pa ni Jail Warden Romeo Manansala sa akong interview niadtong Biyernes sa gabii, mikompirmar si Jocelyn atol sa ilang interrogation nga diha gyud sud sa CPDRC niya nakompra ang shabu gikan kang inmate Jino Pilapil.
Miingon si Manansala nga dunay laing duha ka pangan sa mga piniriso ang milutaw sa ilang imbestigasyon nga nalambgit sa illegal drug trade nga sila si Boboy Pilapil ug Alan Pilapil. Pero wa gyuy labot si Alan suma pa ni Manansala.
Si Manansala mitug-an nga nanghimakak sila si Jino Pilapil ug Boboy Pilapil taliwa nga mibarog si Jocelyn sa iyang pangangkon sa kapolisan. Mao nay giingon nga wa gyuy kawatan nga moangkon.
Nakasabot ko nga dili sila mokalawat sa deklarasyon ni Jocelyn nga gikan sa CPDRC ang shabu kay makapa-blackeye na sab kini sa Davide administration.
Public knowledge na kining palusot sa mga kontrabando sulod sa mga prisohan kay maayo kaayong mangita ug paagi ang mga binilanggo ug bisan ang mga modalaw.
Pero ang labing sayon nga paagi sa palusot mao ang paghaylo sa mga gwardiya ug dagkung kantidad aron motabang sa pagpalusot.
Niadtong si Alfredo Abella pa maoy warden sa panahon ni kanhi governor Gwendolyn Garcia, nakasaksi ko makadaghan nga ang mga gidili nga ipasulod adto sa luyong bahin sa building ipalusot nga ipa-agi sa gitawag ug “timba-timba” diin dunay kabo nga maoy sudlan nga giba-atan ug pisi nga bira-birahon sa mga piniriso unya ang mga gwardiya magpitok lang ang mga mata.
Gani dihay higayon kaniadto nga nagpa-backup ko ni Abella ug nadakpan gyud namo kadtong lalaki nga nakadala ug item gikan sa timba-timba sa CPDRC.
Kining palusot sa shabu diha sa CPDRC ug ubang jail facilities duha ray hinungdan. Una, natingal ang mga gwardiya samtang ang ikaduha nagtug-tog sa pansitan ang mga kanahan.
Hisgot naman gyud ko sa Cebu provincial jail, naluoy kaayo ko sa kahimtang sa mga magsakit nga mga binilanggo nga ma-admit sa Vicente Sotto Memorial Medical Center kon (VSMMC) kay kuwang sa dapat sa tambal.
Akong nahibaw-an gikan sa taga ospital nga ang mga piniriso nga way mga kabanay, makaloluoy gyud kaayo. Anaa man tuod ang mga jailers nga mobantay apan magpangawt sab sa ulo kay ma-diin-diin sa pagpangita ug ika-ayudang salapi alang sa tambal.
Akong gipa-abot kining maong problema ni warden Manansala ug iyang gi-angkon nga problema gyud kaayo kini kanila kay gani dunay mga higayon nga maka-kuot gyud sila sa ilang kaugalingong bulsa aron ipada sa ospital.
Miingon si Manansala nga usa ra gyud ka libo ang mapadala sa kooperatiba sa mga inmates nga ipa-palit ug tambal.
Makadangop man tuod sila sa Provincial Social Welfare and Development Office kon (PSWDO) ug sa Integrated Provincial Health Office (IPHO) apan menos sab kaayo ug tabang.
Midugang si Manansala nga sukad giwagtang ang Priority Development Assistance Fund (PDAF) sa mga kongresista nagsugod sab ang ilang kalbaryo sa mga piniriso nga ma-ospital.
Maglaum ko nga mapangitaan kini ug paagi nilang governor Davide.
Kung dili kaya sa Provincial Government ang pag-manage sa CPDRC nganong dili naman lang ihatag kini ngadto sa Bureau of Jail Management (BJMP)?
* * *
In fairness sa sikat nga “running priest” ug “environmentalist” nga si Fr. Robert Reyes kinsa maoy chairman sa National Coalition to Save the Trees, wa baya siya misupak nga ipaluka o pangtag-on na ang mga huyang nga century-old Acacia trees gikan sa dakbayan sa Naga paingon sa syudad sa Carcar.
Kay nakasabot man siya sa tumong ug tuyo sa mga ahensiya sa gobyerno nga mao ang paglikay sa disgrasya sa katawhan samtang nagbantaug kini sa kadalanan.
Ang kang Fr. Reyes nga kawsa nga protektahan ug ipareserbar ang mga puno-an nga medyo lig-on pa, way kalainan sa kagustohan sa kinabag-an.
Pero ambot lang kung gi-unsa pag-ila ug unsay mga equipment nga gigamit pagsuta kung “decayed or diseased acacia tree” ba ang pito nga anaa sa Naga samtang 77 ang anaa sa San Fernando.
Kay alang gud nako, maka-conclude lang ko nga “dunot ug masakiton” ang usa ka puno-an kana kung mikalit lang ug katumba ug naluka bisan kung way uwan ug way hangin sama sa nahitabo sa Balud San Fernando.
Kung tuyo gyud sa gobyerno ang pag-preserbar sa mga dagkung puno-an sa kahoy, nganong dili naman lang mag-abli ug bag-ong kalsada aron likayan ang mga acacia?
Ang mga eksperto nagkanayon nga dili gyud maayo nga tamnan ug kahoy ang kilid sa national road kay maguba sa gamot ug dili makabantok sa aspalto ug semento ngan nga dili na ma-igo direkta sa kainit sa adlaw tungod sa landong mugna sa mga puno-an sa kahoy.
Way plano ang taga DENR-7, DPWH-7 ug mga lokal nga opisyal nga i-suspenso una nila ang schedule sa pagputol sa mga puno-an ug seryosohon ang pag-abli ug bag-ong mga kalsada nianang mga dapita sa Naga-Carcar?
Alang nako, ha-um gyud kaayo nga mo-abli ug laing kalsada kay ang existing national road nga dunay mga Acacia gagmay ra kaayo ug buka ug ma-problema na sab kita sa traffic sa mosunod nga lima ka tuig tungod sa kadaghan na’ng mga sakyanan.
Related Stories:
Raid in CPDRC yields drug paraphernalia
Davide wants stricter security at CPDRC
DENR survey: 41 roadside trees in San Fernando pose hazard
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
