Gisugat ko og dili maayong balita kagahapon sa mga pasado ala una sa hapon pag-abot nako sa sementeryo sa Sta. Monica Parish sa Barangay Cawayan, Dalaguete samtang paingon ko nga moduaw sa lubong sa akong mga ginikanan ug mga igsoon.
Sila si PO2 Christopher Romarate sa Dalaguete Police nga maoy gipabantay sa among parokya mitug-an kanako nga dunay daku’ng krimen nga nahitabo sa among lungsod diin ang biktima sa pagdunggab-patay lumad nga taga amo sa Casay, Dalaguete unya acting principal sa Barangay Malones ug Barangay Panas.
Ang biktima mao si Raul Beceril Paz, 42 anyos, lumad nga taga Sitio Angas, barangay Casay nga naminyo didto sa barangay Maloray sikbit sa Mantalongon.
Segun pa kang PO2 Romarate nga nahitabo ang pagdunggab-patay sa acting principal kagahapon sa alas dos sa kadlawon (Kalagkalag) sa barangay Maloray.
Matud pa, ang biktima hubog kaayo kay fiesta didto sa Maloray sa ilang segundo patron.
Misibat ang responsable sa krimen nga si Crispin Buenavente Tangpus, 50 anyos unya kadugo sa kapitan didto.
Sa pagsuwat ning maong lindog, paingon pa nga ipa-autopsy ang patay’ng lawas sa biktima.
Puwerte’ng luoya gyud sa tulo ka mga anak sa biktima kay gagmay pa ug anaa pas elementarya sa amo sa Casay.
Maglaom ko nga dili mainutil ang kapolisan sa Dalaguete pagdakop sa responsable aron kahatagan og hustisya ang kabanay sa biktima.
* * *
Wa pa gyud intawon masulbad sa taga gobyerno ang yangongo sa mga motorista nga magbiyahian sa habagatang bahin sa lalawigan sa Sugbo sa mga dapit nga risgo kaayo.
Gawas sa mga dagko ug karaang mga punoan sa kahoy nga anaa pa daplin sa national highway, dunay poste nga semento nga iya sa Visayan Electric Company (VECO) diha sa may Langtad, Naga nga hapit anaa sa tunga sa kalsada.
Unsa may gidugayan sa taga VECO ug sa Naga City government pagbalhin sa maong poste? Unya na ibalhin kung dunay daghang mga bangga ug dunay daghang mapatay dihang dapita?
Ingon ani kahuyang ang public-private partnership (PPP) sa Naga City ug VECO?
Gawas ning maong problema diha sa Langtad, Naga, nakapanglipagho sab ko pag-agi nako diha sa Simala, Sibonga kay kadtong naputol nga tulay atol sa bagyo nga giilisan og puthaw o steel bridge, wa gyud gihapon hatagi’g pagtagad sa Sibonga municipal government ug taga Department of Public Works and Highways (DPWH) nga masapawan og aspalto ang puthaw aron likayan ang disgrasya diha’ng dapita.
Daghan na’ng mga nag-motor diha nga nangalamba tungod sa kadangog. Usa sa mga biktima diha among kauban sa GMA nga hapit usa ka oras wa kabangon.
Kung maglisod ang local government unit (LGU) sa Sibonga paglatos sa DPWH, di man sab seguro maayo nga mangyugpos lang si Gov. Junjun Davide.
Tagda intawon ninyo kining maong mga problema, Mr. Governor!
* * *
Alang lagi nako, dili na maglisod ang kapolisan pagsulbad sa brutal nga pagpatay kang Agnelen Ego-egoan Uy.
With all due respect, sa sinugdanan pa daan niining maong krimen, dako nako’g pagtuo sa bana nga si Wayne Christopher Uy nga may papel sa krimen sa iyang asawa.
Abir, unsa may iyang tubag niining mga pamahayag sa iyang mga trabahante nga kuyog nilag sakay ug nakit-an ang bana nga nagbitbit sa gi-tape sa biktima?
Unsa man ang iyang depensa nga nakit-an siya’ng mikulata sa iyang asawa?
Gawas niining maong mga deklarasyon, sukwahi gyud kaayo ang iyang actuation isip bana, nga wa mosukol sa mga lalaki nga iyang giingon nga miti-on kanilang magtiayon unya kuno mikanaog siya sa sakyanan ug mikaratel pagdagan taliwa nga gidagit iyang asawa ug gi-carnap ilang sakyanan.
Ang bana nga tarong, andam pakamatyan ang asawa bisag way maayong relasyon.
Akong klarohon: lisod gyud tohoan ang bana ug mabasa nako kung unsa gyud ang iyang kalagot sa iyang asawa nga wa na makig-uban kaniya.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
