Ang Renee maoy female variation sa French nga Rene. Ang Rene gikan sa Latin nga Renatus. Ang meaning sa Renatus, born again.
Sa Pilipinas wala kaayoy inila nga babae nga gihinganlag Renee. Diha koy nakaila nga estudyante sa IS niadto nga Renee ang pangalan ug diha usab kadtoy usa ka PR officer nga may susamamng pangalan. Apan wala kini sila mahimong public figures.
Mas daghang inila nga Rene sa Pilipinas. Naa si Rene Salud nga usa ka beautician, Rene Espina nga politico ug si anhing Rene Requiestas nga usa ka komedyante.
Ang una natong nasugatan nga Rene mao tingali ang Philosopher nga si Rene Descartes. Iya kadtong mugna ang –“je pense, donc je suis.” Ug kay lisud man lagi litukon ang Frances mas napatik ang Latin niani nga “Cogito Ergo Sum.” Gihubad kini sa Ininglis sa atong textbook isip “I think, therefore I am.” Pero ang mas maayo nga pag Iniglis niani sa French ni Descartes mao ang “I am thinking, therefore I exist.”
Dihay Rene nga babae. Ang model ug artista nga si Rene Russo.
Si Renee Zellweger na tingali ang pinaka-inilang Renee karon sa kalibutan. Una ko siyang nakit-an sa pelikulang “Jerry Maguire” ug dayon sa musical nga “Chicago.” Pero ang pinaka-sikat niya nga papel mao ang pagka Bridget Jones sa “Bridget Jones’ Diary.”
Murag nakalimot na ang kalibutan ni Ms. Zellweger hangtud nga mibutho siya sa Elle’s 21st annual Women in Hollywood Awards sa Beverly Hills niadtong miaging pipila ka mga adlaw. Nagka-gubot ang social media kay nausab na ang iyang panagway.
Pagsugod niya sa pelikula usa siya ka 27 anyos nga mahimong padad-on sa papel sa usa ka 19 anyos. Karon 45 anyos na siya nga mahimong padad-on sa papel sa usa ka 60 anyos nga minimal ra and make-up.
Nisamot og kadaku ang balita kabahin sa kausaban sa nawng ni Zellweger dihang nangasuko ang mga feminist ug mga politically correct nga mga tao. Nasuko sila sa mga nanaut sa appearance karon ni Zellweger.
Apan dili man gud kini kalikayan kon public figure ka. Ang pamati sa mga tao nga ilaha ka ug nga may katungod sila pag dayg ug pag panaway sa tanang butang nga may kalabutan kanimo. Ug nganong masuko man kining mga politically correct kon mo komentaryo kining mga movie fans? Igo ra man silang mipadayag sa ilang hunahuna.
Kay matud pa ni Descartes, “I am thinking, therefore I exist.” Ang gihunahuna lang nila hinuon karon kon unsay mga sayop sa gituohang mga plastic surgery nga gidapat sa nawng ni Zellweger.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
