Daghang symbol ang pasko. Ana ang Belen, nga Kinatsila sa Bethlehem nga mopakita sa batang Hesus uban sa iyang ginikanan, mga karnero, mga tigbantay sa karnero, baka ug uban hayop ug gibisita sila sa tulo ka hari nga giingong gikan pa sa silangan.
Ang laing symbol sa pasko mao ang lantern. Pasidungog kini sa giingong dakong bituon nga mitumaw sa kalangitan pagkatao sa batang Hesus ug nga giingong maoy gagiya sa tulo ka hari ngadto sa pasungan. Ang naka nindut lang sa local nga parol kay through the years nakakuha kinig Pinoy character.
Anaa usab ang Christmas tree nga giingong may pagan origin. Maurag dili tingay mauyon ang mga environmentalist kon ang orig nga concept niani maoy tumanon kay daghan mang kahoy ang ma tumba. Hinuon creative naman kayo ang mga taga dakbayan kon diin dili kayo daghan ang kahoy. Duna nay Christmas tree nga hinimo sa styrofoam. Duna usay sa plastic ug ingon man sa mga mineral water bottles.
Anaa usab si Santa Claus nga matud pas mga bugalbugalon mao ray santa nga lalake. Giingon nga nagsugod ang legend ni Santa Claus sa Iceland, diin ang unang trabaho niani mao ang pag panghasi sa mga bata. Dili pa kuno pula ang biste niani. Matud pas naka istorya ko nga taga Iceland ang Coca Cola na kunoy ga sinina kaniya og pula.
Ang pinakahanggaw nga symbol sa pasko mao ang snow. Daghan bayang Kristyanos nga nasud nga walay snow inig December. Apan mao naman kini naandan. Sa buhi pa ang akong apohan nga babaye butangan niyag puti nga balas ang among Belen para maurag snow kunohay. Mao nga kada buntag adunay tae sa iring ang among Belen niadto kay gusto man diay kaayo malibang ang iring sa balas.
Apan karon basig duna nay bag-ong symbol sa Christmas ang mobutho ug mao kini ang mga mall. Ang SM, Robinson ug Gaisano galumbag panukod og mga mall nga mosuyop sa 13th month pay sa mga trabahante.
Di man nuon kini tantong ngil-ad. Kay maayo na lang kining duna kitay mga dagkong kapasilongan sa panahon sa init ug sa kusog nga uwan.
Sa akong bahin hinuon, duha ra man ka tindahan sa mall ang makalipay nako: CDR King ug Booksale. Kon wala niani ang usa ka mall tagsa ra ako moduaw niani.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
