Simbako intawn labngon ug pito ka lawd, nga duna pay laing susamang hitabo sa Catmon niadtong Domingo sa hapon nga usa ka drug addict nga amahan ang mi-unay ug dunggab patay sa iyang tulo ka mga anghel ug sa iyang ugangan sa wa pa siya maghikog-patay.
Ang tawong addict dili na gyud makapinsar ug tarong alang sa iyang pamilya.
Kung ang iyang pag-selos sa asawa maoy motibo sa dugoong krimen pero naggumikan gihapon ang tanan sa pagka-gumon niya sa drugas.
Paeta gyud kung gipaka-ginoo na ang drugas sa mga tawong pamilyado. Unsa may ugma intawn sa pamilya?
Bantayanan gyud kaayo karon sa pamilya ug sa taga gobyerno ang inahan sa mga bata nga si Jumelyn Figues samtang magsud-ong siya sa mga minatay.
* * *
Nagkita mi kagahapon ni dismissed MTCC Judge Rosabella Tormis sa IBP building kay nag-follow-up siya sa iyang record sa MCLE kon Mandatory Continuing Legal Education isip usa ka abogada.
Sa akong tan-aw, nakabangon na si Judge Tormis gikan nga gitangtang sa Korte Suprema.
Gani sa among kukabildo kagahapon naghinay-hinay siya pag-establisar sa iyang opisina aron siya maka-practice sa iyang law profession.
Apan wa malikayi ang pagpadayag ni Judge Tormis sa pagmahay-mahay gihapon kang Court Administrator Jose Midas Marquez kay gipadayon ang iyang disbarment proceedings.
Unya ang nakaporke, siya ray gi-single out sa disbarment proceedings nilang upat ka mga MTCC Judges nga gipangtang-tang.
Miingon si Judge Tormis nga Ginoo nalay mag-igo kay total way mogamot natong tanan niining kalibutana.
Iyang gibarugan nga wa gyud siya’y sala ug limpyo iyang konsensiya sa mga pasangil bisan niadtong marriage scam.
Mitug-an usab si Judge Tormis nga nagkita sila dinhi sa Sugbo karong bag-o kang dismissed Supreme Court Chief Justice Renato Corona ug nagka-istorya sila isip mga biktima sa inhustisya.
Si Corona gitaktak pinaagi sa impeachment proceedings sa Senado samtang si Judge Tormis gipalagpot sa Korte Suprema.
* * *
Wa na gyud maka-agwanta si Provincial Prosecutor Pepita Jane Petralba isip taga Alegria niining padayong oil exploration sa ilang lungsod kay way transparency ang nagtikad nga contractor o consortium.
Kagahapon midangop na gyud siya sa office of the governor kay nabalaka siya sa epekto unya way kopya si Mayor Verna Magallon ug Governor Davide sa Memorandum of Agreement tali sa Department of Energy ug sa consortium.
Matud ni Petralba nga naglibog sila sa mga personnel sa contractor nga mga Insik kay lain-laing tawo ang mo-atubang kanila.
Gikabalak-an nga madaut ang ilang mga kalsada nga agi-an sa mga dagkong equipment ug butang kini nga angay’ng tutukan sa taga gobyerno.
* * *
Mosamot na gyud ka aslom ang relasyon ni Cebu City Mayor Michael Rama ug Labangon Barangay Captain Victor Buendia kay gitinuod gyud sa kapitan nga dili i-dismiss iyang reklamo didto sa Malacañang batok sa mayor.
Kini human iya nang gibayran ang P1,500.00 nga filing fee sa Malacañang ug matud pa sa kapitan nga taud-taud na niyang gibayran.
Nagpasabot nga intresado gyud si kapitan Buendia nga motaral sa mayor sa kasong abuse of authority ug kalapasan sa batakang balaud human gipaguba ang gipanindot nga center island sa Labangon.
Namahayag ang kapitan nga gigukod siya ni Rama tungod sa politika kay wa siya mosuporta sa mayor sa miaging eleksiyon.
In fairness ni mayor Rama, gipa-guba kadto tungod kay naghatag ug risgo sa mga motorista.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
