Kumusta man diay ang liderato ni Dr. Cynthia Genesolango isip maoy labing dako sa tanang mga doktor sa mga pampublikong hospital sa lalawigan sa Sugbo?
Ngan nga siya maoy nangulo sa Integrated Provincial Health Office (IPHO), siya maoy dunay over-all supervisory and control sa tanang mga district hospitals ug sa duha ka mga provincial hospitals.
Nagmata lang diay og buntag si Gov. Junjun Davide sa panahon nga dunay kuwestiyonableng kamatayon sa mga pasyente sa atong mga hospital?
Kung di makabasa sa mantalaan ang gobernador, puwerte’ng blangkoha gyud sa mga panghitabo.
Akong nasabtan sa gipadayag sa gobernador nga way proper coordination ang mga chief of hospitals ngadto kang Dr. Genosolango.
Nganong misangko man intawon nga nangunay na si Governor Junjun pag-isyu’g direktiba ngadto sa mga chief of hospitals nga mo-report gyud dayon kung dunay mangamatay apil na ang pagpangayog listahan sa mga nangamatay gikan sa buwan sa Enero?
Timailhan ba kini sa huyang nga liderato ni Dr. Genesolango?
Nagpasabot ba kini nga gahi na kaayog ulo ning mga doktor sa kalungsuran kay di man kaya sa IPHO pagdisiplina?
Nganong sa panahon ni Dr. Cristina Giango, magkinto man lagi ang mga doktor?
Kung may respeto ang mga doktor ngadtong Dr. Giango, way rason nga molikoy sila kang Dr. Genesolango.
Unsa man ka tinuod ang akong nadawat gikan sa pipila ka mga doktor nga silang majority mas ganahan silang Dr. Giango kay kang Dr. Genesolango? Ang rason: perme’ng nakatutok si Giango sa performance sa iyang mga doktor unya perme’ng anaa sa opisina.
Ang ubang doktor mirason kay matud pa dili ilang administrasyon.
Pero ang ako ba, ngan nga nanulod ni sila sa public service, dili na unta igsapayan kung kinsay ilang labaw ug kinsay gobernador.
Kung di kauyon sa ilang labaw, nganong di man lang mang-resign kay sa iangin ang panerbisyo sa katawhan?
* * *
Wa ko mag-expect ni Gov. Junjun Davide nga sa iyang ka ligdong ug katarong, nagpadala niining iyang mga kaalyado nga maoy makadaot kaniya.
Porbida, Gov, wa gyud nimo mabadlong si Atty. Mark Tolentino, provincial administrator, bahin sa iyang gipagawas nga memorandum nga nagdili na sa tanang opisyal ug mga kawani sa Kapitolyo paghatag og mga information ug mga dokumento nga kinahanglanon namong mga sakop sa media gawas kung may mga pagtugot sa mga department heads?
Ayaw kog ingna nga makabuot-buot ang mga department heads pag-release kung way pagtugot ninyong taga executive?
Asa man gud ning inyong gipanghambog nga transparency ug public accountability?
Akong tan-aw niini, wa nay mga department heads sa Kapitolyo nga patambungon sa mga media forum ilabina sa broadcast media sama sa akong programang “Dialogue On The Air” sa dySS.
Magpahimangno lang ko sa mga opisyales ug mga kawani sa Kapitolyo nga magtarong og tubag bisag kinsay manawag kay basig giderekta pag-on the air sa radio anchor nga mo-boomerang gihapon ni Governor Davide.
Posible baya nga mahitabo ning ingon ani kay kung magpaila nga taga media ang nanawag, dili na maningog ug wa nay mapupo nga impormasyon ang mga naminaw.
* * *
Haskang hasola gyud sa problema sa traffic sa lungsod sa Minglanilla karong mga panahona.
Makasapot ug makalangay kaayo sa tanang mga pasahero ug mga motorista. Kanus-a man gyud mahuman ang pag-ayo sa kontraktor nga QM Builders?
Mangambot lang ko kung matapos ba gyud ang pag-ayo karong Disyembre 15 nga maoy gihatag nga tagal ngadto sa kontraktor sa taga Department of Public Works and Highways (DPWH).
Pila man gud nang ipabayad nga danyos sa taga DPWH sa kontraktor kung di makatuman sa deadline? Basig hulga ra sab ni aron dili mabasol silang taga DPWH nga maoy nagpatuman sa proyekto.
Mao ni ang nakadaot sa atong mga politiko kay kung di magsingabot ang eleksiyon, dili sab mopa-trabaho sa road repair.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
