Wa nako matingala dihang gianunsiyo ni Gov. Junjun Davide nga iyang ipataktak sa serbisyo pinaagi sa pagputol na sa kontrata isip job order employee si Dra. Agnes Demano, ang kontrobersiyal nga doctor sa Minglanilla District Hospital nga wa motabang sa 1 year old kapin nga bata ug sa ginikanan nga maoy hinungdan sa kamatayon sa anghel.
Ang pagtaktak sa serbisyo maoy pang-damage control ug pahumot nilang Governor Davide.
Akong nahibaw-an gikan sa mga tinubdan nga miangkon si Dra. Demano sa pasangil sa ginikanan.
Dihang giimbistigahan siya, wa na gyud kini magtingog dihang gipakonsensiya pag-ayo sa iyang mga kaubang doctor sa iyang wa pagtabang nga unta duna may libreng tambal ug dextrose.
Apan in fairness ngadto kang Dra. Demano, wa kaha kini magrebelde sa Davide administration kay sige lang og ka late iyang suweldo?
Wa kaha ni siya pasaligi nga himuong regular nga trabahante unya gibalibaran sa politiko?
Kung palawuman gyud pag-analisar ang nahitabo, dili lang si Dra. Cynthia Genesolango, IPHO Officer, ang maigo sa command responsibility. Maigo sab intawon si Governor Junjun.
Abir, asa man to ang pasalig sa Davide administration nga ipang-hire na ang mga doctor isip regular status aron paghatag og labing nindot nga medical care ngadto sa mga Sugbuanon?
Kaniadto puwerte nilang nakasaway sa panahon ni Gwen nga gi-outsource ang hiring sa mga doctor. Unsa naman kini karon nga ila mang gikopya?
* * *
A kong nahibaw-an nga gilisud-lisod karon pag-ayo sa Davide administration kadtong mga department heads nga makaasumir na pagbalik sa ilang katungdanan human naka-serve na sa ilang 1 year suspension tungod niadtong kontrobersiyal nga Balili property.
Sila si Provincial Treasurer Roy Salubre ug Assistant Provincial Engineer Eulogio Pelayre, kinsa kanhi OIC sa Provincial Engineering’s Office sa panahon ni Gwen, buot na gyud untang mamalik sa puwesto.
Apan gi-technical sila pag-ayo ni Provincial Attorney Orvi Ortega.
Si Salubre nga akong natagbuan sa Kapitolyo niadtong miaging semana mipadayag sa iyang kasinatian pagpakigtagbo kang Ortega.
Matud niya nga gipangayoan sila og writ of execution gikan sa Court of Appeals bahin sa 1 year suspension nalang gikan sa penalty nga dismissal from service nga unang silot nga gipatuman sa Ombudsman.
Dili sa ingon nga milaban ko ni Salubre, apan dili seguro angay’ng pugngan sa Davide administration ang mga lawful orders.
Kung dili makaasumir sa ilang puwesto, delikado baya nga maigo sila sa dereliction of duty.
Dili na magpakaaron ingnong limpiyo ang mga nagpalibot ni Davide kay otro sab silang nasupalpal niadtong Black Pearl Security Agency ug ingon man kining kontrata pagpalit sa mga heavy equipment.
Karon pa ko nakadungog og public bidding nga ang highest bidder maoy gipadaog.
Pag-sure mo tanan diha, Gov!
* * *
Kaniadto nga hapit moabot og usa ka libo ang presyo sa 11 kilograms sa liquefied petroleum gas (LPG), misuway gyud ko paggamit sa portable stove nga paslakan og canister nga ang sulod pure nga butane gas pagluto sa among mga pagkaon.
Ngan nga bag-o pa ang stove, layo ra gyud sa disgrasya unya pun-an pa nga ang gipaslak nga canister pulos sab bag-o unya butane gas gyud ug dili LPG.
Pero dangtan og mga tulo ngadto sa lima ka buwan, nakat-on mi paggamit og mga refilled nga canister nga ang sulod LPG kay gawas nga medyo barato unya halos tanang tindahan dunay display.
Apan dihang daryot mi mangasunog sa bay kay niulbo among stove tungod sa hungaw nga canister, nakaingon ko sa akong kaugalingon nga usab pay maglayog. Sukad niadto wa na gyud mi nigamit sa butane gas ug nibalik mi sa stove nga LPG.
Dugay na nakong gipaabot kining maong isyu sa mga kadagkoan sa Bureau of Fire Protection (BFP) ang ka risgo sa paggamit og mga refilled canister.
Nipasalig ang taga BFP nga ila kining aksiyonan uban sa pagpangayo’g tabang sa mga local government units.
Diha na sila nangusog sa kampanya pagkahitabo niadtong pag-ulbo sa usa ka refilling station sa butane canister nga misangko sa pagkapaso ug pagkaangol sa mga trabahante.
Apan nakatawa lang ko sa mga text messages nga akong nadawat gikan sa Lorega kay bisag dunay pahimangno ang taga BFP ingon man ang taga Department of Energy (DOE) nga risgo gyud kaayo ang paggamit og mga canisters nga ang sulod LPG, ang kampo sa BO-PK unang nanghatag niini ngadto sa mga nagpuyo sa maong barangay.
Ang nakaalegre karon kay gawas nga may canister nga “Type O” or BO-PK, duna say mga canisters ug mga stove nga may hulagway ni Mayor Michael Rama ug ang iyang campaign slogan.
In fairness sa mayor, puwerte intawong pangugat sa pagpanghimakak ug nagtuo nga binuhatan kini sa kampo sa BO-PK aron apilon siya pagdaot.
Alang nako, kung inosente gyud si Mayor Rama sa pagpahimo, kinahanglang seryosohon gyud niya ang pagpangsakmit sa mga canisters nga LPG bisag may dagway niya.
Ang nakadaot man gud niining atong mga opisyales unya na mohimo’g seryosong lakang kung duna nay mabiktima.
In fairness sa mga nagnegosyo niini, nakasabot gyud ko sa negatibong epekto sa ilang negosyo sa pagpangsakmit sa Cebu City government.
Dili ba puwede’ng himuon sa gobyerno nga dunay grupo sa mga eksperto sa DOE nga maoy mosubay sa pagkadekalidad sa mga canisters ug sa gisulod? Butang kini nga angay’ng i-dialogue.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
