Gilungkab o gibulsa sa mga buaya?

Alang nako tanang opisyal ug  mga  kawani maoy mahug  nga suspect  pagka karon sa  giingong sunod-sunod   nga kasong  pagpanglungkad  sa  mga treasurer’s  offices  sa  kalungsuran  ug ang pinaka-uwahi sa dakbayan sa  Toledo.

Ang  Toledo incident medyo  gipahimuslan  gyud ang higayon ug gitayming  nga  bag-o  na  ang  hepe sa  kapolisan nga  si Supt. Ricky Delelis. Ma  to’y baptism of fire ni Delelis human pakyas ang  kanhi  hepe nga si  Chief Inspector Michael  Bastes pagbutang  ug  pulis sa opisina?

O ba  kaha tipik kadto  sa drama ang pag-ilis sa  hepe?

Malungkab ba gud ang vault sa Toledo Treasurer’s Office sa mga  interesado  kung  mihimo  pa  daan  ug  mga  preventive measures sila  si  Mayor John Henry Osmeña  ug ang  sikat  nga  dancing  collector nga si City Treasurer Ofelia  Oliva ngan nga  duna nay  mga previous incidents?  Sayawan ta  ni Ma’am aron  masulbad?

Imposible  kaayo nga  mahitabo  ang lungkab  sa Toledo kay nahitabo na baya sa  mga lungsud  sa  Compostela, Carmen, Sogod ug Pinamungajan.

Kinahanglang  tarungon  kini pag-imbistigar  sa  kapolisan ug National Bureau  of Investigation  (NBI) kay  basig  gi-suwitik  ang kwarta sa katawhan sa  mga  kurakot  nga   naglingkod.
Kanus-a  man  mohimo sa  ilang  papel  ang  taga  Commission On Audit kon  COA?

Wa  kaha  kini  gipalabas  nga  lungkab  human  nga  dunay  kwarta  niining  mga  LGU’s nga  gibulsa  sa mga buaya?

* * *

Nakapanglipagho ko sa  nahitabo sa tulo ka  mga tinun-an   sa junior high school sa  Calagasan National  High School bukirang  bahin sa Argao nga nanga-anod intawn sa  kusog  nga bul-og  sa  tubig-ulan niadtong Lunes sa  mga alas 4:30 sa  hapon.

Unang  report  nga kompiyansa  kaayo  ang  mga estudyante  nga didto gyud agi sa  spillway  nga  nasanapan na sa  tubig  diin 60 metros ang  gilay-on nga  labngon ug tabokon didto sa   may Barangay  Lower  Linut-od Argao.

Sumaa pa  sa akong  interbiyu ni PO3 Benjamin Heyrosaga nga unta sa ibabaw sa spillway  dunay foot bridge nga  maoy  pinakaluwas  nga agi-an sa mga  tawo.
Tungod  sa  kakusog  sa  tubig diritso  ug  ka-missing ang  mga bata  ug  pakyas ang  tanang  mipahigayon sa rescue efforts.

Apan sa  uwahing  report  kagahapon  pulos  patay na ang tulo ka  mga bata   nga nakit-an  nga sila  si  Carolyn Marson, 15 anyos, Grade 9 ug taga  Barangay  Canbantog  Argao;  Ritchel Ann Pasaje, 15 anyos, Grade 9 ug  taga  Canbantog  gihapon  ug si  Earl Kyle Sandido, 13  anyos, Grade 7 nga taga  Barangay  Linut-od.

Wa  sab gyu’y swerte  kadtong  tinun-an  sa Ramon Duterte Memorial Night High School  nga  si  William Gabijan, 16 anyos  nga   napa-ig patay human na-igo  sa kilat  sa ilang  gipuy-an diha  sa  Sitio Sambag 2 Barangay Guadalupe samtang  nalingaw  kini pagligo sa kusog  nga uwan niadtong ala 1:50 sa hapon pagka Lunes  gihapon.

Mao   nga  mabalaka  gyud ko  basta dunay  kusog  nga uwan ubanan  sa  kusog  nga dugdog ug  kilat.

Gani  mipahimangno kanato ang taga Philippine  Atmospheric Geophysical Astronomical Service  Administration (PAGASA)  nga kinahanglang  pagngon gyud  nato atong  mga cellular phones  kay delikado  kaayong dakpon sa  kilat  ug makapatay.

Bisan  ang  pag-bitbit  ug  mga  metallic objects  risgo gyud  kaayo. Pero  wa gyu’y  kumo  sa pag-ampo  sa Ginoo  nga  dili  kita itugyan  sa  mga  kaalautan.

* * *

Alisto   kaayo  karon nga   nakahimo ug  legal  maneuver ang  mga suspetsadong  opisyal sa Highway Patrol Group (HPG-7)   sa  pag-ambush  patay  nilang  Atty. Noel  Archival  ug  mga kauban aron mapugngan  ang resolusyon ni Acting Provincial Prosecutor Jesus  Rodrigo Tagaan nga  ipangtaral  sila sa  hukmanan sa  kasong multiple  murder  ug sa  kasong  frustrated  murder.

Sila Police Senior Supt. Romualdo Iglesia, Senior Inspector Joselito  Lerion ug PO1 Alex Bacani  uban sa  ilang  mga  abogado   miduso  na  ug  motion   for  partial reconsideration, inhibition ni piskal  Tagaan  ug  ipa-defer ang filing sa information  sa  husgado  sa  ilang  mga  kaso.

Si Iglesia  mikuha  sab  ug  Makati  Manila based  lawyer ug  gani  miduso na ug  formal entry of  appearance sa mga  kaso niya  nga  si  Atty. Joselito C. Frial  sa  J.C. Frial and  Associates Law Office.
In fairness  nilang  Iglesia ilaha   kining  katungod  ug  kini maoy haom ug tukma sama sa akong  giingon kay tipik kini  ug  kabahin sa due  process.

Pero  hinaut  nga morespeto  sila sa mga  lagda  nga  dili  magpasulabi ug  langay-langay  sa  kaso ug  kinahanglang  ipa-resolbar  kini ug  laing  Sugbuanong  piskal ug dili   taga Manila kay basig ma hawshaw ning  maong  kaso. Patas  lang gyud!