May gahom ang Ombudsman pagpakgang sa mga kuwestiyonable

By: Lloyd Suarez December 22,2015 - 11:42 PM

Kung tinarong gyud ning liderato ni Gov. Junjun Davide diha sa Kapitolyo, nganong dili man niya ipakanselar ang kontrata tali sa Probinsiya sa Sugbo ug ConEquip nga nabulit na man kini sa kontrobersiya?

Nganong morisgo man gyud ang taga Kapitolyo, ilabina si Provincial Administrator Mark Tolentino kinsa chairman sa Bids and Awards Committee (BAC), pagpadayon ngadto sa taga ConEquip nga duna may laing barato nga supplier nga mao ang Mighty Brothers Heavy Equipment (MBHE) nga makahatag sa susamang de kalidad nga unit nga brand-new Howo dumptruck?

Ang Howo dumptruck usa sa atong paliton nga heavy equipment. Sa presyo sa ConEquip, tag P5.1 million matag usa, samtang sa (MBHE) tag P2.6 million lang.

Dili ba puwede nga ipaagi nalang sa negotiated contract ngadto sa (MBHE) ang pag-supply sa brand new Howo dumptruck?

Ambot lang kung seryoso ba gyud si Governor Davide sa iyang pag-isyu’g statement nga may salig siya o may “trust and confidence” sa (BAC) Capitol?

Wa kaha lokuha si Governor Davide sa iyang mga tawo nga gipatuo nga way trampas ang transaction taliwa nga nabisto na nga ang ConEquip ug MBHE susama ra’g telephone number ug address?

Pagmata intawon, Governor.

Kagahapon akong giteksan si Atty. Maria Corazon Naraja, tigpamaba sa Ombudsman Visayas ug alter ego ni Deputy Ombudsman Paul Elmer Clemente, kung puwede ba nilang mapugngan kining maong transaksiyon sa Kapitolyo ngan nga ang Ombudsman maoy protector sa katawhan ug sa atong buhis.

Apan wa gyud ko tubaga ni Atty. Naraja bahin sa isyu.

Unya na molihok ang Ombudsman kung ma-consummated ang krimen?

* * *

Alkiki gyud kadtong mga badlungon nga mapriso sa atong mga police stations sa ginagmay’ng mga kaso kay matanggong gyud og taas-taas nga higayon.

Sirado ang atong mga opisina sa piskaliya ug mga korte sugod ugma sa hapon kay Pasko na.

Sa Lunes, petsa 28, mangabli man tuod apan kuli gihapong makapiyansa kay apiki sa oras. Pun-an pa nga inig petsa 29, tunga ra sab sa adlaw ang trabaho kay mangandam sa bag-ong tuig.

Buot ipasabot nga sa petsa 4 pa gyud sa Enero 2016 ma-process ang pagpiyansa.

So, ang akong mensahe, magbinut-an gyud ang tanan aron way mamasko ug mang-anyo sa prisohan.

* * *

Sa tanang mga ahensiya sa gobyerno, ang atong mga simple’ng kawani sa prosecution service ubos sa Department of Justice sama sa mga piskal ug mga support staff maoy magpasko nga puwerte’ng laaya ug puwerte’ng mingawa.

Kini tungod kay wa gyud silay Christmas bonus. Ultimo si Acting DOJ Secretary Alfred Caquioa nagkabuang sa pagpanubag kanako bahin sa bonus sa iyang mga kawani.

Gibasol sa mga kawani si kanhi DOJ secretary Leila De Lima kay giundang niya ang pagpanghatag og bonus sukad niadtong Disyembre sa tuig 2013 human sa kusog nga linog sa Bohol nga nakaapektar dinhi sa Sugbo ug kadto bagyong Yolanda.

Dunay piskal nga misugilon kanako nga nakadawat silag 5 mil sa niaging tuig apan ang mga kawani zero gyud.

Nagtuo ang mga trabahante nga nagpasanong si De Lima sa Malacañang mao nga gikuha kining kandidato sa pagka senador.

Dihay namahayag nga si De Lima mipugong sa ilang bonus aron dako ang makomisyon niini gikan sa Department of Budget and Management (DBM).

Gawas niini, naglagot sila kang De Lima kay gidid-an pa gyud sila pagpanawat og allowances gikan sa mga local government units.

Mibahad ang mga kawani nga ilang serohan si De Lima sa ilang tagsa-tagsa ka pamilya kay wa gyud magtan-aw sa ilang kaayohan.

Maayong Pasko nalang sa tana’ng trabahante. Hinaot nga dili puy-an ang pagkamadumtanon.

Ang importante nga wa kita magsakit ug wa kita maospital nga di sama sa uban nga nabulitan sa grasya apan masakitong dagko.

Merry Christmas!

Subscribe to our regional newsletter

By providing an email address. I agree to the Terms of Use and acknowledge that I have read the Privacy Policy.
Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS: Cebu, Cebu Governor Hilario Davide III, Christmas

Subscribe to our regional newsletter

By providing an email address. I agree to the Terms of Use and
acknowledge that I have read the Privacy Policy.

We use cookies to ensure you get the best experience on our website. By continuing, you are agreeing to our use of cookies. To find out more, please click this link.