Katilaw lagi’g boo. Giingnang ayaw, da!

By: Lloyd Suarez January 19,2016 - 10:45 PM

Nakaingon ko  nga “mirisi  gyud”  kang suspended Cebu City Mayor Michael Rama nga  gi-boo-han  sa  mga  nanan-aw ang  iyang kandidato  pagka presidente  nga si Vice Pres. Jejomar Binay sulod  sa Cebu City Sports  Complex niadtong Domingo  sa buntag.

Akong  tan-aw  niadto,  dili kadto  sa ingon nga  dili  sila  ganahan  ni Binay.  Ang rason  sa  pag-boo  mao  ang  pagka way  batasan   ug wa  pagtuman  sa  ilang  kaugalingong  mga  lagda.

Patuga-tuga  sila’g  hatag og  warning sa  mga  politiko nga bawal  mo-speech apan ilang  gitugtan  si  Binay  nga  maka-greet  nga  maoy  hinungdan  nga wa  makauyon  ang katawhan.

Wa pa gyud  maleksiyon  si Rama  atol  niadtong  Sinulog sa Kabataan sa Lalawigan  nga   gilabhan  siya  ug  nakadawat og  mga  negative  comments  paglakbit  sa iyang  speech nga biktima  siya  sa political  persecution?

Unsay  pagtuo ni  Rama, exempted  siya  sa  policy  sa  Sinulog  Foundation nga ibawal ang speeches sa mga politiko  kay  siya  maoy over-all chairman?

Ayaw  lagi  intawon  gamita  ninyo ang  kapistahan ni Senyor  Sto.  Niño  sa  inyong  kagaw sa  politika!

* * *

Ako lang  ipaagi sa  komedya pag-ingon nga  mingaw  ang  atong kapistahan  ni  Senyor Santo Niño kay way  patay! Hehehe.

Sa  amo  man  gud sa  Dalaguete, naandan  sa among mga  katigulangan  kaniadto  pa  nga  mingaw  ang  fiesta  ni  San  Guillermo  kung  way    patay.

Sa  tinuod  lang, grabe  gyud  ka  sadya dinhi sa  dakbayan  sa  Sugbo  niadtong  Fiesta Senyor.

Back to back  ang  party  human  sa Sinulog  parade mao  nga  traffic  kaayo,  unya  nagbaha ang  mga  tawo  sa  mga  establismento  nga  nag-offer  og  mga  kalingawan.

Sa akong pag-agi sa  Osmeña  Boulevard gikan sa downtown paingon sa Fuente,  puwerte pa’ng  daghana  sa  mga  tawo  bisan  alas 3  na sa  kadlawon  niadtong Lunes.

Sa  sunod  tuig,  mag-expect  ko nga  mas  sadya  kita.  Kinahanglan  gyud ang  police visibility  sa  mga  venue  sa  party.

Mas nindot  nga ipadeklarar  nga  holiday  ang  tibuok  Sugbo matag ikatulong  Lunes aron  makabuylo  ang tanan  sa selebrasyon.

* * *

With  all due respect sa  mga nakuryentihan  sa linya sa VECO  lakip  na sa  nahitabo  kagahapon diha sa  skywalk sa   may Fuente  Osmeña,  nagtuo  ko nga silay  nagrisgo  sa  ilang  kinabuhi.

Kadtong  unang duha  ka  mga bata  nga  nakuryentihan  klaro  man gyud  to  nga nisuway  pagputol  ug  pagkawat  sa wire aron ipatimbang.

Sa nahitabo  kagahapon, nagtuo  ko  nga  mao  say  tuyo  sa pagpanghilabot   sa kable ni  Noli Cesiban  nga taga Tisa  ning  siudad.

Nakaingon ko  niini  tungod  kay niadtong  Domingo, atol sa  Sinulog  grand  parade,   wa gyu’y  biktima  sa  electrocution  taliwa  nga puno sa  mga  tawo ang  maong  skywalk.

Ang  depensa sa  kabanay mao  nga igo ra’ng nanguha  sa nahibilin  nga  mga tarpaulin ang  biktima.

Kinsa  may  nagtugot   niya nga  ipakuha?

Tinuod  nga kining kawad-on  usa  sa  mga social  problem  nga atong  tutukan pero responsibilidad  usab sa tawo’ng  kabos  ang pagtinarong.

* * *

Pagka dakong  tamparos  sa teaching profession  sa  nasod  niining  pagkasikop  ni  teacher Ma. Jocelyn Arquillano sa  Consuelo National High School sa San Francisco, Camotes  kinsa  giingong kauban  sa iyang  bana nga  namaligya  na’g shabu sa barangay  Campo.

Ang  presumption mao  nga  mura’g  gikapoy na si Ma’am  pagtudlo sa  iyang  mga  estudyante  nga  gamay ra’g  suweldo.

Kumusta  na man  tuod ang  aksiyon niini  sa  mga  kadagkoan sa  Department  of Education (DepEd-7)?   Seryoso kaha  sila    nga  palagpoton sa serbisyo  kining maestraha?

Ang bana sa  maestra  nga si  Diosdado, kinsa  giilang   level 2 drug pusher,  maoy  target  sa  atong  kapolisan,   apan   naapil  pagkasikop ang magtutudlo ug ang  ilang tulo ka mga  anak.

Akong  nahibaw-an  gikan sa mga  operatiba nga ang usa sa mga anak sa magtiayong  Arquillano  niundang na pagpanakay  og  barko  sa gawas  kay naingganyo  niining ilang  negosyo  sa  illegal  nga drugas  didto  sa  Camotes.

Gawas  ning bag-ong   estorya  nga  dunay police official nga  magdawatan  og  tag 5 mil pesos  nga  payola  matag  semana  gikan  kang  Diosdado,  gisubay  usab  karon  sa  kapolisan  ang mga  pangan  nga  padalhan  og  dagkong  kantidad  nga  nakabasi sa  ubang  mga  lugar  sa  nasod.

Puwerte’ng  dagkoa  gyud  nila’g income  kay  dunay  transaksiyon sa  money  remittance  nga  mopadala sila’g tunga sa  milyon ngadto sa  ilang  mga recipients.

Kinsa  man  kining  mga  tawhana nga ilang padalhan  sa  dagko’ng kantidad?

Subscribe to our regional newsletter

By providing an email address. I agree to the Terms of Use and acknowledge that I have read the Privacy Policy.
Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS: Cebu City Mayor Michael Rama, Cebu City Sports Complex, Vice Pres. Jejomar Binay

Subscribe to our regional newsletter

By providing an email address. I agree to the Terms of Use and
acknowledge that I have read the Privacy Policy.

We use cookies to ensure you get the best experience on our website. By continuing, you are agreeing to our use of cookies. To find out more, please click this link.